Lơ̆m pơdai glăk hroh ƀudah ƀiă tơsă yơh, mơnuih djuai ania Jarai pơphun ngă yang Hri. Amăng hmua pơdai, anih ngă yang Hri, arawng dưm sa čeh tơpai gah Ngŏ. Tui hăng pơjâo Y Phĭ dŏ ƀơi ƀuôn A1, tơring kual Ea Sup, tơring glông Ea Sup, tơring čar Dak Lak. Čeh tơpai dưm gah Ngŏ brơi kơ yang gah ngŏ, anai lĕ yang wai lăng brơi jum dar hăng wŏt yang hăng adai wai lăng brơi ană plơi pla, đang hmua. Pô pơjâo Y Phĭ brơi thâo:

‘’Anai lĕ lơ̆m tơjŭ pơdai, pla kơtor. Ta kiăng ngă yang Hri,yang pơdai. Anai lĕ phiăn juăt mơng đưm đă ră hlâo mơng djuai ania Jarai, ngă yang Hri Hrai, mơnuih djuai ania Jarai iâu lĕ Trum, hơmâo mong ơi yă đưm hlâo yơh. Mơnuih djuai ania Jarai ngă yang pơdai kiăng rơkâo bowih ƀong gêh gal, đang hmua huă kuih kuai ƀong’’.

Kiăng pơphun ngă yang Hri, tha plơi amra ruah ‘’hrơi hiam blan mơ-ak’’ laih anun lăi pơthâo pơphun jơnum plơi, ruah hrơi pơphun ngă yang. Tha plơi pơpha mơnuih amăng plơi pla prap lui hơdôm bruă tui arăng jao. Đa prap lui čeh tơpai, đa prap lui mơnŭ ƀudah un, añăm tam, đing brong…Truh hrơi ngă yang, tơdơi kơ prap lui djop mơta gơnam ngă yang, pơjâo kowưh đĭ, rơkâo yang rơbang glăi lăng anŏ pơpŭ đĭ mơng ană plơi pla. Pơjâo Y Phĭ brơi thâo:

‘’Lơ̆m ngă yang Hri, ƀing gơmơi prap lui gơnam pơyơr. Ƀing pơjâo kah dưi ngă yang. Amăng kơnung djuai hơpă kiăng ĕp kơnung djuai gơñu ngă yang, Ngă yang sa drơi mơnŭ hăng čeh tơpai. Tơdah ƀu hơmâo mơnŭ, tơpai ăt ƀu dưi ngă yang hăng rơmô, tui phiăn juăt mơng djuai ania Jarai anai lĕ mơnong pơ-iă, ngă yang hăng un kah dưi’’.

Ngă yang giong, ƀing tha plơi, pơjâo iâu ƀing hlăk ai hăng ană plơi pla atông čing hơgor. Abih bang mơnuih mơñum ƀong hrŏm, adôh suang, mơñum tơpai hăng adôh hơdôm tơlơi adôh djuai ania pô. Hrơi ngă yang Hri lĕ hrơi ngă yang yôm phăn biă mă, hơmâo sang anŏ hăng mơnuih ƀon sang pơphun hăng tơlơi čang rơmang angĭn rơnang hơjan mơ-ak, pơdai jor kơtor mơboh, pơdah pran gum pơgô|p pơlir hơbit amăng plơi pla, ba glăi pran kơtang amăng mơnuih mơnam, ơi pơjâo Y Phĭ brơi thâo dong:

‘’Bruă ngă yang abih bang mơnuih lêng kơ tui soh. Tơdah tha plơi rơngiă, ƀing hlăk ai ăt ngă yang tui tha plơi mơn. Ƀu dưi ngă rơngiă gru grua djuai ania pô. Đưm đă ră hlâo adih lêng kơ ngă yang soh, mơnuih djuai ania Jarai, Êđê, M’nông lêng kơ pơphun ngă yang soh’’.

Hrơi ngă yang Hri mơng djuai ania Jarai ƀơi tơring glông Ea Sup lĕ sa amăng hơdôm gru grua hiam klă mơng ană mơnuih hơmâo neh met wa lăng yôm hăng djă pioh mơng đưm đă ră hlâo. Anai lĕ hrơi mông kiăng mơnuih amăng sang anŏ, plơi pla tum pơ ƀut pơlăi nao rai bruă pơđĭ kyar bơwih ƀong huă, pơjing sang anŏ yâo mơ-ak hăng kjăp tui pran gum pơgô̆p amăng mơnuih mơnam.