VOV4.Jarai - Hơdor glăi 77 thun hrơi pơdŏng Gong phun jua pơhiăp dêh čar Việt Nam, ƀơi Anom pơtui jua pơhiăp 58 Quán Sứ Hà Nội, Gong phun jua pơhiăp dêh čar Việt Nam pơphun Jơnum ngui adôh suang kual Pơngŏ dêh čar. Hăng anăn ñu bơni kơ tơlơi kiăng khăp plơi pla, lŏn ia, bơni kơ Ping gah, Wa Hồ kiăng khăp, bơni kơ phiăn juăt mơng Gong phun jua pơhiăp dêh čar Việt Nam, ƀing apăn bruă, mơnuih mă tơlơi pơhing phrâo, dăp hơdră, mơnuih mă bruă amăng hơdôm grŭp bôh yôm, hơdôm bôh anom mă bruă ƀơi hơdôm kual amăng đơ đam dêh čar ta hmâo pơdah laih hơdôm tơlơi adôh mơ-ak, klă. Bruă jơnum ngui lĕ tal pioh mơnuih apăn bruă mơnuih mă bruă lok glăi gru grua phiăn juăt sông kơtang mơng Gong phun jua pơhiăp dêh čar Việt Nam gum hrom hăng lŏn ia mơng Hrơi pơdŏng lŏn ia, rơgao dua rơnuk blah wang, pơplih phrâo hăng pơdŏng lŏn ia, pơgang lŏn ia truh ră anai. Djru ngă rŭ đĭ tơlơi kiăng khăp, ư-ang bruă mă, rŭ đĭ tơlơi hor, bruă gơgrong mơng mơnuih pôr pơhing, djă pioh hăng ngă tui phiăn juăt, djru hrom tơlơi pơđĭ kyar mơng lŏn ia. Bruă jơnum ngui ăt jing tal pioh hơdôm bôh anom amăng Gong phun jua pơhiăp bơkơtuai nao rai hrăm tui, bơkơtuai nao rai tơlơi găn rơgao, hruă kơjăp pran jua gum hrom hơbit kơplah wah hơdôm bôh anom, ngă giong klă bruă kơđi čar hmâo jao.

Črăn tơlơi adôh mơng Grŭp pôr pơhing phrâo VOV1 hăng tơlơi gum hrom mơng hơdôm mơnuih apăn bruă hăng lu mơnuih mă čih tơlơi pơhing, dăp hơdră

Mơmot tom brơi lơ 6/9, pơphun mông ngă Lơphet jao pri bơni Jua pơhiăp dêh čar Việt Nam thun 2022. Hơdôm črăn hơdră tơlơi adôh mơ-ak hloh ƀơi hơdôm kual amăng đơ đam dêh čar ta gum hrom pơdah, mơ-ak 77 thun hrơi pơdŏng Gong phun jua pơhiăp dêh čar Việt Nam./.

Siu H’ Prăk: Pơblang