VOV4.Jarai - Tơlơi phiăn pơtruh ngă giăng mah ƀơi dêh čar ta hơmâo mơng đưm hlâo laih, pơtruh brơi 2 čô mơnuih ƀu djơ̆ sa drah kơtăk, ƀu djơ̆ kơnung djuai jing ngă adơi ayong pô. Mơnuih djuai ania M’nông ƀơi Dak Lăk ăt pơtruh ngă adơi ayong mơn, samơ̆ ƀu kơnong pơtruh brơi 2 čô đôč ôh mơ̆, wơ̆t 2 boh sang ƀu djơ̆ kơnung djuai ôh samơ̆ jing kơnung djuai, adơi ayong sa kian pruăi, hrơi ngă yang pơtruh adơi ayong hơmâo gơnam pơyơr kơ yang, hơmâo pơphun prong.

Amăng sang ơi Y Thiên Cil, djuai ania M’nông, ƀơi ƀuôn Jiê Yuk, să Dăk Phơi, tơring glông Lăk, tơring čar Dak Lăk, jua čing bor mơñi, hrŏm hăng đok pô phai yang hmit tơdu hmit kơtang, iâu yang rơbang rai mơñum ƀong. Hrơi anai, sang anŏ ơi Y Thiên Cil ngă yang pơtruh giăng mah adơi ayong hăng sang anŏ ơi Y Nam Pan Ting hrŏm ha boh plơi. Anai jing gơyut gơyâo juăt biă mă, jê̆ giăm mơng hlâo laih. yua kiăng jê̆ giăm hloh dong, kiăng ngă adơi ayong sa drah kơtăk, sa kơnung djuai, anun jing gơñu ngă yang pơtruh adơi ayong.

Gơnam ngă yang hơmâo prăl lui laih, hơmâo mơnong un, asơi điơ̆, pơtơi tơsă, boh mơnŭ, sa drơi mơnŭ hơdip, 2 boh kông rơnil, 2 arăt añŭ. Hơdôm mơta gơnam anai hơmâo dưm ƀơi anăp dua rơkơi bơnai 2 čô pơtruh ngă adơi ayong. Pô phai lĕ tha plơi Y Krai Cil. Ñu anăp nao ƀô̆ ñu gah ngŏ, anăp nao dua čô pơtruh adơi ayong, laih anun phai yang amăng jua čing mơñi dik dak. Tha plơi Y Krai Cil lăi:

“Hrơi anai, 2 ayong adơi ngă yang pơtruh ngă giăng mah jing adơi ayong pô yơh. Gơñu thâo mơng hlâo laih. Kâo pô gơgrong ngă brơi yang kiăng dua adơi ayong ñu hiam drơi jăn pran jua, lăng nao rai kar hăng adơi ayong ha amĭ. Tơdơi anai, pô anai bưp tơnap tap lĕ pô adih djru brơi, ƀu dưi pơklaih lui ôh”.

Pô phai ngă yang kơ rơkơi bơnai 2 čô hơmâo pơtruh adơi ayong.

Tơlơi ngă yang hơmâo 5 mơta tơlơi mơn, 2 tơlơi ngă yang phun anun lĕ ngă yang hiam drơi, lăi pơthâo hăng yang rơbang kơ bruă pơtruh nao rai 2 boh sang laih anun ngă yang huă asơi hrŏm mơng dua boh sang. Blung a, pô phai mă mơnŭ ông dŏ hơdip pioh nao pơ čeh tơpai, añrŭ tơkai mơnŭ amăng čeh tơpai laih anun pik nao ƀơi thơi rơkơi bơnai 2 čô pô pơtruh ngă giăng mah anun 7 wơ̆t, pik rah phai rah yang, iâu yang rơbang, ơi yă glăi lăng, djru brơi dua boh sang pơtruh ngă adơi ayong anai. Tŏ tui, pô phai yang buč 8 arăt blâo ačăng mơnŭ ngă yang brơi mơng ha čô mơng ha čô, giong anun hlă ƀơi amăng tơngia dua čô đah rơkơi anun laih anun atem ƀơi ƀuk 2 čô bơnai pô pơtruh. Mă kông rơnil buh brơi 2 adơi ayong, laih anun buh brơi 2 ară añŭ ƀơi tơkuai bơnai ƀing anai. Anai jing gơnam pơsit brơi hơmâo yang wai lăng, hiam drơi jăn, tơlơi khăp ƀu-eng kơjăp hloh kơplah wah dua boh sang.

