VOV4.Jarai - Mơguah lơ 9/6, ƀơi Hà Nội pơphun jơnum klah čun, jao pri tal pơplông čih tui anăn pơphun “Ƀing ba gru hiam amăng tơlơi hơdip mơda mơ̆ lăng yôm hloh” tal 13 (thun 2021-2022) yua kơ hră pơhing Ling tơhan; Anom bruă mă tơlơi pơhing - čoh hră pơhing  (Anom pơtô bruă Ping gah dêh čar) gum hrŏm pơphun. Khul pơphun hơmâo ruah 19 tơlơi čih yôm hloh kiăng kơ jao pri. Tal pơplông pơphun mơng blan 6 thun 2021 truh abih blan 4 thun 2022. Khul pơphun hơmâo tŭ mă rơbêh 200 tơlơi čih nao pơplông mơng djop mơta tơlơi čih pơhing.

Hră pơhing Ling tơhan hơmâo ruah čoh amăng hră pơhing mrô 146 hơdôm tơlơi čih yôm hloh, amăng anun Khul pơphun ăt hơmâo ruah 19 tơlơi čih kiăng kơ jao pri anun lĕ: 2 pri prong hloh, 3 pri dong tal 2, 4 pri tal 3, hăng 10 pri pioh pơsur pran jua. Kơ-iăng Khua anom bruă kơđi čar Ling tơhan dêh čar Việt Nam, Khua khul git gai tal pơplông Trịnh Văn Quyết brơi thâo, hơdôm tơlơi čih ăt lăi nao tong ten, lăi pơtong tơlơi găn rơgao hiam klă, tơlơi pơhrăm tui yôm phăn amăng sit nik, hrăm tui, ngă tui tơlơi pơmĭn, pran hơdip hiam mơng Khua mir sir Hồ Chí Minh.

Siu Đoan: Pơblang