VOV4.Jarai  – Ơi pang, yă dôn hăng ƀing gơyut khăp! Ngă lơphet tơglưh trun gŏng drai, juăt hmâo arăng pơphun amăng čơtlăm lơ 7/1 blan di kiăng pơđut hơdôm hrơi pơdơi tết. Tui phiăn juăt đưm, phun gŏng drai hrơi Tết amra dưi mă yua ƀơi anăp sang mơng lơ 23 blan 12 blan di, ƀudah kaih hloh lĕ pơdŏng amăng lơ 30 Tết. Phun kram pơkra gŏng drai dlông mơng 5-6m dưi dor kơjăp, hăng dlông tơdŭ gŏng gai yôl sa guang wil anet hăng yôl đĭ lu gơnam mă yua hmâo tơhnal kiăng lăi nao tui hluai kơ plơi pla, phiăn juăt, djuai ania. Hmâo mơnuih arăng yôl sa čơnăt hla dứa, khung kram djrao tep nao hla pơ-ar mơtah mriah, hla pơ-ar pơgang atâo rŭp ƀát quái, hla pơ-ar pioh čuh kơ atâo, tơlơi pia ƀudah rŭp hlô mơnong man hăng lŏn... Hmâo anih đa lĕ yua kơdung anet dưm hla mlu bôh kâo hăng đing djrao, bôh teng leng, hơdôm tơkhla pơsơi pơsă anet prong, hla ƀrah, blâo mơnŭ, hơbơi tỏi. Lom hmâo angin pưh, hơdôm gơnam yôl amra mơñi teng leng. Ƀơi yŭ phun gŏng drai hmâo pruai nao tơpung hăng kač rŭp amrom.

Tơdơi kơ hơdôm hrơi čơkă thun phrâo mơ-ak, truh hrơi tal 7, djop sang anŏ lêng kơ ruh hĭ phun drai. Hlâo kơ ruh hĭ phun drai, pô sang dưm sa boh kơƀang anet, pơdă sa jam boh mơkai, tŭi ñang, dưm bơnga … ƀơi phun drai, kiăng kơ lăi pơthâo yang rơbang lĕ sang anŏ ƀong tết mơ-ak mơ-ai mơn. Tơdơi anun, arăng pơyuh phun drai drơi kơ hlung abih hla krô laih anun ruh hĭ phun drai hăng ba boh tơphă tol ƀơi bah amăng sang. hăng hơdôm sang anŏ sĭ mơdrô gơnam tam, amăng hrơi tal 7, ƀing gơñu čuh tơbiă, ƀong huă prong kiăng kơ rơkâo sa thun sĭ mơdrô, bơwih ƀong huă gêh gal. Rup rap phun drai amăng hơdôm hrơi ƀong tết djă pioh glăi na nao amăng hơdôm boh pia djuai ania Việt Nam ta anun lĕ “Thịt mơ̆, dưa hành, câu đối đỏ/Cây nêu, tràng pháo, bánh chưng xanh”.

Hăng bôh yôm phăn mơng hrơi ngă Yang bơni, anun hrơi ngă Yang bơni dưi lăng lĕ sa tơlơi “Tết” – Tết tơglưh gŏng drai. Ñu yôm phăn ƀu pha mơn hăng mông ngă Yang čơkă thun phrâo. Yua anun, hlâo kơ tuĭ ñang ngă Yang bơni, ƀing arăng đưm ăt hmâo čuh mlăi mơ-ak mơn. Lu sang anô̆ hmâo tơlơi kơđiăng dô̆ hmâo wot ngă yang gah rơngiao dong. Hlâo kơ tơglưh gŏng drai abih bang gơnam ngă yang amăng sa tal abih sa rơwang hrơi tơjuh lĕ, blung hlâo khom čuh prăk mah. Rim tơlơi ngă yang mah, prăk leng kơ čuh tui hơdră akô̆ tlôn: Kơ yang rơbang hlâo, kơ ơi yă tơdơi – mơng hơdôm pô nao hlâo truh kơ pô tơdơi. Hlâo kơ tơglưh trun rim tơlơi ngă yang tui anun, pô sang leng kơ pơđok tơlơi phai yang. Lom ngă yang tơglưh gŏng drai, hơdôm bôh sang anô̆ prăp lui: Čơangua asơi añăm ngă yang, amra yua asơi añăm hla rok ƀudah añăm hlô leng kơ dưi sôh. Ia jâu, ia tơpai, ñang, bơnga, bôh troh jam braih, jam hra. Prăk mah hla pơ-ar, tơlơi phai. Pơdă djop tum hăng pơhlôm abih bang gah rơngiao sang, pô sang pơphun tuĭ ñang, hơduah yang ơi yă amăng sang hlâo, tơdơi kơ anun mơng pơphun ngă yang gah rơngiao sang./.

Siu H’Prăk - Siu Đoan: Pơblang