Hơdôm hrơi hăng anai, ƀơi sang dŏ đŏm pioh kơ djuai ƀiă Têrêsa amăng phường Tân Lợi, tơring čar Dak Lak, hmư̆ ik ăk tơlơi hrăm atông, hrăm taih, raih tơrưng ting ning, pah đing pơng adoh suang hăng gông brô̆ đưm hmư̆ mơak biă mă. Amăng anih dŏ anet aneo, hmư̆ jua đing pơng, jua tơrưng tơ-ua đĭ jua mơñi tơrơkhăk, mut hrŏm jua mơñi lơ̆m bơyan phang bơnga hlăk čuh blang. Ƀing gơyut hlăk ai djuai ania Hơdang (Sedang) hlăk dŏ hrăm, prăp lui gơnam yua gông brô̆ pioh pơdah brơi kơ mơnuih ƀôn sang hăng ƀing tuai ĕp lăng amăng bơyan čơkă thun phrâo.

Lăng nao ia hŏu ( ia hô̆)mơsah hmrih hmrah ƀơi ao, ayong A Bảo, 23 thun, mơ̆ng plơi Đak Rơwa, phương Kon Tum, tơring čar Quảng Ngãi hlăk dŏ mă bruă ƀơi sang bruă pioh kơ mơnuih djuai ƀiă dŏ Têrêsa brơi thâo:

“Gông brô̆ đưm djuai aia ƀu dưi kơƀah ôh amăng tơlơi hơdip mơda, kah hăng mơnong ƀong huă mơ̆n. Amăng tơlơi hơdip mơak bơngăt jua hơmâo tơlơi adoh atông tơrưng pĕ gông atông brô̆, sit mơ̆ tơlơi hơdip amra mơak lu hloh. Rơnuk ơi yă đưm đă arăng pơtum jơngum ƀơi jum dar tơpur hmư̆ atông tơrưng, pah đing pơng, pĕ gông; ƀig neh wa, ƀing met anong taih tơrưng, pah pơng, đơ thâo pĕ gông ting ning hmư̆ mơak biă mă. Boh nik ñu amăng mông ngui ngor ngă yang plơi pla, ƀong mơñum mơak akŏ thun phrâo hmư̆ jua đing pơng, tơrưng ƀudah jua ting ning tơ-ua đĭ mơak biă mă”.

Bơ ayong Karôly, 29 thun, dŏ ƀơi ƀôn Hring, să Čư̆ gar, tơring čar Dak Lak lăi, tơlơi adoh, jua gông brô̆ kah hăng hrĕ mrai tô nao rai, pơtruh brơi tơlơi mơak amăng plơi pla, anun lĕ tơlơi hơdip bơngăt jua plơi pla amăng mông ngui ngor, ngă yang plơi sit truh bơyan phang. Yua tơlơi hor, amuaih kơ pĕ gông raih ting ning ƀudah taih tơrưng lu gơyut gơyâo dŏ ƀơi sang bruă pioh kơ mơnuih djuai ƀiă, gơñu pơkra ming hrăm taih tơrưng, pah đing pơng hăng pĕ ting ning gông brô̆ pơkra hăng djrao ale de ale pơ-ô djuai ania, ƀu kơnong tơlơi hor, anŏ kiăng đôč ôh, dŏ jing bruă pioh pơdah brơi tuai lăng, bơwih brơi tơlơi mơak amăng plơi pla:

 “Kâo hor biă mă tơlơi adoh suang gông brô̆ djuai ania pô. Sit truh bơyan akŏ thun phrâo, hrơi ngă yang mơak, ƀing gơmơi bơpah đing pơng, atông tơrưng raih ting ning laih anun atông čing hơgor, abih bang suang arap hrŏm kiăng mơak čơkă tuai mut lăng amăng plơi pla. Yua mông anun, tơlơi gum pơgôp prong amăng plơi pla, djuai ania hăng tuai rơnguai. Sit âtông čing ƀudah pah đing pơng, taih tơrưng thâo, pran jua hik hăk mơak biă mă, djơ̆ bơyan phang bơnga čuh blang ƀhêm ƀham djop anih jum dar plơi lăng hyu rơnguă samơ mơak jua čing suang arap djă tơngan hơdai tơkai yak ayun suang, tơlơi mơak ñu lu hloh”.

Hăng ayong A Tùng, 29 thun, ăt mơ̆ng ƀôn Hring, bruă ngă pơpư̆ bơni pơyom djă pioh jua gông brô̆ đing pơng, tơrưng đưm jing bruă ngă glăm ba, djă pioh gru ama grua amĭ kơ ană tơčô mô yâo djop rơnuk.

