Mơguah lơ 26.04 jing hrơi 10 blan 3 blan tơƀang ƀơi Anih anom gru grua djă pioh kơ dêh čar, anih yom phara pra yang pơsat ơi pơtao Hùng, tơring čar Phú Thọ, pơphun tơlơi ngă yang prong huă pơsat ơi pơtao Hùng hăng pơyơr bơnga hiam dưm ƀơi rup trah “Wa Hồ dŏ pơhiăp hăng ƀing khua mua, ling tơhan Đại đoàn Quân Tiên Phong”.

Abih sa rơnuk lu thun mơ̆ng đưm đă gru phun dêh čar hơmâo akŏ pơdong hăng pơgang lŏn ia, tơlơi pơtô hiam thâo hơdor tơngia kơ ơi yă đưm đă jing kah hăng hrĕ mrai tô brơi, pơtruh nao rai tơlơi lir hơbit, anih tơki kơnang amăng pran jua, phun akha kơ tơlơi kơtang yom phara biă mă kơ djuai ania, hơmâo ba rai boh tơhnal djă anăn Việt Nam amăng tơlơi gum pơgôp pioh pơgang tơlơi truh lŏn adai ngă, tơlơi ayăt blah mơkang wang plơi, tơlơi duăm ruă klin kheng, kiăng pơgang hăng man pơdong lŏn ia găn rơgao abih tơlơi lông lăng. Tơlơi kơnang amăng pran jua đăo bơngăt atâo mơ̆ng bruă ngă yang huă pơsat ơi pơtao Hùng kah hăng tơlơi iâu pơtum mơ̆ng djop hơtai boh pran jua ană Lạc tơčô Hồng anăp glăi kơ phun akha plơi rơngôl sô mơ̆ng đưm đă, ơi yă kơ lŏn ia jing ơi bung yă bai dua boh pia “Đồng bào” Sa hruh tơbiă rai, hrŏm sa hruh hơmâo ană plơi pla. Huă pơsat ơi pơtao Hùng Vương ƀu kơnong jing hrơi ngui ngor prong mơak mơ̆ng djuai ania đôč ôh, dŏ jing mông gêh găl ngă bang bơngač tơlơi khăp kơ lŏn ia tơlơi pơmin khut khăt gir kơtir mă pô hăng tơlơi kiăng hrưn đĭ-kah hăng tơlơi Wa Hồ pơtô lăi, pơtă pơtăn tui anai: “Hơdôm rơnuk pơtao Hùng hơmâo akŏ pơdong laih lŏn ia, Wa amôn ƀing ta khom hrŏm hơbit pơgang pioh lŏn ia”.

Hlâo kơ anun, mơ̆ng lơ 17/44 jing lơ 1/3 thun Bính Ngọ, Jơlan hơdră pơphun bruă ngă yang Huă pơsat ơi pơtao Hùng Vương-Ngă yang ngui ngor ƀơi pra yang pơsat pơtao Hùng hăng Sa rơwang hrơi tơjuh Gru grua-Tuai čuă ngui ƀơi kual lŏn phun akha lŏn ia thun 2026 hơmâo pơphun lu jơlan hơdră sa dơnuai pơprong ƀơi kual anih gru đưm pra yang pơtao Hùng hăng hơdôm să, phường jĕ giăm jum dar amăng tơring čar Phú Thọ. Jơlan hơdră thun anai hơmâo lu tơlơi phrâo hiam hloh, lir hơbit hăng bruă djă pioh gru grua đưm hăng pok pơhư bruă pơtruh nao rai ngui ngor hăng jar kmar.

Anai lĕ thun blungg a tơring čar Phú Thọ pơphun pơdă rup hiam jar kmar, lăi pơthâo rup rap kual lŏn phun akha lŏn ia kơ gơyut gơyâo jar kmar thâo. Lu bruă mă ngui ngor tui tơlơi phiăn đưm djă pioh pơdah thâo mơak biă mă kah hăng : Pơphun anih pơtum pơčeh rai gru grua hiam tơlơi thâo thăi, ba pơdă, lăi pơthâo hơdôm mơta gơnam pơkra ming mơ̆ng tơring čar; pơplông tơlơi adoh suang mơnuih ƀôn sang; pơplông anung ƀañ điơ̆, ƀañ čưng, ƀân yâi...ngă yang čuh ñang ƀâo hiam h’ŭ kơ hơdôm rơnuk pơtao Hùng đưm ƀơi djop să, phường amăng tơring čar Phú Thọ tui 118 ƀut să, phường.

Tơlơi ngă yang rơbang pơpŭ kơ ơi pơtao Hùng dưi hơmâo UNESCO čih pioh pơsit jing gơnam gru grua bơngăt jua pơ ala kơ ană mơnuih mơnam rŏng lŏn tơnah mơ̆ng thun 2012. Hrơi huă pơsat ơi pơtâo Hùng Vương lĕ sa bruă ngă, tơlơi đăo bơngăt jua phara biă mă, hin đôč hơmâo amăng rŏng lŏn tơnah pơkă hăng lu dêh čar, djuai ania ƀơi jar kmar. Boh tŭ yua sit nik mơ̆ng tơlơi ngă yang Huă pơsat ơi pơtao Hùng Vương lăi nao 4 mơta boh yom phun.

Tơlơi pơpŭ thâo hơdor tơngia, tơlơi pơtô djơ̆ ƀong boh hơdor kơ pô pla, mơñum ia hơdor kơ čro hnoh; tơlơi thâo hluh mơ̆ng djuai ania hăng tơlơi đăo hiam phara biă mă h’ŭ bơngăt atâo ơi yă đưm đă mơ̆ng djuai ania Việt Nam.  Kơ-iăng nai tha prin-nai prin tha Bùi Hoài Sơn, khua pơ ala gah bruă phun Jơnum min Gru grua-Pơtô hrăm mơ̆ng Sang bruă khua pơ ala mơnuih ƀôn sang dêh čar lăi:

“UNESCO lăng yom biă mă tơlơi gơgrong ba djop djuai ania Việt Nam amăng bruă pơpŭ kơ tơlơi ngă yang, tơlơi đăo bơngăt jua h’ŭ kơ ơi pơtao Hùng Vương jing gru kơkuh pơpŭ mơ̆ng djuai ania. Mơ̆ng gru kơkuh pơpŭ djuai ania kah hăng anun, pơjing rai tơlơi gum pơgôp abih bang amăng lŏn ia anai hăng djru kơ ƀing ta hơmâo gru grua hơkrŭ kơdong hăng pơgang pioh lŏn ia truh ră anai. Sa tơlơi dơ̆ng UNESCO lăng yom, tơlơi đăo kơ yang rơbang amăng bruă ngă kơkuh pơpŭ bơngăt jua ơi pơtao Hùng Vương dŏ djă pioh na nao mơ̆ng đưm đă truh kơ rơnuk anai, ăt dŏ  djă pioh na nao đôč, djop djuai ania amăng Việt Nam hlong ngă tui na nao”.