Jơnum min mơnuih ƀon sang plơi prong Kon Tum phrâo pơphun Jơnum ngui ngor anŏ hiam mơng eng ao mơñam tal 2, hăng pơƀuh Plơi tuai čuă ngui Kon Jơ Dri. Anai jing sa amăng lu bruă mă mơng plơi prong čơkă hrơi ngă lơphet 110 thun akŏ pơdong tơring čar Kon Tum (9/2). Tơdơi kơ hrơi pơphun jơnum, ƀing tuai hăng mơnuih ƀon sang hơmâo lăng arăng buh 7 blah djuai eng ao gru đưm mơng djuai ania ƀiă ƀơi Kon Tum kah hăng: Sêdang, Bahnar, Jeh-Triêng, Jarai, Rơ Măm hăng H’rê.

Hrŏm hăng anun lĕ hơmâo pơƀuh eng ao juăt boh rum hrơi hăng eng ao tơčoh kiăo tui gru rơnuk phrâo. Ƀing pơphun bruă anai hơmâo iâu 38 čô mơnuih rơgơi kơhnâo mơng 10 boh să, phường mơng plơi prong Kon Tum mơñam, pơkra eng ao brơi ƀing tuai ƀuh. Ăt amăng tal anai mơn, Jơnum min mơnuih ƀon sang plơi prong Kon Tum hơmâo pơƀuh plơi tuai čuă ngui Kon Jơ Dri, ƀơi să Đăk Rơ Wa. Anai jing plơi tuai čuă ngui tal 3 mơng plơi prong Kon Tum.