VOV4.Jarai-Hăng akŏ pơ anăn “Khom hơdip mơda hăng čang rơmang”, Hrơi pơtưh Việt Nam tal 20 ƀơi Dak Lak pơphun jơnum mơ̆ng lơ 15 truh lơ 17/2/2022, ƀơi jơlan Đường Sách-kơphê Ƀuôn Ma Thuôt. Hơdră anai yua kơ Sang bruă Khul pơčeh tơlơi hơ̆k hơr adoh suang tơring čar Dak Lak ngă hrom Gơnong bruă gru grua Pơrơguăt drơi jăn hăng Tuai čuă ngui pơphun hrom hăng lu bruă mă mơak, yôm biă mă djă jă gru grua djop djuai ania ƀơi tơring čar.

Pok pơhai hơdră adoh suang lĕ atông čing hăng ngă tui hơdră djă đing mơñum tơpai čeh mơ̆ng djuai ania Êđê, Hrơi pơtưh Việt Nam tal 20 ƀơi Dak Lak pơhưč lu tuai nao ĕp lăng. Amăng anih pok pơhai ƀơi Jơlan Đường Sách-kơphê Ƀuôn Ma Thuôt, ƀing tuai dŏ lăng lu hơdră tơlơi adoh suang, tơlơi bơ ră ruai pơčeh phrâo hơ̆k hơr, hơmâo tom atông čing, atông tơrưng pĕ gông djuai ania ƀiă, hri tơlơi pơtưh, juăt lăi ngâm thơ, pơđok tơlơi pơtưh yŭ mơak hăng lu tơlơi ngui ngor hơduah ĕp tơlơi thâo thăi gru grua kah hăng kač rup mơnuih, trah kyâo ngă rup, rơkâo boh hră hiam gru đưm, pơdă rup hiam, rup djă pioh gru grua...Amai Linh Nga Niê Kdăm, dŏ ƀơi plơi prong Ƀuôn Ma Thuôt, lăi:

“Amăng tal klin kheng covid kơtang djơh hăng anai, ta dưi pơphun tơlơi ngui ngor anai hiam mơak biă mă, pơdah thâo lu mơta tơlơi hăng ngă lu bruă hơ̆k hơr mơak pran gru grua hiam. Čang rơmang hơdôm hrơi anai, hơmâo dơ̆ng lu gơyut gơyâo hlăk ai khăp kơ tơlơi pơtưh, tơlơi pơčeh čih ră ruai hơ̆k hơr, hor kơ bruă pơđok hră mơ̆ng djuai ania Việt ta pơphun glăi kah hăng hlâo".

Hơdră jơnum pok pơhai tơlơi pơtưh amăng Hrơi Pơtưh Việt Nam ƀơi Dak Lak

Boh nik ñu, amăng hrơi pok jơnum Hrơi pơtưh Việt Nam ƀơi Dak Lak arăng akhan hri sa črăn ber tơlơi akhan hri Mdrong Dam, ră ruai kơ sa čô mơnuih hing  ang khin hơtai djuai ania Êđê đưm đă. Anai lĕ tal blung a djuai akhan hri anai đĭ pơdah ƀơi tơrưng adoh suang prong, pơdah amăng anih pioh kơ gru grua mơak ƀơi Ƀuôn Ma Thuôt. Mơnuih kơhnăk adoh suang nghệ sĩ ưu tú Vũ Lân, mơnuih kơsem min gru grua adoh suang đưm kual Dap Kơdư lăi, bruă ba tơlơi akhan hri hrom hơdră pơdah gru grua mơak anai jai pơjing rai anŏ hiam yôm phara, kơnong kual Dap Kơdư đôč hơmâo amăng mông pơdah tơlơi pơtưh mơ̆ng Lŏn ia ta.

“Kâo ƀuh mơak biă mă lĕ hơmâo lăi pơthâo Tơlơi akhan hri, jing akhan rah adoh rah arăng lăi lĕ hri mơ̆ng djuai ania Êđê lăi Khan. Sit mơ̆n kiăng lăi anun kah hăng thơ jing tơlơi pơtưh mơ̆ng Kual Dap Kơdư, yua akhan hăng tơlơi pơtưh hri rah mơ̆ng phun truh pơ tơdŭ, biă mă ia rơgơi tơlơi kơhnâo pơtưh, pơjing rai er hri hmư̆ mơak biă mă, thâo boh yôm phun tơlơi pơtưh dơ̆ng jai kraih mơak. Tơlơi anun yơh hiam mơak biă mă”.

Hơdră adoh suang mơak hăng lu jơlan hơdră hiam mơak djă gru kual Dap Kơdư

Hăng akŏ tal Jơnum “Khom hơdip mơda hăng čang rơmang”, hơdră pơdah hrơi pơtưh anai dŏ hơmâo boh yôm phun kiăng pia, ba lu tơlơi bơngač hiam kah hăng trah rup kyâo pioh juă nua sĭ, mă prăk anun pơkôm hrom keh prăk djru mơnuih ƀun rin duăm ruă, hơdră pok pơhai tơlơi pơtưh mơ-it tơlơi kiăng kơ adoh hri bơni pơtưh hiam hăng tơlơi hơdip mơda hiam klă. Niê Thanh Niê, Khua Khul mơnuih čih pơčeh hơ̆k hơr adoh suang tơring čar Dak Lak brơi thâo, hơdră amra pơphun sui truh lơ 17/2 hăng čang rơmang tơlơi bang hyu mơ̆ng ñu, pơbuă tui pran jua khăp kơ tơlơi hơ̆k hơr adoh suang pơčeh ia rơgơi tơlơi thâo gru grua truh pơ mơnuih ƀôn sang.

“Ƀing gơmơi čang rơmang lĕ hrơi jơnum mơak anai pioh kơ abih bang mơnuih khăp kơ tơlơi pơtưh, adoh suang, yua kơ anun hơdră anai hơmâo anŏ yôm hăng ba gru grua hiam kual Dap Kơdư pioh pơdah. Amăng hơdră pơdah adoh suang mơmŏt anăng “Hơdip mơda hăng čang rơmang” ƀing gơmơi amra hơmâo lu tơlơi  adoh kơ kual Dap Kơdư hing ang đưm, mơnuih pơčeh tơlơi pơtưh hăng tơlơi kiăng, tơlơi pơtưh hăng bơyan phang bơnga čuh hrom hăng lu tơlơi čang rơmang phrâo hiam pioh mơ-it nao kơ ƀing gơyut hăng mơnuih ƀôn sang lăng ngă mơak amăng pran jua truh pơ abih bang mơnuih khăp kơ tơlơi pơtưh”.

H’Xíu pô čih-Nay Jek : Pơblang