VOV4.Jarai - Tơring čar Dak Nông glăk ječ ameč prap lui Jơnum jar kmar kơ luh bung drông čư̆ apui kơdir tal 20 (ISV 20) amra pơphun amăng rơnuč thun anai, hơmâo abih bang dêh čar ding kơna amăng khul pơlir kual lŏn drŏn yôm rong lŏn tơnah UNESCO. Tui hăng tơlơi pơkă hlâo, Jơnum jar kmar kơ luh bung drông čư̆ apui kơdir tal 20 (ISV 20) amra pơphun mơng lơ 22-26/11/2022. Hơdôm bruă mă amăng mông jơnum, lĕ bơkơtuai, pơdă prưng hăng lăi pơthâo, pơsur bơwih brơi tuai čuă ngui hơmâo pơphun ƀơi Sang jơnum prong tơring čar Dak Nông.

Čang rơmang pơđĭ kyar bơwih brơi tuai čuă ngui amăng rơ-ưng gah yŭ  čư̆ apui kơdir Kual  đang UNESCO Dak Nông

Tui yă Tôn Thị Ngọc Hạnh, Kơ-iăng Jơnum min mơnuih ƀon sang tơring čar Dak Nông, tal pơphun jơnum jar kmar kơ luh bung drông čư̆ apui kơdir lĕ hrơi mông tơring čar lăi pơthâo rup rap mơng Kual lŏn drŏn yôm rong lŏn tơnah UNESCO Dak Nông tơl abih bang mơnuih. Anai ăt lĕ hrơi mông kiăng  tơring čar Dak Nông kơsem min kơ luh bung drông čư̆ apui kơdir, pơgôp wai pơgang hăng mă yua klă hloh hơdôm anŏ yôm amăng tơring čar.

Siu Đoan: Pơblang