Ƀơi adring sang, tha plơi - mơnuih kơhnâo gru đưm Rơ Châm Nha dŏ pel nao pel rai goong ñu kah hăng djă pioh răk lui gru grua, tơlơi lăp hơdor mơ̆ng đưm, tơngan ñu gư̆ tut, pleh hrĕ goong, mơñi mơak, rơnguă biă mă. Mơta ñu lăng nao pơ ataih, dŏ pơhmư̆ lăng yŭ goong mơñi, kar hăng ră ruai glăi tơlơi hơdip ană plơi wơ̆t hăng pô ñu lơ̆m glăk dŏ tơdăm.

Lơ̆m anun ñu 20 thun, ñu ngă tơhan du kích jing tơhan blah rŭi hyu amăng tơring ñu, giong anun ngă tơhan hlăk ai kơsung nao hlâo, pơdŭ pơgiăng braih huă añăm ƀong kơ tơhan ƀô̆ đô̆i blah ayăt Mi. Thun 1986, ñu dŏ bơnai, laih anun ăt ngă tơhan du kích ƀơi plơi mơn. Amăng rơnuk blah wang, mah tơnap biă, samơ̆ ơi Rơ Châm Nha ăt ha pran jua kiăo tui Ping gah, kiăo tui Wa Hồ, gum pơgôp pran jua kơ bruă pơklaih rơngai kual Dơnung - pơlir hơbit lŏn ia ta: “Thun 1961-1962, kâo jing sa čô tơdăm dŏ amăng plơi. Truh thun 1963 kâo hơmâo pơmut anăn amăng Khul hlăk ai laih anun truh thun 1965 kâo hơmâo jao ngă Khua grup tơhan du kích, jing tơhan blah hơdeč. Tơhrơi ñu jing sa čô tơdăm ngă bruă tui arăng mơn, bơ mlăm ñu ba tơhan ƀô̆ đô̆i nao blah puih kơđông ayăt. Ƀing khua hăng tơhan ƀô̆ đô̆i lơ̆m anun ƀu hơmâo pô ba jơlan ôh, jơlan nao rai lĕ tơnap mơn. Yua kâo lĕ mơnuih dŏ pơ plơi, thâo soh bruă ayăt ñu dŏ pơpă, ngă hiư̆m pă, puih kơđông tơhan ƀing đam ƀơi, čư̆ pơpă ñu kơđap, anun jing ba tơhan nao blah prai mơtăm”.

Lăi nao kơ lơ 30/4/1975 - gru kơđŏm pơklaih rơngai kual Dơnung 30/4/1975- amăng mơta tha plơi  Rơ Châm Nha rơđah bơngač, ñu tlao hok biă mă, ƀô̆ mơta tha ñot laih samơ̆ lăng ăt hiam mơn hăng anŏ ñu hơmâo pran. Ñu pơđar tơčô ñu Rơ Châm Tứ pĕ đing t’rưng, ñu pĕ goong či mơak hăng hrơi pơklaih rơngai lŏn ia: "Mơak hloh lơ̆m lŏn ia ta rơngai. Tơdơi kơ ta blah ayăt giong, lŏn ia rơngai laih, abih bang mơ̆ng tha truh kơ ƀing čơđai, hlăk ai tơdăm dra hlơi hlơi leng kơ mơak soh, kah hăng arăng leh hrĕ akă, hrĕ pơpal drơi, hok mơak hrŏm ană plơi. Hur har mơak tui tơlơi jak iâu akŏ pơdong grup hlăk ai hyu pôr pơhing, sa grup nao adoh suang, pơtrut pơsur pran jua, sa grup jik bruă ngă hmua, bơwih ƀong či hơkrŭ glăi lŏn ia plơi pla. Mơak biă mă yua tơlơi hơdip ta rơngai, mơai pô, atông čing, ayun suang tui hluai či hor yơh”.

Hăng tha plơi - mơnuih kơhnâo gru đưm Rơ Châm Nha, hơmâo pĕ goong atông čing amăng hrơi ngă lơphet 51 thun Pơklaih rơngai kual Dơnung, pơlir lŏn ia jing tơlơi mơak hloh, yom hloh, anih hơmâo jua čing hơgor mut hrŏm tơlơi pơ-ư pơ-ang mơ̆ng lŏn ia pơplih phrâo./.