Jing pô pơphun ngă, Buôn Ma Thuột hơmâo pơphun truh kih 16/18 bruă phun mơng hrơi Jơnum kah hăng: Jơnum ngui gru grua bơkơjăp drơi jăn djŏp djuai ania ƀiă plơi prong Buôn Ma Thuột; Pơphun ngă jơlan hơdră App Kơphê hăng Tuai čuă ngui; pơphun anih pơdă gơnam brơi mơñum kơphê đôč đač ƀơi jơlan Phan Đình Giót; iâu pơthưr hơdôm boh sang sĭ kơphê brơi mơnuih ƀon sang mơñum kơphê đôč amăng hrơi jơnum ngui...ăt hơmâo plơi prong Buôn Ma Thuột pok pơhai ngă truh kih, pioh glăi tơlơi lăp hơdor hiam biă amăng pran jua tuai nao ngui hăng mơnuih ƀon sang amăng plơi prong.

Tơlơi hmư̆ hing amăng bruă čơkă hrơi Jơnum kơphê Buôn Ma Thuột tal 8 mơng plơi prong anun lĕ hơmâo iâu pơthưr giăm 380 sang sĭ mơdrô kơphê ƀơi 21 boh phường gum hrŏm hrơi Jơnum ngui kơphê brơi ƀing tuai mơñum kơphê đôč, gum pơdă kơphê pơ jơlan rơbat tơkai mơñum kơphê đôč hăng rơbêh 250 rơbâo kơčok ia kơphê. Yap lăng hơmâo nua rơbêh 6 klai prăk. Mơng tơlơi truh kih mơng hrơi mơñum kơphê brơi đôč ƀơi mông Jơnum ngui kơphê Buôn Ma Thuột tal 8, amăng hrơi blan pơ anăp anai, plơi prong amra ruah lơ 10/3 rim thun jing hrơi brơi mơñum kơphê đôč đač ƀơi Buôn Ma Thuột, anăp nao akŏ pơdong Buôn Ma Thuột jing plơi prong pơkra kơphê rŏng lŏn tơnah.