Grup atông čing hơdor, pĕ gông brô̆ hơmâo 9 čô ding kơna, đa mơnuih lĕ ngă nai ia jrao, đa lĕ ƀing apăn bruă amăng Khul hlăk ai kah hăng ƀing apăn bruă gru grua amăng să….Samơ̆ ƀing gơñu lêng kơ hor atông gông brô̆ mơng djuai ania Jarai. Amai Rmah H’Dịu, thun tơkeng 1996, hlâo adih lĕ Khua khul hlăk ai rơnuk Hồ Chí Minh să Ia Kriêng, tơring glông Đức Cơ, tơring čar Gia Lai; yua kơ hor atông đing klông put đơi yua anun ñu mut hrŏm grup atông gông brô̆ kual Dap kơdư.

“Kâo ƀuh hơdôm boh gông brô̆ mơng djuai ania Jrai hơmâo lu anŏ phara, mơ̆ ăt hơmâo anŏ hrup hăng djuai ania pơkŏn mơn. Hăng mơnuih djuai ania Jarai gơmơi juăt pơphun hơdôm hrơi ngă yang rơbang, hrơi huăi asơi hle…Amăng hơdôm hrơi ngă yang anai, ƀing gơmơi juăt atông čing hơgor, t’rưng… anai lĕ gru grua yôm phara mơng djuai ania Jarai gơmơi. Mơng blung hlâo mut hrŏm grup, kâo pô ăt kiăo tui hrăm ƀing adơi, ƀing amai, mah truh ră anai aka ƀu dưi lăi atông mơ-ak laih, samơ̆ kâo pô ăt gir run dong rĭm hrơi”.

Rơngiao kơ bruă pơtop hrăm prap lui, nao ngui adôh suang, ƀing ding kơna amăng grup atông gông brô̆ kual Dap kơdư ăt pơkra hơdôm boh gông brô̆ mơng kram, djrao, pơtâo…Tơdơi kơ 2 thun akŏ pơjing, grup hơmâo pơkra rai giăm 30 boh gông brô̆ djuai ania Jarai, pioh atông ngui rah hăng sĭ hơmâo prăk pơhrui dong.

Anŏ yôm phara amăng mông ngui atông gông brô̆ mơng grup kual Dap kơdư lĕ yua hơdôm boh gông brô̆ djuai ania kiăng atông hơdôm tơlơi adôh phrâo pơhưč ƀing hlăk ai čơđai. Ƀudah yua hơdôm boh gông brô̆ phrâo pĕ adôh tui hơdôm tơlơi adôh đưm mơng djuai ania Jarai dong. Ayong Rơ Châm Vỹ, ding kơna amăng grup brơi thâo:

“Yua kơ bruă atông gông brô̆ pơđăm amăng kơtăk drah, yua anun ƀing gơmơi tŭ ư akŏ pơjing grup atông gông brô̆ hăng ƀing gơmơi gir run pơhrăm tui dong hơdôm boh gông brô̆ mơng djuai ania Jarai, laih dong hrăm atông hơdôm tơlơi adôh đưm mơng djuai ania Jarai gơmơi, hăng sa, dua tơlơi adôh mơng wa Jin, kah hăng hơdôm tơlơi adôh khan hri pơmut hrŏm hăng t’rưng, gong, čing pơtâo…ngă anih ngui atông čing hơgor dưi lar hyu djop kual čư siăng kriang pơtâo, ăt kah hăng ngă hơdôm tơlơi adôh suang jai hrơi mơ-ak tui”.

