Hăng akŏ bruă “Hlăk ai Dak Lăk nao hlâo ngă bruă, kơtưn akŏ pơdong tơring čar Dak Lăk pơdrong sah, rơgơi, gru grua hiam”, tơlơi pơplông mơ̆ng hlăk ai Dak Lăk pơƀut ngă hơdôm bruă kah hăng: man pơkra 120 ring bruă hăng 1.200 mơta bruă hlăk ai man pơdong plơi pla phrâo hăng plơi prong rơgơi; pơphun brơi kơ 120.000 wơ̆t čô hlăk ai tơdăm dra gum pơplông hơduah ĕp “Gru 120 thun akŏ pơdong, pơđĭ kyar tơring čar Dak Lăk”. Djru ba hlăk ai tơdăm dra ngă 300 tơlơi pơčeh phrâo; pơtô bruă mă, pơƀuh hăng ĕp bruă mă brơi rơbêh 30.000 čô hlăk ai.

Amai Phan Thị Trinh, Kơ-iăng khua hlăk ai tơring čar Dak Lăk brơi thâo, hơdôm bruă bơkơtưn ăt jing tơlơi gơñăm nao yôm phun amăng khul hlăk ai hăng bruă hlăk ai tơdăm dra thun anai. Mơ̆ng anun pơđĭ tui tơlơi gơgrong bruă mơ̆ng hlăk ai amăng bruă iâu pơthưr hlăk ai tơdăm dra gum akŏ pơdong plơi pla.