Amăng anun, tơring čar Gia Lai ăt dŏ djă pioh 4.500 ring čing, lu hloh amăng 5 boh tơring čar kual Dap kơdư. Gơnong bruă gru grua tơring čar Gia Lai pơsit tong, djă pioh hăng lăi pơthâo gru grua čing hơgor lĕ bruă kiăng tŏ tui na nao, jing tơlơi kiăng sit nik mơng djuai ania Bahnar, Jrai, ngă gru grua yôm phara čing hơgor pơđĭ kyar, tui hăng hơnong pơkă pơđĭ kyar bơwih ƀong huă – mơnuih mơnam, sit biă ñu lĕ pơtrut pơđĭ kyar bơwih brơi tuai čuă ngui amăng tơring čar. Thun 2022, Akŏ bruă djă pioh hăng pơđĭ kyar gru grua čing hơgor kual Dap kơdư tơring čar Gia Lai rơ wang thun 2021-2025 hơmâo gơnong bruă gru grua-bơrơguăt drơi jăn hăng tuai čuă ngui mơ-it đĭ Jơnum min mơnuih ƀon sang tơring čar sem lăng, tŭ yap. Tui anun, lu boh tơhnal tong ten kơ bruă jao, hơdră sit nik hơmâo ba tơbiă. Ơi Kpă Chóe, dŏ ƀơi plơi Pel A, să Ia Sol, tơring glông Phú Thiện, sa čô mơnuih hor hăng pơ-ư ang biă mă kơ gru grua čing hơgor mờn djuai ania pô, ñu brơi thâo:

“Čing hơgor hơmâo mơng đưm hlâo yơh, mơng rơnuk ơi yă đưm hlâo pioh glăi. Ñu pơlir amăng tơlơi hơdip, gru grua mơnuih djuai ania Jrai, anai lĕ gru grua ƀu kơ ƀah ôh hăng ƀing gơmơi yua anun ƀing gơmơi lăng yôm biă mă. Jua čing hơgor atông amăng hơdôm hrơi tlâ̆o kơbao ƀudah mơyut jôk… anai lĕ tơlơi pơ-ư ang mơng djuai anai Jrai ƀing gơmơi. Čang rơmang rơnuk tơdơi anai amra gir run djă pioh hăng lăi pơthâo gru grua yôm anai, anăm brơi rơngiă ôh”.

Hăng tơlơi pơmin pơgang gru grua bôh thâo djuai ania K’ho, ơi K’Đức Tuấn ƀơi să Tà Nung, gah kơtuai plơi prong Đà Lạt, tơring čar Lâm Đồng hmâo pơplih ha mơkrah ektar đang kơ phê pioh pơdŏng sa anih anom tuai čuă ngui dlai tlô – bôh thâo lăp djă pioh. Anai lĕ anih pơdơi tơkai klă hloh kơ tuai ƀơi jơlan mơng Jơlan mrô 27 nao Đà Lạt, găn jơlan 725 mơng tơring čar Lâm Đồng. Mơng hăng dlông kơdư, tuai čuă ngui hơdơ̆ hor lăng hyu plơi pla djuai ania K’ho plah nao rai kơplah wah hơdôm blah đang kơ phê. Taih hloh lĕ hơdôm kơdư kyâu hngô tăm suĭt, ñem pô trun amăng čroh ia Camly đưm. Ơi K’ Đức Tuấn – pô mơng anih anom tuai čuă ngui anai brơi thâo, anô̆ pha ra hloh ƀơi anai lĕ hơdôm gơnam mă yua, gông brô đưm mơng djuai ania K’ho. Tuai nao pơ̆ anun, amra dô̆ glăi amăng hơdôm bôh sang dlông, ƀong hơdôm mơta gơnam ƀong tui phiăn juăt mơng đưm hăng gum hrom hơdôm mlăm atông čing hơgor.

 “Blung a lĕ kâo hrom hăng bơnai kâo črông lô năng ai ñu sa blan, tŭ ư hrom pơdŏng kual djă pioh čing hơgor, čeh, gơnam mă yua tui phiăn juăt đưm mơng djuai ania K’ho. Yua kơ ră anai hơdôm gơnam yua tui phiăn juăt mơng djuai ania K’ho hmâo rơngiă tui laih, ƀu dô̆ rơnăk pioh lu dong tah. Lom hmâo tơlơi pơmin lĕ kâo lăi pơthâo hăng mơnuih juăt ƀơi tơring glông Đam Rông, gơnang kơ gơñu hơduah ĕp djă pioh hmâo hơdôm gơnam djuai ania pô. Kâo mơ-ĭt prăk nao hlâo, lom dưi djă pioh hơdôm gơnam phiăn juăt mơng djuai ania pô. Kâo amra nao pơ̆ anun pơgiăng ba glăi. Bơ̆ sang dlông anai lĕ kâo hmâo gơyut kâo pơ̆ Daklak, gơnang hơduah ĕp brơi đa. Nua mơng sang dlông anai lĕ năng ai ñu mơng 300-400 klăk prăk”.

Ơi Cil Ha Ổn (thun tơkeng 1934) dŏ ƀơi ƀut plơi 3, să Dă Sar, tơring glông Lạc Dương, tơring čar Lâm Đồng brơi thâo, djuai ania K’ho mơng đưm đă ră hlâo hơdip ƀơi tơkai čư̆ Bidoup – Núi Bà (gah tơring glông Lạc Dương) hăng Đam Rông ră anai). Rĭm wŏt amăng sang anŏ ƀudah plơi pla pơphun ngui ngor mơ-ak tơdơi kơ yuă hơpuă, arăng juăt atông čing kiăng hrơi ngui ngor dik dak mơnuih ƀiă. Kiăng jua čing djă pioh na nao amăng tơlơi hơdip mơda mơnuih djuai ania K’ho, ơi Cil Ha Ổn hơmâo črâo ba ană tơčô ƀơi anai hrăm atông lu tơlơi adôh suang. Amăng anun tơlơi adôh “Čơkă tuai” lĕ ƀu kơƀah ôh amăng hrơi ƀong asơi hle, juăt pơphun amăng akŏ thun phrâo.

“Yua ƀing gơmơi lĕ ƀing tha rơma yua anun kiăng pơtô brơi čing hơgor kơ rơnuk ană tơčô dong. Hăng tơlơi atông yôm hloh mơng đưm hlâo juăt atông čơkă asar pơdai, kơtor gui glăi mơng hmua, tơdơi anun amra pơphun mơñum ƀong, hăng ƀrô tal anai, ơi yă đưm hlâo adih juăt atông hơdôm tơlơi adôh čơkă tuai, anai lĕ tơlơi adôh mơ-ak hăng tơlơi adôh blung a amăng atông”.