 “Đing pơng, klông put, tơrưng tâ yom biă mă amăng tơlơi bơngăt jua tơlơi mơak pran jua ană plơi pla Hơdang laih anun djuai ania pơkŏn hai. Hơdôm mơta djuai gông brô̆ anai lăng yom kah hăng čing hơgor mơ̆n khom dŏ djă pioh na nao gru grua djuai ania. Rơnuk ơi yă đưm hlâo, sit bơyan phang akŏ thun phrâo amăng blan ning nung blan ngui ngor ƀhač rơđah blan bơrơmi ria, tơdăm dra ngui ngor ƀu kơƀah ôh jua đing pơng đing dek, gông brô̆ ting ning, tơrưng ta, mut tơma hăng er tơlơi adoh hmư̆ ik ăk mơak pran jua jing gru grua hiam đưm djuai ania Hơdang”.

Bruă ngă greh gruñ mơ̆ng ƀing tơdăm kah hăng bơn A Bảo, Karôly ƀudah A Tùng, ƀu kơnong pơjing rai lu črăn tơlơi adoh suang, juâ gông brô̆ mơñi đôč ôh, dŏ jing jua mơñi mơ̆ng gru ama grua amĭ hiam phara biă mă, lar hyu amăng djop plơi pla. Ơi Pê Đoan, mơnuih ƀôn sang ƀôn Hring, lu wơ̆t laih ñu lăng ƀing tơdăm amăng plơi atông čing hơgor hăng taih tơrưng, pah đing pơng pơdah brơi kơ ƀing tuai rơnguai lăng amăng mông ngă yang ngui ngor mơak, ñu lăi:

“Ƀing ană amôn adơi đeh rơgơi biă, thâo pĕ gông atông tơrưng, pah đing pơng djuai ania, thâo dŏ djă pioh kông ngăn bơngăt jua đưm djuai ania. Ƀing gơñu horr, hrăm tañ thâo, dŏ đuăi hyu pơdah brơi arăng lăng ƀơi plơi pla, mơnuih ƀôn sang sem lăng mơak biă mă”.

Ƀu kơnong amăng mông dŏ ngui đôč đač tơđar hrơi đôč ôh, sit djơ̆ mông ngui ngor jơngum lu mơnuih kah hăng ngă yang huă asơi hle, hmư̆ jua čing hơgor ƀudah gông brô̆ djrao de ale pơ-ô đôč yua ƀing hlăk sang bruă pioh kơ mơnuih djuai ƀiă Têrêsa pơdah, lăng kah hăng gơnam ƀong huă mơak pran tơlơi hơdip amăng bơngăt jua, ba tơlơi mơak hăng tơlơi đăo kơnang tong ten brơi djop plơi pla. Ơi Vi Voan, khua plơi Kon Hring, să Čư̆ Mgar, tơring čar Dak Lak lăi:

“Ƀing adơi đeh ană amôn dŏ čơđai samơ̆ thâo pơpŭ pơyom djă pioh gru grua djuai ania pô, thâo atông čing pĕ gông atông brô̆, pah đing pơng, taih tơrưng, pĕ ting ning....plơi gơmơi pơ-ư ang biă mă kơ ƀing gơñu yua khul hlăk ai čơđai muai thâo djă pioh gru ama grua amĭ đưm đă ơi yă pioh glăi”.

Mơ̆ng hrơi mông dŏ hrăm djă pioh hăng abih pran jua ƀơi sang bruă pioh kơ mơnuih djuai ƀiă Têrêsa truh kơ mông hyu pơdah brơi tuai lăng amăng plơi pla, mông ngă yang pơtum lu mơnuih, ƀing hlăk ai djuai ania Hơdang hlăk tŏ tui djă pioh, kah hăng tŭi apui jă na nao hăng a apui tơlơi hur har djă pioh gru grua djuai ania pô kơ djop rơnuk tơdơi. Anun lĕ, tơlơi khăp, tơlơi gơgrong ba, tơlơi čang rơmang prong pioh jua đing pơng klông put, tơrưng ƀudah ting ning, čing hơgor dưi tơ-ua hyu djop plơi pla đưm adih mut tơma amăng glai klô plao kmrơ̆ng arong pơtâo, jua čing djuai ania Hơdang, gru grua đưm ăt tơ-ua hyu dŏ hơdip na nao ahrŏm thun blan đuăi nao samơ̆ tơlơi hơdip amăng bơngăt jua ƀu rơngiă ôh hrup hnoh ia rô.