Krăo lăng na nao mông jơnum lok 7, khua mua pơ ala mơnuih ƀôn sang dêh čar tal 15, lu mơnuih ƀôn sang ruah khua ƀơi Gia Lai, boh nik ñu mơnuih djuai ƀiă đing nao biă mă kơ tơlơi tơña hăng lăi glăi mơ̆ng Khua ding jum Gru grua, Pơrơguăt drơi jăn hăng Tuai čuă ngui ơi Nguyễn Văn Hùng.

Mơnuih ruah khua čang rơmang anom bruă gru grua amra ngă gêh găl, hơmâo tơlơi phiăn pơkă pioh pơđĭ kyar gru grua hiam phara djuai ania, pơtrut bruă čơkă tuai hyu ngui laih anun pơđĭ tui tơlơi hơdip mơda kơ mơnuih ƀôn sang.

Mơnuih ƀôn sang ruah khua anăn H’Uyên dŏ ƀơi tơring glông Čư̆ Pah, tơring čar Gia Lai lăi:

“Tơdơi kơ jơnum anun, pran jua kâo čang rơmang ƀing pơ ala mơnuih ƀôn sang dêh čar (Quốc hội) đing nao hloh bruă djă pioh gru grua hiam djuai ania tơring čar Gia Lai, kual mơnuih ƀôn sang djuai ƀiă. Djă pioh gru grua đưm kah hăng sang rung (sang rông) khom pơdong djơ̆ hăng gru grua hiam phun mơ̆ng đưm, djop bruă mơñam mrai hăng mơñam rêu ro, rơ-ĭ čơkua kiăng djă pioh, rŭ glăi tơlơi ngă yang ngui ngor mơak mơ̆ng mơnuih ƀôn sang pơ anai kiăng čơđai rơnuk tơdơi thâo hluh lu hloh hăng djă pioh na nao kơñ pơgi adih”.