VOV4.Jarai - Nghệ nhân H’ Ƀim Kƀuôr (arăng juăt iâu Amĭ Blan), 50 thun, ƀơi Ƀuôn Ƀling, să Čư̆ Mgar, tơring glông Čư̆ Mơgar, tơring čar Daklak lĕ mơnuih abih pran jua hăng bôh thâo gru grua đưm. Hơdôm thun rơgao, ñu hyu hơduah ĕp hăng hrăm tui gru grua bôh thâo đưm djuai ania pô. Ƀu djơ̆ kơnong kơ hor kơ tơlơi adôh đưm, thâo pĕ gông atông brô̆ djuai ania pô đôč ôh mơ̆, ñu dô̆ thâo rơngaih mơñam băn ao, bung bai dong.

Ơi pang, yă dôn hăng ƀing gơyut glăk hmư̆ tơlơi adôh Eirei yua kơ nghệ nhân H’ Ƀim K’ƀuôr pô adôh. Mơnuih amăng ƀuôn Ƀling juăt iâu kơ ñu lĕ yă H’Ƀim pô thâo tơlơi ƀăt bruă đưm. Ñu djă pioh lu tơlơi adôh Eirei, hăng thâo pơtưh dong, ñu dưi adôh Eirei lăi nao kơ hơdôm tơlơi amăng tơlơi hơdip mơda rim hrơi. Rơngiao kơ anun ñu dô̆ dưi adôh er kưt dong, juăt ñu er anai ƀing đah rơkơi adôh.

Tui hăng phiăn juăt djuai ania Êđê, sit hmâo mơnuih ƀu hiam drơi, arăng juăt adôh Eirei kiăng juh alum pô sang hmâo mơnuih ƀu hiam drơi, ruai glăi tơlơi hơdip pô rơngiă. Hmâo đok adôh mơ-ak, ngă lu mơnuih hor hmư̆, anun sit sang hlơi hmâo mơnuih ƀu hiam drơi pơ̆ hơdôm bôh plơi pla ataih, giăm, pô sang juăt iâu ñu nao adôh Eirei. Djop mơnuih hmư̆ ngơngĕ hăng tơlơi adôh, er eirei hrom hăng đok adôh mơ-ak mơng ñu. Nghệ nhân H’Ƀim K’ƀuôr lăi pơthâo, rim wot hyu adôh pơ̆ sang pô hmâo mơnuih ƀu hiam drơi amra dưi adôh ha mlăm ƀơphar kơ dah yua kơ tơlơi hor kơ adôh, adôh kiăng juh alum pô sang, adôh ruai glăi tơlơi hơdip pô rơngiă, ăt adôh mơn kơ tơlơi khăp tơdăm dra, pơtă pơtăn ană amôn hơdip klă. Rơngiao kơ anun ñu ăt hyu adôh mơn amăng hơdôm hrơi jơnum ngui ngă yang mơng plơi pla, jơnum ngui bơkơtuai hăng plơi pla pơkon.

“Kâo hyu adôh Eirei lu hloh lĕ amăng hơdôm mông sang anô̆ hlơi hmâo mơnuih ƀu hiam drơi, amăng sang jơnum plơi pla, amăng hơdôm mông ngă yang jơnum ngui, kâo ăt hyu adôh mơn pơ hơdôm bôh să, tơring glông pơkon kah hăng hyu adôh pơ̆ tơring čar pơkon. Hơdôm tơlơi adôh kâo akă thâo lĕ kâo hmư̆ arăng adôh laih anun kâo djă pioh, hrăm tui. Hmâo hơdôm tơlơi adôh kâo adôh ruai kơ tơlơi hơdip tơnap ngă pơtrut đĭ pran jua pô adôh rah hăng hia rah. Rơngiao kơ anun, kâo ăt thâo mơn mơñam bung bai, rơ-i čơngua hăng adôh rah Eirei..”.

Nghệ nhân H’ Ƀim ayup đing năm

Nghệ nhân H’ Ƀim lăi pơthâo: Tơlơi khăp kơ tơlơi adôh đưm hăng gông brô̆ tơma mut laih amăng pran jua kâo mơng anet, sit kiăo tui amĭ ama nao pơ̆ đang hmua, hmư̆ er đing năm mơng ơi yă pioh glăi, ñu hyu hơduah ĕp lăng, hrăm tui hơdră ayup hăng truh kơ 14 thun ñu ayup hreč laih đing năm hăng sa dua gông brô̆ pơkon kah hăng đing tut, đing ƀuôt... Ƀu djơ̆ kơnong kơ thâo mă jua adôh lơm glăk adôh, hreč mă yua gông brô̆ đưm djuai ania, rơgơi mơñam bung bai ôh mơ̆, ñu dô̆ thâo rơngaih mơñam băn ao hăng thâo mơñam bơnga pha ra dong.

