Amăng hơdôm hrơi rơhông bruă, giăm 30 čô adơi amai djuai ania Bahnar amăng grup mơñam abăn ai amăng ƀut plơi 5, să Pờ Tó, tơring glông Ia Pa, tơring čar Gia Lai tum pơƀut glăi mơñam abăn ai gah yŭ sang. Mơnuih tha rơma hloh rơbêh 50 thun, ăt hơmâo lu ƀing hlăk ai mơn. Ƀing tha črâo brơi hlăk ai hơngah hơdôm rup rap tui gru grua hơđăp, mơng anun dưi mơñam rai hơmâo blah eng ao hiam hloh. Amai Đinh Như, dŏ amăng ƀut plơi 5, să Pờ Tó brơi thâo:

“Đưm hlâo adih ƀing yă pơtô brơi neh wa. Ră anai ƀing gơñu ăt hrăm mơng lu mơnuih dong. Tơdơi anai ƀing gơmơi ăt pơtô brơi ană čô dong, ră anai ƀing hlăk ia glăk kiăo tui hrăm 16, 18 thun”.

Bơ amăng să Ia M’nông, tơring glông Chư Pah, tơring čar Gia Lai, ƀing adơi amai djuai ania Jarai amăng grup mơñam abăn ao plơi Kép 2 ruah sa boh sang amăng plơi ngă anih mơñam hăng pơdă prưng hơdôm blah abăn ao. Anai lĕ anih tuai čuă ngui amăng plơi Kép 2. Truh ră anai, tuai čuă ngui nao ĕp lăng hơdôm blah bơnal, abăn, eng ao, ƀap, adung…dưi nao lăng tơl anih ƀing adơi dŏ mơñam, dưi ruah blơi glăi hơdôm eng ao, gơnam mơ̆ ƀing gơñu kiăng. Amai H’Duyên Niê-Khua grup mơñam mrai brơi thâo, ră anai hơmâo hơdôm anom bơwih ƀong sĭ mơdrô kĭ hră ngă hrŏm hăng grup, pok rai tơlơi gal prong amăng djă pioh hăng pơđĭ kyar bruă mơñam mrai. Yua anun hơdôm gơnam mơñam rai lăp djơ̆ hăng tơlơi kiăng mơng abih bang, mơ̆ ƀing adơi amai hơmâo prăk pơhrui giăm 5 klăk prăk rĭm blan.

“Khul đah kơmơi ƀing gơmơi hơmâo pơplih bruă mă, mơñam rai lu gơnam pioh sĭ brơi kơ tuai čuă ngui. Pơhmutu hơdôm bơnal mơñam rai tui anai ƀing gơmơi amra čoh pơkra jing adung, ƀap, eng ai, buai…mơng anun pơhlôm djơ̆ tơlơi rơkâo mơng tuai čuă ngui. Ƀing adơi amai ăt hơmâo prăk pơhrui, mơng anun pơtrut pơsur pran mă bruă, kiăng djă pioh gru grua”.

Amăng đơ đam tơring čar Gia Lai hơmâo laih 106 grup mơñam abăn ao, dưi tum pơƀut glăi 1.600 čô đah kơmơi. Mrô anai glăk lu tui lơm bruă mơñam mrai hơmâo tơring čar đing nao lăi pơthâo hơdôm gơnam pơkra rai kiăng sĭ brơi tuai čuă ngui. Tơring čar Gia Lai hơmâo ba bruă mơñam abăn ao jing tơhnal yôm phăn amăng akŏ bruă “Djă pioh, lăi pơthâo gru grua yôm phara mơng djop djuai ania ƀiă pơlir hăng pơđĭ kyar bơwih brơi tuai čuă ngui” gah jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng rơwang thun 2021-2030. Ră anai hơdôm abăn ao mơñam rai hơmâo pơdă prưng, lăi pơthâo amăng hơdôm hrơi ngui atông čing hơgor rơnuč rơwang hrơi tơjuh, juăt pơphun ƀơi tơdron lăk Đại Đoàn Kết, plơi prong Pleiku.

Yă Nguyễn Thị Thanh Lịch- Kơ-iăng Khua Jơnum min mơnuih ƀôn sang tơring čar Gia Lai brơi thâo, hơnong pơkă mơng tơring čar lĕ djă pioh, lăi pơthâo hăng ba abăn ao jing gơnam bơwih brơi tuai čuă ngui amăng tơring čar:

“Mơng anai kâo čang rơmang ƀing adơi, ƀing rơgơi kơhnâo anăm pơdơi mơñam abăn ao, hơmâo lu dong eng ao hiam. Ƀing gơmơi čang rơmang tŏ tui na nao bruă lăi pơthâo hăng hơmâo hơmâo dong prăk pơhrui, lăi pơthâo brơi tuai čuă ngui pơlir hăng hơdôm gơnam sĭ mơdr, pơgôp amăng bruă pơđĭ kyar bơwih ƀong hơđong kjăp amăng tơring čar Gia Lai”./.