VOV4.Jarai-Hơdôm hrơi giăm têt, Siu Philip thun tơkeng 1992, dŏ pơ plơi Yon Tok, să Ia Glai, tơring glông Čư̆ Sê, Gia Lai hlăk hrom hăng sang anŏ prăp lui mơnong ƀong hra pơhăng amăng hrơi Tết. Prăp lui čeh tơpai, añăm mơnong rơmô ƀhu krô, mơnong mơnŭ, bui, braih điơ̆ hơmâo djop soh. Samơ̆ tui hăng ñu, Tết ƀu dưi kơƀah ôh mơnong ƀong hra pơhăng pioh tut ƀong añăm mơnong ƀhu krô amăng pơđiă hăng pơhang ƀơi pra apui mơ̆ng Jrai hơbai ta.

Siu Philip hăng amai ñu nao truh să Ia Mơr, tơring glông Čư̆ Prong, ataih mơ̆ng plơi gơñu 20 km pioh ĕp hơdom sao. Siu Philip lăi:

“Hră tul hăng hơdom sao juăt hyu mă amăng bơyan phang, jơman hloh. Yua bơyan phang hơmâo boh. Kâo nao mơ̆ng sang truh pơ să Ia Mơr, tơring glông Čư̆ Prong, bơyan anai hơmâo lu biă, djă ba kơdung nilon, thong dao, kơthung. Ƀuh hruh hơdom sao lĕ mă dưm amăng kơdung.

Ƀơi anŏ mơ̆ng 3 mông mơguah sing bring truh 8 mông mơguah hơmâo yơh bă kơdung laih, ƀơi anŏ hơmâo truh 2,3 kg, tơdah bưng băi. Glăi truh pơ sang, ăt añrŭ amăng ia rơgoh hơdjă, ƀhu krô mơ̆ng 1-2 hrơi. Giong anun, ta tul hăng hra, pơhăng, pioh ƀong têt ƀudah djă pioh 2-3 blan. Djơ̆ bơyan têt, ta mă ƀong tut hra anai hăng añăm mơnong ƀhu krô, mơnong rơmô, un, añăm mơnong tơkuih jơman biă mă”.

Nay Jek: Pơblang