Tơlơi hơdip mơda rơnuk anai, bruă mă bôh thâo hmâo tơlơi pơmut nao rai. Rơnuk hlăk ai hmâo jơlan gah tŭ mă tơlơi phrâo, hăng ƀu gan đơi ôh hăng bôh thâo gru grua đưm. Dô̆ pơmin ƀơi anăp tơlơi anun, nghệ nhân H’ Ƀim K’ƀuôr juăt iâu ƀing čơđai nao pơ̆ sang ñu ngui; mơñam rah rêu ro, adôh rah Eirei, ruai glăi rah bôh thâo đưm kơ ƀing čơđai kiăng khăp dong tơlơi adôh đưm, gru hiam bôh thâo djuai ania pô.

“Kâo kiăng pơtă pơtăn ană amôn thâo hăng kiăng khăp bôh thâo đưm djuai ania pô. Tơdah kah hăng ƀing ta sit nik hmâo bôh thâo lĕ khom gir run hyu hơduah ĕp lăng, tơña, hrăm tui ƀu pơdơi, ƀu dưi wor bit er adôh đưm, gông brô̆ đưm. Khă hyu pơ̆ hơpă ăt ƀu wor bit mơn phun akha pô”.

Nghệ H’ Ƀim adôh Eirei

Ơi Y Nguk Niê (Ơi Suang) ƀơi ƀuôn Huk B, să Čư̆ Mgar, tơring glông Čư̆ Mgar, tơring čar Daklak lĕ sa amăng hơdôm mơnuih ƀăt bruă juăt hyu pơdah hrom hăng H’ Ƀim lăi pơthâo, nghệ nhân H’ Ƀim ƀăt bruă, thâo lu mơta tơlơi đưm, djru djă pioh hăng ngă tui gru grua djuai ania ƀơi plơi pla hăng dưi hmâo neh wa kiăng khăp. Ñu hăng neh wa amăng plơi pơpŭ biă hơdôm tơlơi gum hơgôp mơng nghệ nhân H’ Ƀim.

“Kâo ăt lĕ nghệ nhân thun tha, samơ̆ ƀu thâo đơi ôh adôh tơlơi adôh đưm kah hăng nghệ nhân H’ Ƀim. Lu mơnuih tha rơma thâo tơlơi đưm rơngiă laih, ƀing gơmơi lĕ rơnuk tơdơi ƀu djong djơ̆ ôh hơdôm tal hyu lăi pơthâo tơlơi adôh đưm, gông brô̆ đưm, čing hơgor djuai ania pô ƀơi djop anih anom plơi pla jê̆ ataih”.

Ơi Y Mang – Kơ-iăng Khua Anom bruă bôh thâo tơlơi pơhing tơring glông Čư̆ Mgar, tơring čar Daklak brơi thâo: ƀơi tơring glông ră anai ăt dô̆ mơn sa dua čô mơnuih thâo tơlơi đưm. Anun lĕ hơdôm mơnuih abih pran jua hăng bôh thâo đưm djuai ania pô. Amăng anun, yă H’ Ƀim Kƀuôr lĕ sa amăng hơdôm nghệ nhân ƀăt bruă đưm hloh.

“Nghệ nhân H’Ƀim hmâo đok adôh mơ-ak biă, lom adôh amra thâo pơhrua tañ biă, đok adôh mơ-ak hăng hmâo lu mơnuih hor hmư̆. Djru djă pioh, pơgang ba, rơngiao kơ gum hrom hơdôm tal jơnum ngui pơdah, pơplông jơnum adôh suang ăt pơphun mơn pơtô glăi tơlơi adôh đưm djuai ania Êđê pô kah hăng adôh Eirei, adôh kưt”.

Hmư̆ nghệ nhân H’ Ƀim Kƀuôr ră ruai, dô̆ lăng hơdôm gơnam ñu mơñam hăng hmư̆ ñu adôh tơlơi adôh đưm mơ-ak, neh wa amăng ƀuôn mưn ƀuh anô̆ mơ-ak mơng ñu, anô̆ klă hiam ñu. Mơng anun, kiăng khăp hăng pơpŭ djă pioh gru grua bôh thâo đưm mơng djuai ania pô./.

H’Yawut: Čih – Siu H’ Prăk: Pơblang