VOV4. Jarai - Ơi pang, yă dôn hăng ƀing gơyut khăp! Mơng đưm đă ră hlâo, tui gru grua sô hơđăp mơng dêh čar Việt Nam hrơi ngă yang Tịch điền (ƀudah hrơi trun ngă hmua pơdai ia. Hrŏm hăng bruă pơphun tơjŭ pla, Khua mir sir Hồ Chí Minh ăt nao ngă yang Tịch điền hrŏm mơn; wa Hồ trun ngă hmua pơdai ia hrŏm hăng neh met wa. Thun 2009, tơdơi kơ giăm 100 thun lui hĭ pơphun, hrơi ngă yang Tịch điền sit nik hơkrŭ glăi ƀơi să Đọi Sơn, tơring glông Duy Tiên, tơring čar Hà Nam. Mơng anun truh ră anai, rĭm thun, truh bơyan anai, Khua mua Ping gah hăng Kơnuk kơna lêng kơ nao ngă yang Tịch điền, trun ngă hmua pơdai ia hrŏm hăng mơnuih ƀon sang.

Jơnum ngui Tịch điền Đọi Sơn thun anai dưi pơphun amăng 3 hrơi, mơng lơ 5 truh lơ 7 blan sa thun Nhâm Dần. Amăng anun, lơ 5 hăng lơ 6 blan sa blan di pơphun hơdôm phiăn ngă yang kah hăng ngă Yang lăi pơthâo, ngă Yang pơpŭ ia đĭ hăng dlông Đàn tế, ngă yang Sái tịnh, ngă Yang rơkâo tơlơi rơnuk rơnua ƀơi sang phơ̆t Đọi Sơn... Lơ 7 blan sa blan di lĕ jơnum phun. Tơdơi kơ ngă yang pok phun, grŭp pơphun bruă lăi pơthâo hăng jao hră bơni kơ hơdôm bôh să djơ̆ hăng tơhnal pơkă plơi pla phrâo tui gru phrâo tơring čar Hà Nam thun 2021. Kiăng pơhlôm bruă pơgang, pơgăn klin Covid-19, hơdôm bruă mă amăng črăn Jơnum ngui thun anai dưi ngă rơguăt hĭ; kơnong kơ pơphun Jơnum pơplông kač rŭp, pơhrôp kơbao; pơdă prưng mơng Jơnum ngui djop mơta ra mơnong plơi prong, pơdă prưng hơdôm gơnam lăi pơthâo gơnam mă mơng đang hmua, gơnam pơkra hăng tơngan ƀuh klă hloh mơng plơi prong.

Hrơi ngă yang Tịch điền Đọi Sơn arăng lăng lĕ hrơi trun ngă hmua pơdai ia prong hloh ƀơi kual Kơdư. Hơmâo pơphun rĭm thun amăng bơyan čơkă thun phrâo, anai lĕ hrơi ngă yang yôm phăn, pơgôp pơtrut pơsur ngă hmua hăng pơdah pran pơpŭ bơni kơ ơi yă lĕ mơnuih čong jơnah jah glai đưm hlâo adih, anai ăt kiăng pơdah pran hơdip jê̆ giăm hăng mơnuih ƀon sang, pơpŭ kơ bruă ngă hmua. Thun 2022 lĕ tal hơdor glăi 1.35 thun hrơi ơi pơtao Lê Đại Thành pơphun hrơi ngă yang trun ngă hmua pơdai ia Tịch Điền ƀơi hmua pơdai ia giăm tơkai čư̆ Đọi Sơn (ră anai lĕ să Tiên Sơn, plơi prong Duy Tiên). Anai ăt lĕ thun tal 13 hrơi ngă yang anai hơmâo gong gai ƀon lan pơphun. Kiăng kơ hrơi ngă yang ba glăi tŭ yua hăng tơlơi yôm sit nik. Khul pơphun hơmâo pơpha bruă tong ten brơi hơdôm anom bruă bơdjơ̆ nao; pơsur ƀing khua mua hăng tuai pơčrang lăng klin Covid-19 hlâo kơ mut nao ngui; prap lui anih pơčrang hăng mrô QR Code kiăng kơ pơhlôm pơgang klin. /.

Siu H’Prăk - Siu Đoan: Pơblang