Anai lĕ bruă mă amăng rơwang ngă Lơphet jơnum ngui lăi pơthâo hăng Việt Nam thun 2023 mơng Khua anih jưh pơ ala kơ India ƀơi ƀôn prong Hồ Chí Minh, bơkơtuai bôh thâo kơplah wah India hăng tơring čar Dak Lak. Amăng jơlan hơdră anai, mơnuih lăng amra ƀuh hơdôm tơlơi suang pha ra hăng hmâo lu gru bôh thâo đưm mơng India yua kơ grŭp suang Kuchipudi hmâo 6 čô mơnuih thâo suang hloh mơng India pơdah lăng. Tơlơi pơdah suang anai pơphun hăng sa phiăn đĭ ƀơi anih pơdah adôh suang, tơdơi kơ anun rim mơnuih pơhiăp ƀơi anun hăng lăi pơthâo pô hăng bôh yôm mơng tơlơi adôh hăng yun suang kiăng lăi pơthâo gru grua, pơdah pô mơng mơnuih suang.

Rim črăn hơdră lĕ sa tơlơi akhan đưm mơyang, bơni sa čô yang amăng tơlơi đăo mơng India kah hăng Yang rơman Ghanesha, yang Shiva, yang Rama, yang Vishmu, yang Krishna. Hăng hơdôm tơlơi suang pơsôh, bơdjơ̆ nao lu mơta, hơdôm črăn tơlơi adôh suang djru mơnuih lăng ƀuh hăng thâo hluh dong kơ gru grua bôh thâo đưm mơng lŏn ia India. Ơi Mahesh Giri, Khua anih jưh pơ ala kơ India ƀơi ƀôn prong Hồ Chí Minh brơi thâo:

            “Ƀing gơmơi kiăng pok prong ƀu djơ̆ kơnong kơ tơlơi rô nao rai dua bơnah ôh mơ̆ ñu dô̆ wot tom tơlơi sĭ mơdrô nao rai gơnam tam hăng bôh thâo đưm, tơlơi anai yôm phăn hloh. Anun lĕ bôh than yua hơget ƀing gơmơi ƀơi anai amra bơkơtuai dong hơdôm jơlan hơdră anai. Tơlơi anai ngă phun akha kơ tơlơi rô nao rai gưl tơring čar amăng tơlơi rô nao rai ƀing ta, ñu amra djru tơlơi rô nao rai mơng ƀing ta kơjăp hloh. India hăng Việt Nam hmâo tơlơi rô nao rai jê̆ giăm hăng juăt biă, yua anun ƀing gơmơi čang rơmang pơđĭ tui tơlơi rô nao rai anai”./.