Dong mơ̆ng hrơi pin ia buôn Kli A, phường Đạt Hiếu, plơi prong Buôn Hồ, tơring čar Dak Lak dưi hơkrŭ pơkra glăi, khă sang hmâo ia bơmun hai samơ̆ amai H’ En Niê ăt juăt rai pơ̆ anai sŏ ia mơn. H’ En dưi hmâo amĭ ñu pơtô glăi bruă pơkra poi pioh kŏng tơpai čeh. Amai H’ En jai mơ-ak hloh lơm thâo buôn pô phrâo akô̆ pơdŏng anom mă bruă hrŏm ngă đang hmua pla hơdôm mơta gơnam tui phiăn juăt đưm, amăng anun hmâo tơpai čeh. Laih anun tơpai čeh OCOP buôn Kli A ƀu kơnong kơ mă yua amăng hơdôm tal ngui ngor amăng buôn, hrơi jơnum ngui mơ̆ng phường đôč ôh mơ̆ dô̆ pơdah brơi kơ tuai thâo, hăng ba hyu djop anih amăng lŏn ia.

 “Kâo čang rơmang lĕ hơdôm gưl gong gai ngă gal brơi pioh pok hơdôm anih pơtô kơ ƀing čơđai amăng buôn Kli A hrăm bruă mă đưm mơ̆ng djuai ania pô. Đah kơmơi lĕ hrăm rơngaih mơñam, kŏng tơpai čeh; đah rơkơi lĕ hrăm mơñam bung bai, hrăm pĕ gông atông brô̆ djuai ania pô. Hmâo tui anun kah mơ̆ng djă pioh kơjăp gru grua bôh thâo đưm mơ̆ng djuai ania”.

Tơlơi hơdip mơda neh wa djuai ania Êđê ƀơi buôn Kli A biă ñu hluai tui kơ bruă đang hmua, hăng djop mơta phun pla phun lĕ kơphê, tiu, sầu riêng. Tơkeng rai hăng prong đĭ ƀơi kual lŏn anai, ơi Y Chép Mlô lăng ƀuh dơlăm hơdôm tơlơi pơplih pơđĭ kyar mơ̆ng rim sang anô̆ amăng buôn; Bruă bơwih ƀong jai hrơi jai pơđĭ kyar, ƀu dô̆ sang anô̆ hơpă bơngot kơ rơpa glar, kơƀah băn ao buh dong tah. Samơ̆ ơi Y Chép ăt hur har pran jua mơn hơdor glăi hơdôm hrơi đưm đă ră hlâo adih, hăng rim tơlơi čang rơmang hmư̆ sa tơlơi akhan, jua čing hơgor atông đĭ, jua đing pút, ƀudah kơnong kơ jua tŏp pơdai... Abih bang pơmin kơnong kơ amăng pran jua đôč, tô̆ tơnô̆ dưi rŭ đĭ, ƀuh glăi. Ơi Y Chép Mlô mơ-ak biă.

 “Abih bang djop mơnuih amăng buôn leng kơ hmư̆ tui tha plơi hăng khua buôn, gir bơwih ƀong huă anun bruă bơwih ƀong pơđĭ kyar, sang hlơi hlơi leng kơ dưi djă pioh gơnam tam. Lu sang anô̆ hmâo pơdŏng sang klă hiam, blơi prăp hơdôm măi mok rơdêh mă yua rơnuk anai. Ră anai ƀing gơmơi hmâo đing nao djă pioh phiăn juăt mơ̆ng djuai ania pô”.

Ơi Y Ngia Mlô, Khua git gai Grŭp Ping gah buôn Kli A brơi thâo amăng mrô 277 bôh sang anô̆ ƀơi buôn, kơnong kơ dô̆ 13 bôh sang anô̆ ƀun rin, hmâo truh 43 bôh sang anô̆ đĭ gŏ amŏ. Ră anai đơ đam buôn ăt dô̆ mơn 40 bôh sang dlông tui phiăn đưm mơ̆ng pô pioh ngă anih dô̆ hăng djru bruă tơnă hơbai mơ̆ng tuai čuă ngui. Grŭp Ping gah phrâo pơmut brơi 2 čô mơnuih mut ping gah, đĭ tui mrô mơnuih ping gah mơ̆ng grŭp truh 17 čô mơnuih. Anai lĕ khul ba jơlan hlâo amăng bruă pơđĭ kyar bơwih ƀong; hrŏ trun phiăn juăt ƀu tŭ yua, djă pioh gru grua bôh thâo đưm mơ̆ng djuai ania Êđê.

