VOV4.Jarai - Jơnum ngui tơlơi adôh suang đơ đam dêh čar tal 2, thun 2021 phrâo pơhun ƀơi Daklak. Hơdôm hrơi rơgao, hơdôm grŭp adôh suang mơng hơdôm bôh tơring čar, ƀôn prong amăng đơ đam dêh čar ta hmâo tuh rơyuh laih kơ mơnuih lăng hmư̆ hơdôm jơlan hơdră klă mơ-ak, djă pioh amăng pran jua. Rim mơnuih pơčeh tơlơi adôh suang, pơdah adôh suang hăng hơdôm anom bruă leng kơ gir run abih pran jua pô kiăng pơdah truh kih.

Tơbiă rai mơng bruă pơđĭ kyar kual lŏn hăng ană mơnuih, grŭp adôh suang tơring čar Bình Dương gum hrom jơnum ngui adoh suang đơ đam dêh čar tal 2, thun 2021 hăng jơlan hơdră adôh suang hmâo anăn “Bình Dương – Lŏn pơđao – Pran jua ană mơnuih”. Amăng 2 jơlan hơdră “Kual lŏn pơđao” hăng “Pran jua ană mơnuih”, mơnuih lăng amra mưn ƀuh rim rơwang pơđĭ kyar mơng plơi pla, mơng hơdôm gru pơđom pioh kơ sa tal pơphun čông jah, pơdŏng plơi pla hăng hơdôm bruă mă đưm. Truh kơ rơwang pơplih phrâo bruă măi mok, pơplih phrâo lŏn ia, lơm tơring čar Bình Dương jing plơi prong pơlar măi mok, jing anih tum pơƀut mơng mơnuih ƀôn sang rai mơng hơdôm plơi pla amăng dêh čar dô̆ hơdip mơda, bơwih ƀong huă.

Ơi Trần Thanh Sơn, Khua Anom bôh thâo – adôh suang tơring čar Bình Dương, črâo ba tơlơi adôh suang, hơdră pơkă hăng git gai jơlan hơdră brơi thâo, hăng hơdôm tơlơi adôh suang, pĕ gông atông brô̆, jơlan hơdră tum pơƀut rơbêh kơ 70 čô mơnuih thâo pơčeh tơlơi adôh, adôh suang, mơnuih apăn bruă, mơnuih mă bruă gum hrom pơdah hăng djru bruă mă gah tlôn.

“Anai lĕ sa bruă pơplông jơnum ngui adôh suang ƀing juăt bruă anun ăt khom hmâo mơn tơlơi tuh pơplai hăng hơdôm jơlan hơdră pơhrăm mơng ƀing gơmơi ăt pơphun mơn năng ai ñu rơbêh kơ 2 blan. Anô̆ klă pơhlôm tơlơi adôh suang lĕ ƀing gơmơi mă yua hơdôm bôh pơhiăp mơng Bình Dương, yap wot gông brô̆ lĕ mă mơng Bình Dương, bơhmutu ñu kah hăng bling, blŏ, get čai hăng hơdôm phun djrao, ƀudah hơdôm hnal kyâu pơkĕ hrom jing ring gông brô̆ djuai ania, kiăng pơdah anai ăt lĕ sa gru pha ra Bình Dương hmâo hơget lĕ ngui anô̆ anun”.

Rim anom pơdah sa tơlơi adôh suang pha ra ƀơi rim kual

Jơnum ngui tơlơi adôh suang đơ đam dêh čar tal 2 thun 2021 hmâo 22 grŭp adôh suang hăng rơbêh kơ 1.000 čô mơnuih pơčeh tơlơi adôh suang, mơnuih adôh suang hăng mơnuih apăn bruă, mơnuih mă bruă adôh suang amăng đơ đam dêh čar ta gum hrom. Khă klin Covid-19 bơbeč truh prong bruă adôh suang samơ̆ hơdôm bôh anom gir run lu laih, pơčeh phrâo amăng pơjing jơlan hơdră, tơlơi adôh suang hăng lu hơdră, lu mơta, djuai. Yak rơgao hơdôm tơlơi tơnap, yua bơbeč mơng klin ruă hăng hơdôm hrơi pơhrăm ječ, ƀing thâo adoh suang hmâo gir run abih pran jua pô kiăng hmâo hơdôm tơlơi adôh suang klă mơ-ak. Pô thâo adôh A Tâm, grŭp adôh suang tơring čar Kontum lăi pơthâo:

“Gum hrom tal anai ñu pha ra biă. Yua kơ tơdơi kơ bơyan klin ngă, abih bang djop bruă mă adôh suang lăi ha jăn hăng hơdôm bruă mă pơkon lăi hrom lĕ nao jơnum ngui hrom tal 2 anai ƀing thâo pơčeh tơlơi adôh suang, ƀing adôh suang glăk dô̆ tơguan. Anun lĕ tơlơi gir run mơng khul grŭp, mơng grŭp khua mua, mơng ƀirô, anom bruă hăng ƀing nai pơtô hmâo mă bruă laih tơpă, run abih pran jua amăng sui hrơi samơ̆ djop mơnuih hmâo tơma sa jua laih”.

Hơdôm tơlơi adôh suang dưi pioh lu mông pơplih pơkra djop mơta tŏng ten

Ƀu djơ̆ kơnong kơ hơdôm bôh anom gum hrom jơnum ngui, bruă bôh thâo adôh suang tơring čar Daklak ăt gir run mơn kiăng pơdah klă bruă mă mơng anom pơphun bruă adôh suang. Tui hăng ơi Đặng Gia Duẩn, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Daklak, khă dô̆ tơnap lu mơta bơhmu hăng tơlơi kiăng pơhlôm kơ tơlơi adôh suang mơng lu jơlan hơdră samơ̆ tơring čar hmâo gir run laih pioh tŭ jum hăng pơpha anih anom klă hloh kơ hơdôm rơbâo čô mơnuih thâo pơčeh tơlơi adôh suang, mơnuih adôh suang gum hrom pơdah, djơ̆ hăng tơlơi kiăng mơng hơdôm khul grŭp kiăng hmâo jơlan hơdră pơhlôm truh kih hloh. Ơi Đặng Gia Duẩn lăi:

“Bruă prăp lui kơ jơnum ngui gơgrong hlâo, abih bang bôh yôm jơnum ngui truh gơnam mă yua, gông brô, apui pơčrang, anih anom dô̆, asơi ia truh hơdôm bôh yôm pơkon lĕ Daklak bơwih lui djop laih tơhnal kiăng pơhlôm mơng grŭp. Tui tơlơi pơsit mơng hơdôm grŭp lĕ truh ră anai Daklak hmâo ngă klă laih bruă mă pô pơphun jơnum ngui tal”.

Pơphun mơng lơ 17 truh abih lơ 30/6, jơnum ngui adôh suang đơ đam dêh čar tal 2, thun 2021 hmâo giăm truh 200 črăn tơlơi adôh suang djop mơta kah hăng adôh, suang, pĕ gông atông brô̆, cải lương, adôh ngă sen, chèo, tuồng. Rim jơlan hơdră sui mơng 65 truh 100 mơnit hmâo ba glăi laih kơ mơnuih lăng hơdôm tơlơi ruai kơ tơlơi hơdip mơda hăng tơlơi adôh suang lăi pơhư̆č pran jua biă. Anun lĕ bôh than mă bruă hăng tơlơi gir run mơng rim mơnuih pơčeh tơlơi adôh suang, mơnuih adôh suang, rim anom adôh suang kiăng djru truh kih hăng lar hyu mơng tal jơnum ngui ngă brơi hơdôm hơdră adôh suang truh giăm hloh hăng mơnuih lăng./.

H’ Xíu: Čih – Siu H’ Prăk: Pơblang