VOV4.Jarai-Ră anai, lu hlăk ai mơnuih ƀôn sang djop plơi pla kual Dap Kơdư hơmâo lu bruă mă hiam kiăng djă pioh, pơđĭ tui gru grua hiam mơ̆ng djuai ania, pioh čơkă tuai hyu ngui tơdơi kơ abih klin covid 19 kiăng rŭ glăi tơlơi bơwih ƀong huă, hơđong tơlơi hơdip mơda.

Mah thun dŏ čơđai, samơ̆ Siu Thanh, 25 thun, plơi Plơi Kly, tơring kual Nhơn Hòa, tơring glông Čư̆ Pưh, Gia Lai thâo hruaih biă atông čing arap Jrai hơbai ta. Siu Thanh brơi thâo, ñu atông čing dơ̆ng mơ̆ng dŏ čơđai, ñu thâo hruaih lu tơlơi atông čing đưm Jrai, kah hăng čing arap, čing pêl, čing kok hăng lu djuai čing pơkŏn. Samơ̆ gru grua čing hơgor amăng tơring čar Gia Lai lăi pha, amăng kual Dap Kơdư hnun mơ̆n hlăk či rơngiă tui yơh, hŭi rơngiă soh sel ƀu hơmâo pô pơtô glăi.

Yua kơ anun, thun blan pơ anăp, Siu Thanh čang rơmang hơmâo tơlơi gleng nao lu hloh mơ̆ng djop sang bruă, pioh pơtô glăi, lăi pơthâo, pôr hyu gru grua hiam čing hơgor kiăng pok pơtui amăng tơlơi pơhing phrâo, rŭ pơdong glăi bruă ngă ngă yang, tơlơi ngui ngor gru đưm djuai ania, kiăng djă pioh bruă atông čing hơgor. Ayong Siu Thanh lăi:

“Mơ̆ng hlâo truh ră anai, kâo gir run na nao kiăng djă pioh gru grua hăng pôr pơthâo anŏ hiăm gru grua đưm mơ̆ng ơi yă pioh glăi, sa tơlơi rơngôt biă lĕ ră anai mơnuih ƀôn sang ta sĭ lui, wor rơbit hĭ yơh gru grua ta pô. Ră anai, kâo hăng ƀing adơi ayong gir run pôr pơthâo, lăi pơthâo anŏ hiăm gru grua đưm mơ̆ng djuai ania kiăng gơyut gơyâo ataih hăng jĕ thâo rai. Laih anun  khom gir run hloh dơ̆ng amăng bruă pơtô hrăm kơ čơđai tơdơi thâo atông čing, pioh gơñu djă pioh glăi na nao gru ama grua amĭ ta mơ̆ng đưm hiam klă”.

Jing mơnuih mă bruă amăng anom bruă Gru grua tơlơi pơhing tơring glông Kƀang, Gia Lai, Đinh Mơih, hơmâo bruă mă wai lăng anih anom gru phun ƀơi tơring glông. Bruă mă mơ̆ng ñu lĕ pơtô brơi hăng lăi pơthâo kơ ƀing tuai thâo anih anom nam gru phun dêh čar, lăi pơthâo tơlơi ră ruai bruă hơkrŭ mơ̆ng ană plơi pla amăng 2 wơ̆t blah ayăt Prang hăng Mi laih anun gru hiam đưm djuai ania Bahnar. Mah mơ̆ng akŏ thun 2021 pơ anai, bruă ngă anai tơ̆I đưn hĭ yua kơ klin kheng covid 19 ngă, samơ̆ ñu ăt pơtrut ană plơi pla sơ̆n pran jua hrăm na nao bruă atông čing ring hơgor, bruă rơwơi mơñam mrai đưm djuai ania.

Ră anai, anom bruă tuai čuă ngui hơmâo gru tơhnal rŭ glăi, ñu hăng ană plơi pla hok mơak pơkra hơdră ăt pơgôp prana pôr pơthâo anŏ hiam gru grua djuai ania, gru phun kual plơi pla Kƀang khin hơtai kơ tuai thâo. Ayong Đinh Mơih, mơnuih apăn bruă anom bruă gru grua tơlơi pơhing tơring glông Kƀang, Gia Lai brơi thâo:

“Anih gru phun dêh čar jing gru grua hiam gưl tơring čar anun lĕ anun lĕ anih arăng pơ anăn Khu 10 gah să Kroong, tơring glông Kƀang, Gia Lai man pơdong glăi. Anai lĕ anih gru phun dêh čar yôm biă, amăng 2 thun rơgao, klin kheng kơtang đơi, anom bruă tuai čuă ngui tơnap tap. Ră anai, lơ̆m klin kheng hơđong ƀiă laih, tuai čuă ngui rŭ glăi, kâo pô gir run yơh ngă hrom mơnuih ƀôn sang man pơdong hăng pơphun glăi bruă mă atông čing, anih ngui ngor djuai ania, kiăng djă pioh hăng pơlar tui gru ama grua amĭ kah hăng čing hơgor, suang arap, adoh pơtưh, akhan hri ta djă pioh hăng pơđĭ tui pioh tuai  amăng dêh čar hăng gah rơngiao ĕp lăng.

Ƀing mơnuih kơhnâo kơhnăk gru đưm laih anun mơnuih ƀôn sang amăng plơi gir run djă pioh, lăi pơthâo, pơhưč gru grua djuai ania pô, lăi pơthâo gru phun tơlơi hơdip bruă mă, hơkrŭ đưm kiăng kơ ană tơčô tơdơi thâo  kơ anih anom, rup rap plơi pla hơkrŭ đưm laih anun thâo kơ ană plơi pla ƀơi Gia Lai lăi pha, amăng dêh čar ta ăt hnun mơ̆n”.

Hơdôm hrơi arăng brơi pơčlah mơnuih mơnam pơgang klin covid 19 lĕ hrơi blan yă Thị Pyơm, dŏ pơ ƀon Bu Nrung, să Dak Buk So, tơring glông Tuy Đức, Dak Nông, pơhiam glăi gơnam bơnal mơñam mrai đưm ñu. Yă brơi thâo, rơbêh 60 thun ñu hur har hăng bruă rơwơi mơñam mrai đưm, aka ƀu hơmâo hrơi mông ñu ngă bruă mơñam lu kah hăng hrơi blan rơgao lơ̆m klin kheng kơtang ƀu thâo tơbiă hyu. Ră anai, tơlơi hơdip mơda pơwơ̆t glăi laih, ñu ăt pơtô glăi bruă mơñam mrai kơ ană tơčô kiăng djă pioh gru ama grua amĭ hiam klă mơ̆ng đưm pioh glăi.

“Hơdôm gơnam mơñam mrai ñu hơmâo lêng kơ sĭ tloh. Rơngiao kơ anun, kâo mơñam pioh amăng sang anŏ đôč. Kâo ăt mơñam lu gơnam gru grua djă pioh glăi kơ ană tơčô, laih anun pơtô glăi kơ   ană dra hrăm mơñam mrai đưm djuai ania pô. Ră anai, ƀing thâo mơñam mrai lĕ ƀiă đôč, tơdah ƀu pơtô lĕ ƀing čơđai ƀu thâo dơ̆ng tah”.

Nay Jek: Pơblang