Rơwang hrơi tơjuh Gru grua - Tuai čuă ngui Gia Lai thun 2023 amra pơphun mơ̆ng lơ 11 truh kơ 19/11 ƀơi plơi prong Pleiku, tơring glông Čư̆ Pah hăng tơring glông Ia Grai (tơring čar Gia Lai) hơmâo hơdôm bruă jơnum: Jơnum pok pơphun Rơwang hrơi tơjuh Gru grua - Tuai čuă ngui tơring čar Gia Lai thun 2023; Jơnum ngui atông čing ayun suang tơring čar Gia Lai thun 2023 hơmâo giăm 1.000 čô mơnuih kơhnăk mơ̆ng 5 boh tơring čar kual Dap Kơdư.

Jơnum sang čơ sĭ mơdrô hăng pơƀuh gơnam mơ̆ng hmua hmư̆ hing mơ̆ng tơring čar Gia Lai; Rơwang hrơi tơjuh Bơnga ang - Čư̆ apui kơdir Čư̆ Đang Rya thun 2023; Pri đuăi ƀơi jơlan “Gia Lai City trail 2023 - Tơlơi rơpơi hiam kual čư̆ siăng glai klô prong”; Pơplông tuah rơkĭ ƀơi ia krông Pô Cô mă Kup A Sanh hăng Jơnum ngui atông čing tơring glông Ia Grai; Buh eng ao đưm, ayun suang...Rơwang hrơi tơjuh gru grua - tuai čuă ngui Gia Lai thun 2023 hơmâo pơphun kiăng pơƀuh anŏ yôm gru grua hiam phara mơ̆ng tơring čar Gia Lai, biă ñu lĕ tơlơi ngui ngor atông čing ring hơgor kual Dap Kơdư.