Pô phai atĕm blâo mơnŭ, buh kông, buh añŭ kơ pô hơmâo pơtruh.

Tơlơi ngă yang tŏ tui dong lĕ huă asơi hrŏm. Pô phai jur ia tơpai čeh amăng 4 boh kơčok, brơi 4 čô rơkơi bơnai pơkoel tơngan mơñum abih mơtăm. Giong mơng anun, ñu mă asơi điơ̆, mơnong, boh mơnŭ hăng boh pơtơi brơi kơ 2 boh sang, ƀong hrŏm, brơi adơi ayong ñu pơčem nao rai. Tơlơi anai pơƀuh tơlơi khăp ƀu-eng, pơpha gơnam ƀong jơman mơng dua ayong adơi hăng 2 boh sang anŏ ƀing ñu.

Amăng mông ngă yang, čing bor hơmâo arăng atông na nao, tơdăm dra suang hơ-ơč kơ dua boh sang ngă yang pơtruh giăng mah. Mơng anai, gơñu jing adơi ayong sa boh sang, kar hăng adơi ayong ha amĭ laih. Ơi Y Nam Pan Ting, pô pơtruh adơi ayong hăng pô sang lăi:“Pơtruh ngă adơi ayong giăng mah baih jing adơi ayong ha amĭ, sa kơnung sa djuai yơh. Pơtruh ngă adơi ayong baih jing tơdơi anai sang anŏ kâo hăng gơyut kâo lĕ Y Thiên amra jê̆ giăm hloh, djru nao rai lơ̆m tơnap tap. Bưp tơlơi tơnap tap gơmơi amra pơdjru nao rai, yua dah mơnuih djuai ania M’nông gơmơi, iâu giăng mah lĕ ta khŏm thâo pơpŭ nao rai, gum djru nao rai lu hloh”.

2 boh sang ngă adơi ayong ƀong asơi hrŏm anun lĕ asơi điơ̆, mơnong un, boh mơnŭ hăng boh pơtơi.

Pơđut tơlơi ngă yang, abih bang mơnuih mơñum tơpai čeh, ayun suang, ră ruai laih anun pơkhek hrŏm hăng pô pơtruh ngă adơi, hơ-ơč kơ dua gơñu thâo khăp ƀu-eng kơjăp. Tơdơi kơ ngă yang pơ sang ơi Y Thiên Cil, sui mơng anun dong, hơmâo ngă yang pơ sang ơi Y Nam Pan Ting dong.

Nao pơhmư̆ hrơi ngă yang, ƀuh hơdôm tơlơi ngă yang, hok mơ-ak ayun suang hơ-ơč kơ pô sang, amai H’Lang Cil, dŏ ƀơi ƀuôn Jiê Yuk, să Dak Phơi, tơring glông Lăk brơi thâo:

“Anai jing tal blung a kâo ƀuh tơlơi ngă yang pơtruh adơi ayong giăng mah tui anai, kâo lăng ñu yôm biă mă hăng djuai ania gơmơi. Jing sa čô mơnuih hlăk ai dŏ hơdip amăng plơi, kâo amra pơtrut tui gru grua, djă pioh glăi kơ rơnuk tơdơi kiăng abih bang thâo gru grua hiam mơng djuai ania M’nông gơmơi”.

Pơđut tơlơi ngă yang, abih bang mơñum tơpai, ayun suang, atông čing mơ-ak hrŏm hăng pô sang.

Ăt kar hăng lu phung djuai ƀiă ƀơi kual Dap Kơdư mơn, ngă yang pơtruh adơi ayong giăng mah jing tơlơi ngă yang hơmâo mơng đưm hlâo laih, hơmâo djuai ania M’nông ƀơi Dak Lăk djă pioh amăng lu rơnuk. Tơdah tui hăng djuai ania Êđê, kơnong pơtruh adơi ayong pô sa kơnung djuai ƀudah kơnung djuai jê̆ giăm đôč lĕ, mơnuih djuai ania M’nông pơtruh adơi ayong hăng pô ƀu djơ̆ kơnung djuai hơget ôh, ƀu djơ̆ rui ra hơget lơi. Bruă pơtruh anai kiăo tui pran jua ta khăp, ƀu hơmâo pô pơgô̆ ôh, jing gru hiam mơng djuai ania M’nông, ngă kơjăp tui pran jua thâo gum pơgôp, djru nao rai tơdruă amăng plơi pla.

H’Xíu: Čih - Siu H’Mai: Pơblang