Hăng hơdôm mông atông gông brô̆ pơplih pơčeh phrâo, hơdeč hmar, grup atông gông brô̆ kual Dap kơdư hơmâo pơhưč lu mơnuih hor hmư̆ mơng djop hnưr. Grup juăt hơmâo arăng jak iâu nao atông gông brô̆ amăng hơdôm hrơi ngui ngor mơ-ak amăng ƀon lan, anai lĕ hơdôm hrơi pioh hơdor hrơi akŏ pơdong anom bruă; atông amăng hrơi pơdô̆ rơkơi bơnai, đĭ dŏ sang phrâo. Ơi Rơ Châm Djơk, mơnuih dŏ hơdip amăng tơring kual Chư Ty, tơring glông Đức Cơ, tơring čar Gia Lai brơi thâo:

“Kâo grup atông gông brô̆ kual Dap kơdư ngui pĕ gông brô̆, atông čing hơgor djuai ania lêng pơdah tơlơi jê̆ giăm, jua mơñi mơng glai rưng, pơđŏm glăi anŏ yôm phara mơng djuai ania, yua anai lĕ gơnam pơčeh rai, pơtop hrăm hlâo kơ nao ngui adôh suang, anai lĕ anŏ pơmut hrŏm kơplah wah hơdôm tơlơi adôh đưm hlâo mơng djuai ania Jarai hrŏm hăng tơlơi adôh phrâo, tơlơi anai pơdah tơlơi pơplih phrâo, ngă lu mơnuih hmư̆ mơ-ak”.

Bơ tui hăng ơi Nguyễn Vũ Hiền - Khua anom bruă gru grua, pôr pơhing hăng bơrơguăt drơi jăn tơring glông Đức Cơ brơi thâo:

“Tui tơlơi hơdip ră anai hơmâo lu gông brô̆ phrâo, grup atông gông brô̆ hơmâo pel ĕp, pơčeh rai lu gông brô̆ mơng djuai ania pô, yua hơdôm boh gông brô̆ anai kiăng lăi pơthâo rup rap, gru grua yôm phara mơng djuai ania Jarai hăng ƀing hlăk ai amăng tơring glông, tơring čar Gia Lai. Grup hơmâo gir run ba hyu ngui, lăi pơthâo hơdôm boh gông brô̆ djuai ania brơi ƀing hlăk ai ƀuh”.

Ayong Rơ Châm Khánh, dŏ amăng tơring kual Chư Ty, tơring glông Đức Cơ, ñu lĕ mơnuih ngă akŏ amăng grup pĕ gông brô̆ kual Dap kơdư, ñu brơi thâo: mah ră anai, grup hơmâo lu mơnuih thâo krăn, hơmâo jak iâu nao ngui adôh suang lu anih, samơ̆ dŏ lu tơlơi tơnap tap dong pơ anăp. Yua prăk pơhrui tơdơi kơ rĭm wŏt hyu ngui atông kơnong djop brơi kơ bruă mă yua đôč. Amăng hrơi blan laih rơgao, ƀing ding kơna amăng grup lêng kơ gir run pơ alum pran jua tơdruă hluai tui pran hor, kiăng tŏ tui lăi pơthâo, ba tơlơi adôh suang hăng gông brô̆ yôm phara mơng djuai ania Jarai brơi abih bang mơnuih thâo. Ayong Rơ Châm Khánh brơi thâo:

“Kâo čang rơmang grup atông gông brô̆ dưi pơđĭ kyar ƀiă dong, kiăng dưi hyu atông ngui ngor amăng tơring glông, tơring čar, gơnong glông kah hăng ataih ƀiă dong lĕ pơ tač rơngiao. Ƀing adơi ayong gơmơi glăk pơhrăm nao rai, yua rơngiao kơ tơlơi hor ăt kiăng ĕp prăk dong, kiăng hơmâo prăk pơhrui brơi adơi ayong. Amăng thun 2024 anai, ƀing gơmơi glăk anăp nao pơđĭ kyar kơtang ƀiă dong, kiăng lu mơnuih thâo. Kâo pô ăt čang rơmang adơi ayong gir run djă pioh hăng tŏ tui”.

Hăng pran hor, thâo pơčeh phrâo, ƀing hlăk ai ƀơi tơring glông Đức Cơ hơmâo ĕp jơlan yak nao phara kiăng djă pioh hăng ba gông brô̆ djuai ania Jarai mut hrŏm hơdôm boh gông brô̆ hăng tơlơi adôh phrâo ră anai./.