“Ƀing gơmơi djă pioh na nao phiăn juăt mơ̆ng djuai ania Êđê kah hăng: ngă yang pin ia, ngă yang rơkâo brơi tơlơi suaih pral kơ mơnuih ƀôn sang amăng plơi pla. Neh wa ăt kŏng mơn tơpai čeh, djă pioh sang dlông, hăng hơdôm djuai gông brô, biă ñu lĕ čing hơgor”.

Yă Nguyễn Thị Trúc, Khua git gai Ping gah phường Đạt Hiếu brơi thâo: Akô̆ bruă “Pơđĭ kyar tuai čuă lăng plơi pla hăng ngă tui hơdôm nua yôm bôh thâo đưm čing hơgor, pơđĭ kyar bruă kŏng tơpai jing gơnam OCOP” pơjing tơlơi djơ̆ hrŏm mơ̆ng djop mơnuih ƀơi ƀuôn Kli A. Ping gah hmâo jao laih rim črăn bruă kơ abih bang khul grŭp, khul kơđi čar mơ̆ng phường ngă tui. Yă Nguyễn Thị Trúc pơtŏng sit:

“Ngă tui hơdôm nua yôm bôh thâo đưm nao hrŏm hăng pơđĭ kyar tuai čuă ngui. Ba tơbiă tơhnal pơđĭ kyar tuai čuă ngui plơi pla ăt kah hăng ngă tui nua yôm bôh thâo đưm čing hơgor. Pơđĭ kyar bruă kŏng tơpai čeh jing sa gơnam OCOP pioh sĭ kơ tuai čuă ngui”.

Kiăng anom mă bruă hrŏm rơngaih mơñam buôn Kli A mă bruă, Khul đah kơmơi plơi prong Buôn Hồ hmâo gum hrŏm laih hăng Anom pơtô bruă mă pok anih pơtô rơngaih mơñam băn ao, hrŏm hăng anun ƀơk brơi adơi amai ƀơi buôn 3 bôh khung anguh mơñam; kiăng ngă hơget pioh dưi sĭ băn ao mơñam, pơhlôm prăk pơhrui glăi kơ hơdôm mơnuih amăng anom? Gơñu dưi hơdip hăng bruă mă phrâo hơđong.

“Rơngiao kơ bruă jao ngăn rơnoh, jao bôh thâo lĕ ƀing mơnuih amăng anom mă bruă hrŏm anai khom hmâo jơlan gah bơwih ƀong ba glăi bôh tơhnal pioh gơnam mơ̆ gơñu pơkra rai huăi kơnong kơ pioh pơdă prưng ôh mơ̆, khom truh hăng mơnuih blơi yua. Khom hmâo pran jua gơgrong pô hăng ngă tui pran jua mơ̆ng pô amăng djă pioh gru grua bôh thâo djuai ania”.

Sŏ ia rơ-ơ̆ hyiom ngă ƀlĕ ia mơta mơ̆ng lŏn, hling mut čeh tơpai hmâo kă ƀơi tơmeh. Tơngan djă rah đing tơpai, ƀơhư̆ ƀâo phu mơ̆ng čeh tơpai. Jua čing glăi tơtar đĭ mơ̆ng hơdôm bôh bơbung sang glông, tơ-oa hyu djop hơdôm blah đang kơphê đut mơta lăng mơ̆ng buôn Kli A, phường Đạt Hiếu, plơi prong Buôn Hồ./.

https://cms-vov4.vov.vn/jarai/gru-grua-thao-thai-van-hoa/hodom-toloi-cih-lar-hyu-hodom-brua-ma-kla-hiam-toloi-cih-1-jonum-ngui-hang-po-tum-pobut-hrun-hyu-ataih-456434.vov4

https://cms-vov4.vov.vn/jarai/gru-grua-thao-thai-van-hoa/hodom-toloi-cih-lar-hyu-hodom-brua-ma-kla-hiam-pe-pha-at-jing-dja-pioh-glai-ko-po-mon-456672.vov4