VOV4.Jarai-Tom brơi, lơ 15/2, ƀơi jơlan Đường Sách-kơphê Ƀuôn Ma Thuôt, Khul čih tơlơi hơ̆k hơr adoh suang tơring čar Dak Lak ngă hrom Gơnong bruă gru grua, Pơrơguăt drơi jăn hăng Tuai čuă ngui tơring čar pơphun hơdră anăn Hrơi tơlơi pơtưh Việt Nam ƀơi Dak Lak tal 20, thun 2022.

Pơphun mơ̆ng lơ 15-17/2/2022, hơdră anăn Hrơi tơlơi pơtưh Việt Nam ƀơi Dak Lak mă akŏ “Hơdip mơda hăng čang rơmang” dưi pơphun lu bruă mă mơak biă, pơdah thâo ia rơgơi tơlơi kơhnâo hơ̆k hơr mơak pran jua, hơmâo wơ̆t bruă mă pơtô lăi gru grua hăng bruă mă rơnuk phrâo, laih anun djă gru phara boh thâo đưm djop djuai ania ƀiă tơring čar.

Ƀơi mông jơnum, hơdôm rup kač hơmâo in  anăn “Angin glăi pơ akŏ plơi prong” rup kač mơ̆ng Trần Thanh Long hăng rup hiam anăn “Anih tơkuh năm jơlan Ban Mê” Ngã sáu Ban Mê mơ̆ng pô mă rup Bảo Hưng brơi kơ khul pơphun hơdră anăn “Jam asơi ƀơi pơnang BMT” pioh sĭ kiăng mă prăk pơčruh hrom keh prăk, djru  mơnuih ƀun rin duăm ruă, hlăk dŏ pơjrao ƀơi sang ia jrao prong Kual Dap Kơdư.

Nay Jek: Pơblang