Mơnuih djuai ania ƀơi kual Dap kơdư lăi hrŏm, mơnuih djuai ania M’nông hnun mơn, mơng đưm đă ră hlâo hơmâo pơjing rai gru grua ngă đang hmua. Tơlơi hơdip gơnang nao lŏn mơnai glai čư̆, yua anun mơnuih djuai ania M’nông lêng kơ lăng yôm bruă wai pơgang lŏn mơnai glai čư̆, sit biă ñu lĕ glai rưng. Rĭm wŏt jong jơnah jah glai, abih bang lêng kơ rang kơđiăng amăng bruă wai pơgang glai rưng jum dar hmua, yua anun ƀing gơñu kơnong tơjŭ pla amăng lŏn hmua ƀing gơñu rơmet pơagaih đôč. Bơ glai jum dar hmua, neh met wa ăt wai pơgang, lơ̆m čuh amur ƀu brơi apui lar hyu jum dar hăng bruă rơmet agaih jum dar hmua.

Mông ngă yang ping ia lĕ gru grua hiam klă mơng djuai ania M’nông ƀơi Buôn Đôn, Dak Lak

Mơnuih djuai ania M’nông pơmĭn tui anai, tơdah ƀing gơñu sua mă lŏn glai “Anai lĕ kual lŏn kŏm” amra ƀuh čim brim, kuih prŏ phă pơrai pơdai kơtor mơtăm. Mơnuih djuai ania M’nông juăt lăi: “Glai rưng lĕ bơbung sang kiăng pơging, pơgang brơi, glai rưng ăt lĕ anih dŏ kơ yang rơbang mơ̆ mơnuih djuai ania M’nông dưi kơwưh đĭ yang rơbang gum djru lơ̆m bưp tơnap tap amăng tơlơi hơdip mơda”. Amĭ Njran, dŏ ƀơi să Ea Huar, tơring glông Buôn Đôn, tơring čar Dak Lak brơi thâo: mơnuih djuai ania M’nông lêng kơ ngă tui tơlơi pơkă dŏ djă pioh mơng đưm đă ră hlâo, tơdah kiăng tơjŭ pla amăng đang hmua ƀing gơñu khŏm wai pơgang glai rưng hăng hnoh ia. Anai lĕ gru grua sui mơng đưm hlâo, đang hmua ƀơi anai tơjŭ pla sui hloh kơnong 4 thun đôč, tơdơi anun jing ksor laih. Tơdah kiăng nao ngă hmua pơkŏn dong, sang anŏ ăt kiăng pơčrông sai hlâo mơn.

“Giăm 4 thun kah pơwŏt glăi ngă hmua ƀơi ksor hơđăp, mơ̆ ƀu jong jơnah jah glai răm ƀăm ôh. Anai lĕ tơlơi phiăn mơng ơi yă đưm đă ră hlâo adih, yua anun ră anai mơnuih ƀon sang ăt ngă tui kar kăi mơn, truh rơnuk ƀing gơmơi ră anai ăt pơtă pơtăn brơi kơ ană tơčô thâo hăng ngă tui, kiăng djă pioh tơlơi anai”.

Tui hăng tơlơi găn rơgao mơng đưm hlâo mơng djuai ania M’nông, ruah lŏn ngă hmua brơi giăm ia krông čroh hnoh. Bruă anai ƀu djơ̆ kơnong kiăng phun pla hiam đôč ôh mơ̆, ăt kiăng gêh gal brơi sang anŏ bơwih ƀong lơ̆m nao ngă hmua anun lĕ hơmâo ia yua lơ̆m tơnă hơbai. Mơng anun, mơnuih djuai ania M’nông hơmâo pin ia. Hơdôm pin ia pơ hmua anai juăt giăm phun kyâo pơprong, anai lĕ ha bơnah ƀu kơƀah amăng tơlơi hơdip mơda kơ djuai ania M’nông. Ơi Che Đen, tha plơi dŏ ƀơi să Ea Huar, tơring glông Buôn Đôn, tơring čar Dak Lak brơi thâo: “Ping ia pơ hmua” lĕ anih mơyang, yua anun ƀing gơñu khŏm wai lăng, abih bang mơnuih kiăng ngă tui djơ̆ tơlơi pơkă mơng plơi pla.

“Pin ia kar hăng akŏ phun kơ tơlơi hơdip, bruă ngă hmua ăt kiăng hơmâo ia mơn, thŏng bok tơdah kiăng tơma ăt kiăng hơmâo ia kah mơng dưi asah. Bruă wai pơgang, ơi yă đưm hlâo ăt pơtă pơtăn kơ ană tơčô kiăng kơđiăng wai pơgang hnoh ia, kiăng wai pơgang glai rưng yua glai hăng akŏ ia amra pơhlôm brơi tơlơi hơdip kơ ană plơi pla”.

Hrŏm hăng bruă pơđĭ kyar bruă bơwih ƀong huă, gru grua hơdip tui sô hơđăp mơng djuai ania M’nông glăk ƀơƀrư̆ pơplih. Samơ̆ tơlơi pơmĭn amăng wai pơgang lŏn mơnai glai rưng mơng djuai anai M’nông ăt dŏ djă pioh mơn, sa, dua hrơi ngă yang bơdjơ̆ nao bruă wai pơgang glai rưng ăt dŏ pơphun, tơdơi sa bơyan yuă hơpuă, djop plơi pla amra pơphun hrơi ngă yang anun lĕ: Ngă yang pin ia, ngă yang tơjŭ pla, ƀong asơi hle…mơng hrơi ngă yang, amra ƀuh ơi yă hơmâo djă pioh glăi tơlơi phiăn hăng pơtă pơtăn ană tơčô khŏm wai pơgang lŏn mơnai glai rưng brơi klă hloh.