VOV4.Jarai-Lơ 28/4, Grup hyu mă bruă mơ̆ng Khul khua wai lăng Gơnam gru grua dêh čar, hơmâo mă bruă hăng Jơnum min mơnuih ƀôn sang tơring čar Gia Lai kơ tơlơi rơkâo mơ̆ng UNESCO brơi pơgang djop anih djă pioh gơnam gru grua hiam đưm mơak pran jua ană mơnuih mơnam, pơgang hăng pơđĭ tui rơnoh yôm gru grua dêh čar, gơnam dêh čar djă pioh. Tơring čar Gia Lai hơmâo 33 boh anih gru grua, ƀut djă pioh gru grua yôm. Amăng anun anih anom gru grua Tây Sơn Thượng đạo, plơi prong An Khê dưi tŭ yap anih gru grua đưm dêh čar yôm phara, hrom hăng 8 anih gru grua dêh čar hăng 16 gru grua gưl tơring čar.

Mông  mă bruă mơ̆ng Khul wai lăng gru grua dêh čar hăng

Jơnum min mơnuih ƀôn sang tơring čar Gia Lai

Hrom hăng anun, anih anom gru grua atông čing hơgor akhan hri djuai ania Bahnar, ngă yang iâu ia hơjan, ngă yang hri bơngăt pơdai mơ̆ng Yang pơtao Apui, dưi čih anăn gru grua hiam pran jua gưl dêh čar. Hăng lu anih, gơnam gru grua đưm An Khê hăng tơring glông Đak Pơ, hơdôm thun giăm anai hơmâo ĕp ƀuh gơnam grug rua yôm, sui thun năng ai 80 rơbăn thun rơgao, dưi lăng anŏ phun gru grua pok brơi bruă čih pioh gru phun dêh čar Việt Nam. Khă tui anun, bruă djă pioh, pơgang lui anih anom gru grua đưm hiam anai tơnap tap biă mă.

Ƀơi mông mă bruă, Khul wai lăng gru grua đưm dêh čar rơkâo, hrom hăng ngă klă bruă răk pioh, wai pơgang klă, tơring čar Gia Lai khom lăng gru grua anun jing anŏ pơtrut bơwih ƀong huă mơnuih mơnam, anăp nao man pơdong plơi pla tơring čar Gia Lai jing anih hyu ĕp lăng gơnam gru grua hiam đưm ƀơi kual Dap Kơdư.

Nay Jek: Pơblang