Gong drai kut klao djuai ania Mă arăng juăt pơdong tơpă đĭ hăng ngŏ, pơkă hăng lŏn tơnah gong drai pơdong đĭ tơpă akiăng pơgăn hăng bah lŏn tơnah, yuăn pia vuông góc, giong arăng pla trun gai tơmeh, akă hrĕ hăng čơpăn ƀĕ gai anăp nao gah čơpăn anăp phara soh hăng bơkơnar. Hrĕ anai arăng kŭi hĭ hăng pik mia ia iom lu mơta ngă rup čĭm brĭm, rup bơnga, hla kyâo pơtâo, rup amung pơdai ƀudah rup lă, wil, rup klang črah….Mơnuih kơhnăk gru đưm, ơi K’Breoh, plơi B’Sumrak, să Lộc Tân, tơring glông Bảo Lâm, tơring čar Lâm Đồng brơi thâo, gong drai djuai ania Mă lăng hrup hăng phun boh rơmai glai, hơmâo lu than, hla añĕ, ƀudah hrup phun boh đung lu hla, phara rup rap pơhrôp kơ lu djuai ania, phung wang, kơnung djuai amăng plơi pla.

“Gong drai juăt pơkra hăng pơdong đĭ amăng mông ngă yang ngui ngor amăng plơi, lu biă mă ñu ngă yang pơtrum kơbao. Anai lĕ sa rup rap hơbô̆ juăt ƀuh amăng plơi pla. Gong drai yua mơnuih amăng plơi koh trah pơkra ming hrŏm hăng tha plơi mơnuih kơhnăo gru grua đưm pơčrâo ba pơdong đĭ. Hrŏm hăng gong drai dŏ hơmâo lu mơnong ƀong huă gru grua kah hăng añăm mơnong mơnŭ ăm, añăm mơnong kơbao …pioh ngă yang, pơpŭ kơ khul yang rơbang hơmâo djru kơ ană plơi sa thun hlim rơnang phang mơak, bơyan pơdai jor kơtor lu ană plơi pla trơi pơđao”.

Rim thun, tơdơi kơ hơpuă yuă giong, kơtor ba dưm amăng hơjai, pơdai tuh amăng tơnuh, ană plơi pla ngă yang hăng kơbao yơh kiăng bơni hơdor tơngia kơ khul yang rơbang tơdah djơ̆ thun pơdai jor kơtor lu. Tơdah djơ̆ thun pơdai ƀu jor kơtor ƀiă  lĕ ngă yang anet, kơnong tơnă huă asơi amăng sang anŏ, čuh mơnŭ, čuh bê ƀong ngui.

Rim wơ̆t plơi pla hơmâo tơlơi ngă yang pơtrum kơbao, ngă yang huă asơi hle arăng pơdong gong drai soh. Gong drai ngă yang pơtrum kơbao mơ̆ng djuai ania Mă arăng pơpha jing dua črăn, gong drai pioh akă čeh tơpai hăng gong drai pơtrum kơbao. Mơnuih kơhnăk tơlơi đưm ơi K’Breoh, plơi B’Sumrak, să Lộc Tân, tơring glông Bảo Lâm brơi thâo dơ̆ng, gong drai pioh akă čeh tơpai lĕ pơdong tong krah sang, arăng trah pơkra lu rup, pik ia iom ngă rup čĭm brĭm, hlô mơnong arong aruač hăng čeh tơpai akă ƀơi phun gong drai anai. Bơ gong drai pơtrum kơbao lĕ arăng pơdong ƀơi lan sang, anăp adring sang ăt pơhrôp lu mơta rup mơ̆n, gong drai prong hloh kơ gong drai akă čeh tơpai. Hlâo kơ pơdong đĭ gong drai anai arăng ăt iâu yang, lăi pơthâo hăng yang atâo ơi yă đưm đă. Mơnuih kơhnăk bruă đưm, ơi K’Breoh lăi:

“Kiăng ngă tui tơlơi phiăn ngă yang pơdong gong drai lĕ ană plơi pla prăp lui čeh tơpai hăng sa drơi mơnŭ. Tha plơi ƀeh drah mơnŭ hăng iâu yang rah, lăi pơthâo khul yang rơbang hrơi anai amăng plơi ngă yang pơtrum kơbao ƀudah ngă yang hơpuă yuă pơdai giong, jak iâu khul yang rơbang, atâo ơi yă đưm glăi ngui hrŏm ană plơi pla”.

Amăng tơlơi phiăn juăt đưm djuai ania Mă, gong drai gong kut klao lĕ anih khul yang rơbang dŏ laih anun ƀong mơñum mơnong ta ngă yang. Yua kơ anun yơh gong drai arăng dưm nao añăm mơnong hăng hling ia tơpai ƀơi anun. Khua plơi yơh pô hơmâo tơlơi dưi git gai ană plơi pla pơdong đĭ gong drai, hlăk ai tơdăm dra djru pran jua mă bruă, pô hyu koh kyâo, pô hyu hruč huai, pô krih ale djrao, trah ƀôh ngă rup pơhrôp kơ phun gong drai brơi hiam. Mơnuih kơhnăk gru đưm ơi K’Breoh brơi thâo dơ̆ng:

“Gong drai arăng pơdong ƀơi anăp adring sang, jing ƀơi lan sang ƀudah ƀơi lan sang rung tong krah plơi, ƀơi anŏ či anăp sang pô tha plơi, khua ƀôn. Hlâo kơ pơdong đĭ gong drai, ƀing hlăk ai amăng plơi pơtum glăi pioh pơdong đĭ gong drai. Gong drai arăng pơdong đĭ, tơdơi kơ tha plơi iâu yang giong”.

Gong drai mơ̆ng djuai ania Mă lĕ ƀu kơnong bruă ngă hơdor tơngia  mơ̆ng ană plơi hăng khul yang rơbang atâo ơi yă đưm đă đôč ôh, kiăng hơdor tơngia yua hơmâo hơpuă yuă pơdai jor kơtor lu, čang rơmang yang rơbang djru ba ană plơi pla ngă pưk brơi rơnang, ngă sang brơi hơđong laih dơ̆ng gong drai anun sa mơta gơnam pơkra ming tơbiă rai mơ̆ng tơlơi pơčeh phrâo ia rơgơi, pơhrôp đĭ ngă anŏ hiam hrup thâo tơpư̆ mơyang, jing anih phun kơ bruă pơpŭ ngă yang, gru kơ tơlơi kiăng mơak klă amăng tơlơi hơdip ană mơnuih kiăng hơmâo tơlơi hơdip hyuk hyak mơak klă.