Mrô yua facebook “H’Tuyết thổ cẩm Jrai” hmâo hơdôm rơbâo wot čô mơnuih lăng tui, yua anun yơh sa jơlan lăi pơhưč, djru amai H’Tuyết ƀơi grŭp mrô 10, tơring kual Phú Thiện, tơring glông Phú Thiện sĭ mơ̆ng 70 truh kơ 100 pok hră blơi gơnam, pơhrui hmâo hơdôm pluh klăk prăk rim blan. Amai H’Tuyết brơi thâo, đam ƀơi anih sĭ mơdrô yôl 4 bơnah lĕ măi tơčôh băn ao hăng băn eng pơhrô̆p mơ̆ng băn mơñăm, ñu juăt livestream lăi pơthâo hơdôm tơlơi hơdip mơda, đa mă rah bruă hăng adôh rah pioh pơhưč mơnuih lăng. Băn ao Jrai dưi hmâo ñu tơčoh jing ao dai, băn ang hyu pơdô̆ rơkơi bơnai, ao ghi lê đah rơkơi, ƀudah băn ao kơ čơđai anet,… tui djơ̆ tơlơi kiăng, djuai băn ao mơ̆ng mơnuih blơi. Kơnang kơ anun, ñu pơjing bruă mă kơ 4 čô mơnuih thâo mơñam băn ao, hăng rơnoh prăk blan 6 klăk prăk sa blan hăng blơi băn mơñam mơ̆ng mơnuih mơñam băn ao ƀơi să Ia Sol, tơring glông Phú Thiện amăng lu thun hăng anai. Amai H’Tuyết lăi pơthâo:

 “Kâo čơphin rŭp dar phim pơdah brơi arăng lăng amăng facebook, Zalo mơ̆ng anun lu mơnuih blơi yua gơñu thâo hăng rai ĕp lăng. Đa mơ-ĭt tơlơi lăi pơthâo, đa rơkâo blơi gơnam. Drơi pô kâo ăt tŭ mă mơ̆n tơlơi pơhing mơ̆ng facebook, Zalo kiăng hrăm mơ̆ng ƀing adơi amai pơ̆ hơdôm anih pơkon kah hăng Dak Lak, Lâm Đồng, Kon Tum... Kâo ăt bơni mơn pô pơjing rai facebook. Kơnang kơ hmâo facebook djru kâo hrăm dong kiăng pơđĭ tui bruă mă. Ăt kơnang kơ facebook mơ̆ lu mơnuih thâo lăi pơthâo hăng rơkâo blơi gơnam ƀu djơ̆ mơnuih amăng lŏn ia đôč ôh mơ̆, dô̆ hmâo mơnuih mơ̆ng dêh čar tač rơngiao dong”.

 Gru hiam mơ̆ng băn ao mơñam Gia Lai hmâo pô dăp hơdră băn ao Minh Hạnh – Khua pơčeh phrâo Sang bruă Việt Mốt, pô ba ao dai, bơnal mơñam hăng măi, băn mơñam mơ̆ng hơdôm kual amăng dêh čar nao pơ̆ dêh čar tač rơngiao, đing nao hăng lăi pơhưč. Rơnuč blan 10/2023 phrâo rơgao, amăng jơlan hơdră adôh suang “Gia Lai ơi”, yua kơ Jơnum min mơnuih ƀôn sang tơring čar Gia Lai pơphun, tal blung a băn ao mơñam mơ̆ng djuai ania Jarai, Bahnar dưi hmâo Minh Hạnh pơčeh pơjing hơdôm gơnam pơhrô̆p pha ra lĕ băn eng, ao dai, hmâo anăn 4 bơyan: bơyan bơnga, bơyan hơjan, bơyan puih, phang. Ƀơi anun, ƀu djơ̆ kơnong kơ bơnga băn ao mơñam ôh mơ̆, gru rŭp hmâo gru pha ra mơ̆ng Dap Kơdư kah hăng sang rông, phun hrăi pơčrang pô̆ ƀơi glông čroh ia rô hăng hơdôm bôh song nan,... dưi pơhrua hrŏm bơnal mơñam hăng măi, pơjing hơdôm gơnam pơhrô̆p hiam pha ra. Pô dap hơdră pơkra băn ao Minh Hạnh brơi thâo, ñu pơmin djru băn ao mơ̆ng djop djuai ania ƀiă ƀơi Gia Lai ba hyu sĭ, kiăng rŭ đĭ hơdôm bôh plơi juăt rơngaih mơñam amăng tơring čar:

 “Gơñu rơngaih mơñam ƀu amuñ ôh, bơnga mơñam mơ̆ng gơñu hmâo tơhnal yôm phăn amăng tơlơi hơdip mơda, klă biă. Bruă blung a mơ̆ng ƀing gơmơi lĕ čang rơmang ba anô̆ yôm anai đĭ dlông tui. Tơlơi anai hăng ƀing gơmơi ƀu tơnap mơn, pơ ala yua kơ neh wa rơngaih mơñam hăng mraih sit băn ao lĕ ƀing gơmơi gir run tô nao rai pioh rơngaih mơñam tơbiă hơdôm blah băn ao hăng mraih yôm hloh. Anun lĕ hơdră ngă brơi nua băn ao mơñam yôm hloh”.

Ră anai, tơring čar Gia Lai glăk pok pơhai lu jơlan pơlir nao rai hơdôm bruă mă kiăng hơkrŭ glăi, pơgang hăng pơpŭ hơdôm nua yôm bôh thâo phiăn juăt, djru ngă lu tui dong kơ bôh thâo djop  djuai ania Dap Kơdư. Amăng anun, pơgang kơjăp dưi pơsit pơkĕ hrŏm hăng bruă mă yua nua yôm bôh thâo, sĭ mơdrô, djru mơnuih rơngaih mơñam dưi pơđĭ kyar bơwih ƀong. Yă Nguyễn Thị Thanh Lịch – Kơ-iăng Khua Jơnum min mơnuih ƀôn sang tơring čar Gia Lai brơi thâo:

  “Ƀing gơmơi čang rơmang pơpŭ mơnuih thâo mơñam băn ao, pơtô glăi ƀing hlăk ai pioh djă pioh bruă mă phiăn juăt đưm, nao hrŏm hăng pơčeh phrâo. Dua lĕ ƀing gơmơi čang rơmang lăi pơhing hyu, kiăng ƀing kơsem min bôh thâo, hơdôm mơnuih pơčeh phrâo, mơnuih dăp hơdră tơčôh băn ao pơhrô̆p kiăng mă yua băn ao jing băn ao yua rim hrơi hmâo nua yôm, pơđĭ kyar bơwih ƀong kơ neh wa djuai ania ƀiă ƀơi tơring čar Gia Lai”./.