Mơng mơguah sing bring, ƀơi lan sang jơnum pơƀut amăng ƀuôn Ky lu mơnuih tum pơƀut kiăng mut hrŏm hrơi ngă yang. Ƀing hlăk ai djru arăng dưm dăp čing hơgor. Ƀing đah kơmơi buh eng ao hiam mut hrŏm prap lui mông ngă yang…amai H’By La  Byă ƀu hơgŏm tơlơi hok mơ-ak brơi thâo:

“Anai lĕ tal blung a kâo mut hrŏm amăng hrơi ngă yang iâu hơjan yua anun ăt aka ƀu thâo lu hlơi, samơ̆ kâo ăt hok mơ-ak biă mă lơ̆m rai djru hrŏm hrơi ngă yang anai. Hrơi ngă yang iâu hơjan hơmâo lu anŏ yôm phara mơng djuai ania Êđê”.

Gah yŭ phun kyâo prong, mơnuih ƀon sang prap lui dua boh pưk hăng lu gơnam tam pioh kơ ngă yang rơbang. Amăng pưk lĕ pra yang adai, hrŏm hăng hơdôm gơnam pioh pơyơr đĭ yang rơbang. Pưk tal dua arăng dưm kơtor, pơdai. Gah yŭ pưk lĕ rup trah yang sat lĕ yang Le, anai lĕ arăng phak ñu yua kơ pơsur čim brim, hlô mơnong mut nao phă pơrai gơnam đang hmua. Hrŏm hăng anun lĕ hơdôm gơnam pơyơr đĭ yang anun lĕ tơpai čeh, mơnŭ, gơnam yua pơkra hăng kram, djrao hrŏm hăng hơdôm rup trah anet anun lĕ rơman, sua, rơmông…

Lơm hmư̆ jua čing hơdor, pơjâo pơphun ngă yang hăng hơdôm tơlơi iâu lăi pioh glăi mơng đưm hlâo, hăng tơlơi čang rơmang brơi kơ angĭn rơnang hơjan mơ-ak, pơdai jor kơtor mơboh, kah hăng pơkiăo đuăi djrang rơmông, pơkiăo đuăi hơdôm anŏ sat ataih mơng plơi pla. Tơdơi kơ ngă yang, pơjâo yak tơkai jum dar kar hăng hmua pơdai, laih dong pơphun tơjuh pla. Ñu yak nao pơ anăp, dua gah tơngan djă 2 ƀĕ gai arăng krih añueng hlă trun amăng lŏn, kiăo tui tlôn lĕ ƀing đah kơmơi djuai ania Êđê kiăo tui tơjŭ pơdai. Lơ̆m ai djroh trun ƀơi lŏn, abih bang ur hrŏm, hok mơ-ak bơyan tơjŭ pla…

Nao lăng arăng ngă yang iâu hơjan, yă H’Luếch Hđơk, 65 thun brơi thâo:

“Kâo ol kơdol biă mă, yua kâo ƀuh bruă pơphun glăi hrơi hrơi ngă yang tui gru grua mơng djuai ania Êđê ăt pơphun rĭm thun sa wŏt hlâo kơ hrơi tơjŭ pla, anai lĕ phiăn juăt mơng đưm đă ră hlâo laih. Hơdor glăi đưm hlâo adih lơ̆m dŏ anet kâo ăt nao ngui hrŏm, ră anai tha rơma laih ƀuh arăng pơphun glăi ăt hok mơ-ak mơn”.

Tui tha plơi Y Bang Byă, dŏ ƀơi ƀuôn Ky, phường Thành Nhất, plơi prong Buôn Ma Thuột, hlâo adih, hrơi ngă yang iâu hơjan juăt hơmâo mơnuih djuai ania Êđê pơphun amăng bơyan không phang kơtang hloh, tơdơi kơ hrơi čuh amur, dŏ tơguăn ia hơjan jruh trun kah tơjŭ pla. Lơ̆m tơlơi hơdip pơplih phrâo, plơi pla jai hrơi pơplih, đang hmua tui đưm hlâo adih ră anai plih hĭ jing đang tiu, kơphê, lu mơnuih amăng plơi pla hyu mă bruă apah pơ ƀôn prong adih…bruă pơphun hrơi ngă yang jai hrơi aset tui. Hơdôm thun giăm anai, hăng tơlơi gir run gum djru mơng kơnuk kơna, plơi pla hơmâo hơkrŭ glăi hơdôm hrơi ngă yang rơbang, djă pioh gru grua hiam, anăp nao tơlơi hơdip hiam klă:

“Sit biă ñu lĕ kiăng djă pioh gru grua mơng djuai anai lĕ bruă tơnap tap hloh hăng ƀuôn Ky, samơ̆ hơmâo tơlơi đing nao gum djru mơng phường Thành Nhất, hơmâo laih prăk kak kiăng plơi pla pơphun hrơi ngă yang hơjan. Hrơi ngă yang hơjan anai yôm phăn biă mă kiăng kơ angĭn rơnang hơjan mơ-ak, pơdai jor kơtor mơboh, tơlơi hơdip kơ mơnuih ƀon sang jai hrơi hiam klă hăng ba glăi tơlơi hơdip trơi pơđao yâo mơ-ak brơi kơ plơi pla gơmơi kah hăng djop plơi pla ƀơi kual Dap kơdư”./.