VOV4.Jarai-Mơguah lơ 24/4, ƀơi plơi prong Kon Tum, Ding jum gru grua, Pơrơguăt drơi jăn hăng Tuai čuă ngui ngă hrŏm Jơnum min mơnuih ƀôn sang tơring čar Kon Tum pơphun jơnum anăn “Tuai čuă ngui Kon Tum-anŏ gêh găl hăng čang rơmang prong”. Jơnum anai, pơhuč lu mơnuih ngă hrŏm truh 500 čô khua mua, pô sang bruă sĭ mơdrô, mơnuih rơgơi kơhnâo amăng bruă mă; Khul grup, anom bruă ba tuai hyu ngui, khua sang jưh tuai, bruă pơgiăng tuai; ƀing khua mua rai mơ̆ng hơdôm tơring čar dơnung dêh čar Lao, kual ngŏ kơdư dêh čar Kur hơmâo jơlan guai hrŏm hăng tơring čar Kon Tum.

Pơhiăp ƀơi mông jơnum, Khua ding jum gru grua Pơrơguăt drơi jăn hăng Tuai čuă ngui, ơi Nguyễn Văn Hùng lăi, Ding jum  gru grua hăng djop tơring čar amăng dêh čar hlăk hơmâo lu hơdră, pơhưč tuai hyu ngui pioh pơtrut bruă tuai hyu ngui tơdơi kơ abih klin Covid 19. Jơnum tal anai bơkơtuai bruă tuai čuă ngui-anŏ gêh găl hăng čang rơmang prong jing anŏ gêh găl kơ djop sang bruă sĭ mơdrô bưp nao rai, jĕ giăm, hră tơdruă, kĭ pơkôl ngă hrŏm amăng bruă tuai čuă ngui.

Nay Jek: Pơblang