Mơng pran kơtang gum hrom hơbit abih bang mơnuih ƀôn sang gah yŭ tơlơi git gai mơng Ping gah lĕ sa pơhlôm kiăng jơlan blah ayăt Mi, pơtlaih lŏn ia truh kih.

Hơdôm hrơi blan 4 gru grua, Thượng tá Nguyễn Thị Minh, Khua hơđăp kông ang ƀôn prong Hà Nội hơdor na nao hơdôm hrơi blah ngă bă kơ tơlơi tơnap hăng kơtang tit, Thượng tá Nguyễn Thị Minh ruai glăi: ñu dưi ruah mut mă bruă kông ang mơng thun ñu 13 thun hăng jing sa mrô ƀiă čơđai mơng Sang hră “Đah kơmơi hyu krâ̆o sŭ” lom anun dưi ruah djru gum kơ bruă blah gah dơnung dêh čar. Thượng tá Nguyễn Thị Minh brơi thâo, lu thun hyu mă bruă ƀơi tơdron blah, khom hơdip amăng tơlơi “rơpa kơ asơi, hra ƀong, duam pơgrun na nao”, samơ̆ pran kơtang mơng hlăk ai hmâo djru laih ñu yak rơgao tơlơi tơnap ngă giong bruă jao. Ñu ƀuh ư-ang biă yua kơ hmâo tuh rơyuh pran jua kơ bruă tlaih rơngai kual Dơnung dêh čar pơlir hơbit lŏn ia:

“6 thun hyu mă bruă ƀơi tơdron blah, hlăk ai samơ̆ dưi lông lăng rơgao kơ bôh ƀôm bôh phao hăng rơgao tơlơi tơnap đut hlah mơng bruă blah. Kâo ƀuh pô prong đĭ hăng kơjăp lu hoh. Lu wot kâo dưi nao mă bruă djru bruă blah hăng črâo ba bruă blah hrom hăng ơi Võ Chí Công. Lom anun kâo dô̆ anet đôč mơ̆, kâo khom djă ba sa bôh măi dar mă rup hăng sa bôh măi pơkĕ apui dar hăng tơngan kiăng đuăi tui grŭp mơnuih, ƀing gơmơi glêh glar biă mơ̆, huĭ biă yua kơ lom anun ayăt amra pơnah djai ƀudah mă hơdip".

Bruă blah lơ 30/4/1975 lĕ bôh tơhnal mơng tơlơi kơdŏng blah, pơsăn drơi, kơjăp phik amăng 30 thun mơng lu rơnuk mơnuih Việt Nam. Anun ăt lĕ bôh tơhnal mơng pran kơtang ruah mă pơphun mơng pran gum hrom hơbit abih bang djuai ania pơkĕ hrom hăng pran kơtang rơnuk phrâo, hluai tui tơlơi git gai thâo mơng Ping gah Cộng sản Việt Nam. Bruă blah truh kih anai ăt pơphun mơng pran jua kiăng kơ tơlơi rơngai, mơ-ak klă, čang rơmang kơ rơnuk rơnua pơlir hơbit lŏn ia mơng abih bang mơnuih ƀôn sang Việt Nam. Nai tha prin, nai prin tha Nguyễn Danh Tiên, Khua Anom djă pioh gru grua Ping gah, Sang hră pơtô bruă Ping gah Hồ Chí Minh dêh čar ta pơtŏng sit:

 “Truh kih prong prin mơng bruă blah prai ayăt Mi pơtlaih lŏn ia mơng mơnuih ƀôn sang ta blung hlâo lĕ truh mơng jơlan gah bruă kơđi čar, jơlan gah bruă ling tơhan rơgai, gơgrong pô, pơčeh phrâo mơng Ping gah. Amăng bruă blah kơdŏng glăi ayăt Mi gơnang kơ Ping gah iâu pơhrui hmâo pran kơtang mơng abih bang mơnuih ƀôn sang blah ayăt mơ̆ wot 3 mơta tơhan hmâo gum hrom khul apăn bruă kơđi čar hmâo tơlơi gal kơjăp kơplah wah pơblah tơhan plơi hăng pơblah tơhan hmâo ruah, pơkĕ hrom kơdŏng blah tơhan hăng kơdŏng blah bruă kơđi čar, nao hrom hăng kơdŏng blah mơng ling tơhan hăng tơlơi tơgŭ hơkrŭ mơng mơnuih ƀôn sang hăng jơlan gah “abih bang mơnuih ƀôn sang kơdŏng blah, abih bang bruă kơdŏng blah”.

Kơ-iăng nai tha prin, Nai prin tha Bùi Đình Phong, ƀơi Sang hră pơtô bruă kơđi čar Hồ Chí Minh dêh čar ta lăi lĕ: Truh kih mơng bruă kơdŏng blah ayăt Mi pơtlaih lŏn ia lĕ truh kih prong mơng mơnuih ƀôn sang Việt Nam. Truh kih anai hmâo lu bôh than ba truh. Amăng anun, bôh than prong hloh: gơnang kơ hmâo jơlan gah djơ̆, Ping gah hmâo tum pơƀut pran kơtang gum hrom hơbit mơng abih bang mơnuih ƀôn sang gum hrom hơbit abih bang djuai ania khom dưi djă pioh, hơkrŭ đĭ pơhlôm jai hrơi jai kơjăp phik.

 “Ră anai, bruă hơkrŭ tlaih rơngai kual Dơnung hmâo găn rơgao laih hơdôm pluh thun. Ră anai amăng pơplih phrâo rơnuk anai hmâo lu tơlơi khom ngă samơ̆ sa amăng hơdôm tơlơi yôm phăn ƀu dưi ƀu ngă lĕ khom dưi ngă tui pran kơtang gum hrom hơbit abih bang djuai ania. Kiăng gum hrom hơbit khom hmâo tơhnal hrom, ba tơbiă hơdôm tơlơi kiăng dưi tum pơƀut bôh tŭ yua kơ djop mơnuih kiăng arăng thâo hluh Ping gah ba tơbiă jơlan gah hơdră bruă, ba tơbiă tơlơi rơđah rơđông. Biă ñu bruă mă mơng Ping gah lĕ jơlan gah anăp nao pơsir tơlơi hơdip mơda pran jua, gơnam tam, lom arăng ƀuh tơlơi anun arăng amra gum hrom hơbit, tum pơƀut ƀơi yŭ khăn gru mơng Ping gah hăng ƀing ta amra hmâo pran kơtang prong pơgang hơdră gum djru, pơgang Ping gah”.

Hmâo 48 thun rơgao. Gru grua jai ataih tui, ƀing ta jai ƀuh dơlăm hloh anô̆ krên dên, pran gơgrong hăng bôh thâo Việt Nam, hơdôm tơlơi kiăng hrăm tui yôm phăn mơng bruă blah kơdŏng glăi ayăt Mi, tlaih tơngai lŏn ia, hăng hloh kơ anun, anun lĕ pran kơtang gum hrom hơbit djuai ania hmâo pơjing laih gru grua truh kih. Hăng pran đăo gơnang kơ tơlơi pơplih phrâo hăng git gai djơ̆ mơng Ping gah, pơgi kơdih anai mơng lŏn ia, mơnuih ƀôn sang čang rơmang Ping gah pơdah dong bruă mă lĕ pô mơng khul gum hrom hơbit abih bang djuai ania kiăng pơdŏng hăng pơgang lŏn ia. Dưi ngă tui pran kơtang gum hrom hơbit abih bang djuai ania lĕ Ping gah khul gum hrom hơbit, git gai mơng Kơnuk kơna khom gum hrom hơbit, khom jing gru hlâo, ngă tui dong pran kơtang gum hrom hơbit pioh pơplih phrâo bruă mă, pơplih phrâo lŏn ia./.