Tlam mơmŏt lơ 23/10, ding kơna ding jum kơđi čar, Khua sang hră kơđi čar dêh čar djă anăn Hồ Chí Minh, ơi Nguyễn Xuân Thắng nao jơnum hrom ƀơk pri Tal pơplông čih tơlơi pơtô djơ̆ pơgang atur tơlơi pơmin mơ̆ng Ping gah, bong glăi hăng tơlơi pơmin soh sat, ngă ayăt roh pơphun tal 2, thun 2022. Tal pơplông anai hơmâo tŭ mă 116 rơbâo tơlơi čih pơblang ba nao pơplông. Khul čom puang hơmâo ruah mă pioh apah bơni 12 pri A; 20 pri B; 30 pri C; 40 pri pơsur pran jua; 20 čô mơnuih čih ƀudah khul čih pơplông, jing tơdăm dra, khul tơdăm dra mut phung, hlăk ai hơmâo tơlơi čih djơ̆ hloh, hiam klă dưi mă pri hăng 15 pri apah bơni kơ khul grup lu mơnuih ngă hrom mơ̆ng djop sang bruă, tơring čar hơmâo pơphun jak iâu lu mơnuih pơplông hrom hăng lu tơlơi pơplông djơ̆.

Mông jơnum jao pri apah bơni kơ mơnuih rơgơi hloh

Pơhiăp ƀơi mông jơnum ƀơk pri, ơi Nguyễn Xuân Thắng lăi: lu tơlơi čih hơmâo ngă atur tơlơi pơtô djơ̆ hăng dưi ngă tui amăng bruă sit nik, yôm biă mă, pioh pơƀut glăi bruă mă pơgang tơlơi pơmin, pran jua, bong glăi hăng tơlơi pơmin soh sat, ngă ayăt roh thun blan rơgao, pơdah thâo anăp ngă bruă pơ anăp adih ngă djơ̆ bruă kơđi čar hơđong kjăp.