Jơlan hơdră anai yom pơphăn biă mă čơkă mơak 80 thun Hrơi Wa Hô mơ-it hră kơ mông jơnum khua mua pơ ala djop djuai ania ƀiă gah kual Dơnung ƀơi Plei Ku hăng 51 thun Hrơi pơklaih rơngai kual Dơnung, pơlir lŏn ia. Tơlơi kơđŏm lăi nao amăng jơlan hơdră lĕ pơƀuh glăi hră mơ-it mơ̆ng Khua mir sir Hồ Chí Minh, mơ-it kơ mơnuih ƀôn sang djop djuai ania ƀiă thun 1946.

Hơdôm tơlơi pơtă pơtăn kơ pran jua thâo gum pơgôp djuai ania, lir hơbit tong ten plah wah djop djuai ania kiăng pơtong rơđah rơnoh yom ƀu thâo tơ̆i dơnuai, mơ̆ng rơnuk đưm blah wang truh ră anai. Jơlan hơdră tơlơi adoh suang hơmâo dăp hơdră, pơdah thâo hiam mơak lu črăn hiam phara biă mă. Anih anom ngui ngor atông čing suang arap kual Dap Kơdư ăt hơmâo pơƀuh brơi rơđah tong ten, mơak klă, wơ̆t čing kram, čing kông, gông brô̆, đing diăp, đing pơng hăng er tơlơi adoh đưm djop djuai ania mơak biă mă.