Hăng rơbêh 5,3 klăk čô mơnuih djuai ania Việt hlăk dŏ hơdip mơda hăng mă bruă ƀơi dêh čar tač rơngiao, hrơi Huă pơsat ơi bung yă bai rơnuk pơtao Hùng Vương jing hrơi mông yom pơphăn juăt pia mông mah kiăng hơdor glăi kơ phun akha lŏn ia. Djă pioh tơlơi đăo yang rơbang bơngăt atâo đưm rơnuk pơtao Hùng Vương ƀơi dêh čar tač rơngiao jing djă pioh gru ama grua amĭ djuai ania Việt, djru kơ djop gưl ană tơčô mô yâo tơkeng rai ƀơi dêh čar tač rơngiao ƀu dưi wor rơbit ôh phun akha djuai ania dêh čar ta pô.

Mơ̆ng thun 2015, Kơčăơ bruă Hrơi kơ ơi yă Lŏn ia Việt Nam đơ đam rŏng lŏn tơnah, dưi pơphun ngă, pơtruh brơi kơ abih bang djuai ania Việt Nam dŏ ƀơi lu dêh čar amăng rŏng lŏn tơnah anăp glăi hrơi jơnum prong ngă yang Huă pơsat ơi bung yă bai kơ lŏn ia, tui tơlơi phiăn mơ̆ng đưm hrŏm hơbit sa hnơ̆ng đôč. Hrơi hơdor tơngia kơ ơi yă lŏn ia Việt Nam, pơtruh ƀơi đơ đam lŏn tơnah lĕ sa bruă mă gru grua hiam yom phara biă mă, ƀu kơnong hơjăn djuai ania Việt Nam hlăk dŏ hơdip mơda, mă bruă ƀơi tač rơngiao đôč ôh, dŏ jing bruă mă pơtrut ngă giăng mah hiam mơak pơpŭ kơ gru grua hiam tơlơi rơnuk rơnua amăng rŏng lŏn tơnah, pơtrut bruă ngaw mơak plah wah Việt Nam hăng jar kmar....

Truh ră anai, kơčăo bruă anai hơmâo pơtruh brơi lăng nâo rai mơ̆ng ataih, hrơi Huă pơsat ơi yă lŏn ia hăng bơni kơ ană tơčô mô yâo djdop rơnuk pơtao Hùng đưm adih ƀơi giăm 50 boh dêh čar amăng 5 kual tơring tơrang amăng boh lŏn, kơtưn pơtruh nao rai djuai ania ania Việt Nam amăng rŏn lŏn tơnah hăng gơyut gơyâo jar kmar.

Dŏ ngă yang h’ŭ pơpŭ glăi kơ ơi yă djuai ania dêh čar pô, mơnuih ƀôn sang Việt Nam dŏ ƀơi tơring čar Udon Thani, kual kơdư ngŏ Thai Lan, pơphun ngă yang Huă pơsat pơtao Hùng prong biă mă. Ơi Lương Xuân Hòa, Khua khul mơnuih ƀôn sang Việt Nam ƀơi tơring čar Udon Thani, lăi nao tơlơi kiăng mơ̆ng mơnuih ƀôn sang ƀơi anun:

“Rim thun gơmơi pơphun djơh hăng anai soh, kiăng ană tơčô hơdor glăi drah kơtăk djuai ania ta ană tơčô pơtao Hùng. Mah tơkeng rai mơ̆ng pơpă hăng prô̆ tơdăm prăm dra pơ lŏn ia  Thai Lan hai, drah kơtăl ană tơčô djuai ania Viêtj Nam ăt dŏ rô na nao amăng hơtai boh, laih anun ƀing gơmơi ăt ha pran jua anăp glăi kơ lŏn ia phun akha bơngăt jua ơi yă dêh čar ta pô”.

Djă pioh rơnoh ym hrơi Huă pơsat pơtao Hùng Vương ƀu dŏ glăi ƀơi bruă ngă yang, pơphun prong hăng anet ôh, dŏ jing sa bruă mă, djă pioh, pơtrut pran jua khăp kơ lŏn ia hang râo pơdưh tơlơi pơmin thâo gum pơgôp mơ̆ng djop mơnuih djuai ania Việt. Anai lĕ, phun akha tơlơi kơtang, pran jua gru grua hiam djuai ania Việt Nam kơjăp phik mut phung hăng jar kmar samơ̆ ƀu rơngiă gru grua djuai ania ôh. Mah dŏ pơpă hai, kơnong hơdor glăi, anăp nao kơ hrơi huă pơsat lơ hơpluh blan klâo, ngă yang h’ŭ bơngăt atâo ơi pơtao Hùng Vương, sit mơ̆n arăt drah rô mơ̆ng djuai ania ăt rô na nao, pơlir tơlơi gum pơgôp djuai ania Việt Nam jing sa khul gum pơgôp prong prin, kơjăp hloh.