VOV4.Jarai - Mơguah lơ 8/4, ƀơi Hùng Lô, plơi prong Việt Trì, tơring čar Phú Thọ, să Hùng Lô pơphun yôm phăn mông čơkă mă hră pơsit gru grua yôm mơng “Hrơi ngui ngă yang Đình Hùng Lô” lĕ hrơi ngui djă pioh gru grua gah bơngăt gưl dêh čar hăng lăi pơthâo tơlơi pơsit mơng tơring čar Phú Thọ tŭ yap anih bơwih brơi tuai čuă ngui amăng plơi pla ƀơi Hùng Lô. Plơi Hùng Lô đưm hlâo lĕ anăn Khả Lãm Trang, tơdơi anai plih hĭ jing An Lão.

Tui tơlơi bơră ruai glăi, amăng sa hrơi hiam ơi pơtao Hùng hrŏm hăng ană ba laih dong ƀing khua mua amăng sang pơtao đĭ hyu sang nan amăng ia krông Lô, hyu lua pơnah hăng čuă lăng ia krông, glai čư. Truh pơ kual lŏn Hùng Lô, ơi pơtao ƀuh glai rưng, ia krông čroh hnoh, lŏn mơnai hiam, kyâo glai mơtah mơda, ñu dŏ glăi pơdơi pran. Lơ̆m ƀuh ơi pơytao, ƀing khua mua hăng mơnuih ƀon sang ba nao gơnam pioh pơpŭ kơ ơi pơtao. Ơi pơtao hok mơ-ak hăng pơtă pơtăn mơnuih ƀon sang jong jơnah jah glai kiăng kơ ngă hmua, man pơdong plơi pla. Mơng anun truh ră âni, mơnuih ƀon sang plơi Hùng Lô hơmâo pơdong pra yang kiăng kơ pioh pơpŭ kơ yang rơbang amăng hơdôm rơbâo thun anai hăng ƀrô lơ 9-10/3 tui blan di rĭm thun arăng juăt pơphun hrơi ngă yang pioh hơdor kơ ơi pơtao. Tui hăng gru grua sô hơđăp, hrơi ngă yang juăt pơphun yôm phăn, hăng prong biă mă hăng hơdôm rơtuh čô mơnuih mut hrŏm nao glăm grê pơtao. Ră anai, amăng să Hùng Lô ăt5 djă pioh 50 boh sang kyâo sô hơđăp mơng 100 thun pơ glông, hơdôm boh sang anai lêng kơ djă pioh gru grua sô hơđăp hăng hơdôm boh sang lăng yôm phara mơng gru grua ngă hmua pơdai. Bruă tŭ yap hrơi gru grua “hrơi ngui Đình Hùng Lô” lĕ gru grua yôm gah bơngăt gưl dêh čar hăng anih tuai čuă ngui amăng plơi pla, anai lĕ hơdôm tơlơi dưi kiăng mơnuih ƀon sang Hùng Lô tŏ tui lăi pơthâo hơdôm gru grua sô hơđăp, pơhưč tuai čuă ngui.

Siu Đoan: Pơblang