Mơ̆ng anun truh ră anai, jơlan hơdră hơmâo dăp hăng pôr pơthâo rim hrơi ƀơi Anom bruă Gong phun pơtui jua pơhiăp Việt Nam kual Dap Kơdư, jing gơyut gơyâo jê̆ giăm hăng mơnuih djuai ania K’Ho. Jing juăt laih, rim tơgŭ mơ̆ng pit, bruă blung a mơ̆ng ơi Kơ Să Ha Nhiếu (dŏ ƀơi să Phú Hội, tơring glông Đức Trọng, tơring čar Lâm Đồng) ngă lĕ plang pôr pơhing či pơhmư̆ brô̆ pơtui tơlơi K’Ho mơ̆ng Gong phun jua pơhiăp Việt Nam, Anom bruă kual Dap kơdư pơtui. Ñu lăi: Rơbêh 20 thun rơgao, Jơlan hơdră pơtui tơlơi K’Ho mơ̆ng GPJPVN jing gơyut gơyâo laih. Er pơđok, er pôr mơ̆ng ƀing pôr tơlơi pơhiăp hai ñu thâo krăn mơn. Yua hnun, ñu hơdor rơđah djŏp tơlơi pôr pơhing mơ̆ng rim črăn tơlơi pơhing, mông pôr rim hrơi hăng amăng ha wơ̆t hrơi tơjuh. Amăng anun, ñu hor hmư̆ hloh hăng jơlan hơdră pơtui tơlơi adoh đưm, hơdră pơtô bơwih ƀong, pơtô hlăk ai triang mă bruă bơwih ƀong huă.

“Kâo lăng hơdôm jơlan hơdră hơmâo pơtui amăng brô̆ mơ-ak biă. Juăt pơtô brơi neh met wa hơdră bơwih ƀong, hmư̆ tơlơi adoh đưm, adoh tòng bơr tui hăng mơnuih kơhnâo Ka Ding. Hơmâo lu tơlơi adoh đưm pơtô neh met wa jik bruă ngă hmua, mơñam bung bai. Kâo kiăng hơdôm tơlơi pôr tui anun hơmâo pôr lu hloh, kiăng neh met wa hmư̆ laih anun thâo pơmin tui”.

Hăng yă Cil Bri, Kơ-iăng khua Khul đah kơmơi tơring čar Lâm Đồng, Jơlan hơdră pơtui jua pơhiăp tơlơi K’ho mơ̆ng Gong phun jua pơhiăp Việt Nam jing glông pôr pơhing sit nik mơ̆ng Kơnuk kơna. Ƀu kơnong pôr tơlơi pơhing phrâo amăng lŏn ia wơ̆t hăng čar rơngiao đôč ôh mơ̆, ăt hơmâo lăi pơthâo hơdôm tơlơi pơhing hmư̆ hing hloh amăng kual Dap Kơdư lăi hrŏm hăng amăng tơring čar Lâm Đồng lăi hơjăn. Tui hăng yă Cil Bri, hơdôm tơlơi hơmâo pơtui hăng jua pơhiăp laih anun boh hră mơ̆ng mơnuih djuai ania K’ho amăng glông pôr brô̆ ăt kah hăng amăng plang web VOV4.K’Ho mơ̆ng VOV Dap Kơdư, djru neh met wa hmư̆ tơlơi pơhing djơ̆, hmư̆ tơlơi pơhing tañ.

“Kâo amuaih hmư̆ biă jơlan hơdră pơtui jua pơhiăp hăng tơlơi K’ho mơ̆ng Gong phun jua pơhiăp Việt Nam ƀơi kual Dap Kơdư. Yua dah hơmâo lu jơlan hơdră lăi nao kơ gru grua ta đưm, kơđi čar, bơwih ƀong huă - mơnuih mơnam, djă bong hăng pơgang ba gru grua hiam, pơtô ba adơi amai bruă tơkeng ană bă, ăt kah hăng pơtô ană bă triang mă bruă, hrăm hră, pơtô tlâ̆o vaccine djŏp, kâo lăng hơdôm tơlơi anun kiăng biă hăng bruă mă mơ̆ng pô kâo”.

Hăng Nghệ nhân ưu tú K’Brèm, ră anai glăk mă bruă ƀơi Anom bruă gru grua pôr pơhing hăng bơkơjăp drơi jăn tơring glông Bảo Lâm, tơring čar Lâm Đồng, Jơlan hơdră pơtui jua pơhiăp hăng tơlơi K’ho mơ̆ng Gong phun jua pơhiăp Việt Nam pơhrua tui gru grua boh thâo đưm mơ̆ng djuai ania ta. Yua dah tơlơi črăn hơdră “Tơlơi adoh đưm kual Dap Kơdư”, “Tơlơi adoh 3 kual”, “Pơtruh hăng ƀing hor hmư̆ tơlơi adoh đưm” mơ̆ng Gong phun jua pơhiăp Việt Nam, mơnuih rơgơi kơhnâo K’Brèm hơmâo tơhnal sem lăng bơwih brơi bruă mă gah gru grua ƀơi tơring glông. Ƀrô hrơi ngă lơphet 22 thun pơtui jua pơhiăp djuai ania K’ho mơ̆ng Gong phun jua pơhiăp Việt Nam, Nghệ nhân ưu tú K’Brèm hơmâo tơlơi bơni hơ-ơč:

“Ƀrô hrơi ngă lơphet 22 thun, kâo bơni hơ-ơč kơ Gong phun pơtui jua pơhiăp ƀing ta hiam drơi jăn pran jua, glăi pơ plơi pla lu hloh đah mơ̆ng ĕp ƀuh gru grua hiam mơ̆ng ơi yă ta đưm. Ƀu kơnong hơdôm tơlơi adoh đưm kah hăng đơs ting đơs loong, adoh tam pơ̆t, kồng yai mơ̆ng djuai ania K’ho - Mạ đôč ôh mơ̆, kâo kiăng abih bang neh met wa amăng plơi pla djă pioh hăng pơtrut tui gru grua hiam mơ̆ng ơi yă ta pioh glăi”.

Amăng 22 thun pôr jua pơhiăp, mơnuih pơtui jua pơhiăp hăng tơlơi K’ho mơ̆ng Gong phun jua pơhiăp dêh čar Việt Nam hơmâo lu tơlơi pơmin pran jua mơn. Abih bang mơnuih dăp hơdră, pơblang, mơnuih pôr jua pơhiăp lêng kơ hơdip mơ̆ng djŏp plơi pla či Lâm Đồng soh, nao mă bruă pơ Anom bruă Gong phun pơtui jua pơhiăp Việt Nam kual Dap Kơdư (pơdong ƀơi plơi prong Buôn Ma Thuột, Dak Lăk) či ngă bruă yôm anai. Rơbêh 20 thun ngă bruă, mơnuih dăp hră pơhing ƀu kơnong ngă klă bruă pơblang, pơđok hăng tơlơi djuai ania gơñu đôč ôh mơ̆, ăt pioh mông glăi pơ plơi pla mă bruă, pơhiăp hăng mơnuih hmư̆ brô̆, hyu ĕp tơlơi adoh đưm hăng čih tơlơi pơhing lăi nao hơdôm bruă hơmâo amăng tơlơi hơdip. Ơi K’Brọp, Kơ-iăng khua Anih pơtui jua pơhiăp djuai ania, Anom bruă pơtui jua pơhiăp kual Dap Kơdư (hlâo adih ñu ngă khua wai lăng grup pơtui jua pơhiăp djuai ania K’Ho) lăi:

“Rơbêh 22 thun nao hrŏm hăng Jơlan hơdră pơtui jua pơhiăp djuai ania K’Ho, 7 thun ngă Kơ-iăng khua anih pơtui jua pơhiăp djuai ania, mah ngă bruă hơget tŭ mơn, kâo ăt gir ngă klă djŏp bruă hơmâo jao. Ƀrô 22 thun hrơi blung a Jơlan hơdră pơtui jua pơhiăp djuai ania K’Ho hơmâo pôr amăng brô̆, kâo bơni hơ-ơč kơ abih bang ayong amai adơi dăp hơdră djuai ania K’Ho hiam drơi jăn pran jua, kơjăp tơlơi pơmin pran jua, ngă bruă rơgơi hloh, jing pô pơtruh brơi jơlan hơdră mơ̆ng Ping gah, tơlơi phiăn mơ̆ng Kơnuk kơna kiăng abih bang neh met wa djuai ania K’ho thâo hluh hăng tơlơi pơhiăp djuai ania ta pô, djru djă pioh gru grua hiam mơ̆ng djuai ania K’ho hluai tui jơlan hơdră pôr pơhing hăng plang web ƀơi internet, kiăng jơlan hơdră pơtui jua pơhiăp tơlơi K’Ho ngă mơ-ak pran jua, jê̆ giăm hăng neh met wa djuai ania K’Ho”.

22 thun rơgao, Jơlan hơdră pơtui jua pơhiăp hăng tơlơi K’Ho hrŏm hăng 5 Jơlan hơdră pơkŏn dong ƀơi kual Dap kơdư, hơmâo: Êđê, Jarai, Bahnar, Sêdang hăng M’nông lêng kơ djă bong kơjăp tơlơi pơmin gum pơgôp, gum pôr pơthâo hơdôm jơlan hơdră pơtrun mơ̆ng Ping gah hăng Kơnuk kơna truh pơ abih bang mơnuih ƀôn sang hmư̆. Jơlan hơdră pơtui tơlơi K’Ho jing gơyut jê̆ giăm mơ̆ng ană plơi pla kual Dap Kơdư laih.