VOV4.Jarai-Hăng akŏ tơlơi jơnum ngui “Trường Sơn Tây Nguyên-Gum pơgôp, djă pioh gru grua hăng pơđĭ kyar”, ƀơi tơring glông Kon Plong, tơring čar Kon Tum pơphun tơlơi ngui ngor pơplông adoh suang gru grua đưm djop djuai ania kual čư̆ siăng Trường Sơn-Dap Kơdư pok pơhư prong tal III thun 2022. Anai lĕ, sa amăng hơdôm bruă mă jơnum čơkă hơdor glăi tal 47 thun hrơi pơklaih rơngai tơring čar Kon Tum lơ 16/3/1975-lơ 16/3/2022. Bruă ngă anai, yua kơ anom bruă Gru grua kual plơi pla, Ding jum gru grua Boh thâo Pơrơguăt drơi jăn hăng Tuai čuă ngui ngă hrom Jơnum min mơnuih ƀôn sang tơring čar Kon Tum pơphun.

Pok phun jơnum hlâo ngui ngor, Kơ-iăng  Khua Ding jum gru grua Boh thâo Pơrơguăt drơi jăn hăng Tuai čuă ngui, yă Trịnh Thị Thủy pơphun hrom hăng ƀing khua mua nao gư̆ boh nut pok pơhai bruă mă thun 2022 mơ̆ng Anom bruă Gru grua boh thâo, Pơrơguăt drơi jăn hăng Tuai čuă ngui tui akŏ tơlơi Jơnum: “Akŏ pơjing anih anom gru grua hiam kual plơi pla hăng bruă mă jao bruă kơ mơnuih apăn bruă gah gru grua”.

Hơdôm bruă ngă amăng mlam pok jơnum pơplông gru grua tal anai

Jơnum pok pơhai tal pơplông gru grua adoh suang đưm djop djuai ania kual Trường Sơn- Tây Nguyên pok pơhư prong tal III thun 2022, dưi pơphun hăng jua pôr tơlơi mơak kơdrưh ang biă mă, hơmâo khul atông čing rơkâo anŏ kiăng yua ƀing thâo atông čing mơ̆ng 5 boh tơring čar kual Dap Kơdư, kah hăng Kon Tum, Gia Lai, Dak Lak, Dak Nông hăng Lâm Đồng pơdah hrom.

Nao pơplông hrom hơmâo rơbêh 600 čô mơnuih kơhnăk gru đưm, ƀing thâo adoh suang djuai ania mơ̆ng 19 boh tơring čar, hơmâo tom 5 boh tơring čar amăng kual Dap Kơdư hăng hơdôm tơring čar pơkŏn kah hăng: Tuyên Quang, Vĩnh Phúc, Bắc Ninh, Hải Dương, Hà Nam, Thanh Hóa, Nghệ An, Quảng Trị, Thừa Thiên Huế, Quảng Nam, Quảng Ngãi, Đồng Nai, An Giang hăng ƀôn prong Hồ Chí Minh. Boh nik ñu nao jơnum hrom hơmâo grup adoh suang plơi Kon Trang Long Loi, tơring kual Đak Hà, tơring glông Đak Hà, tơring čar Kon Tum, mơnuih kơhnăk ơi A Thui, thun anai 64 thun, djuai ania Bahnar Rơngao hok mơak brơi thâo:

“Ƀing gơmơi kiăng ba gru grua đưm  djuai ania pô pioh brơi kơ djop mơnuih lăng. Hrơi anai, dưi pơdah amăng tơrưng adoh suang prong anai, dưi bưp hrom khul gơyut gơyâo djop tơring čar lĕ gơmơi mơak biă mă. Dưi bưp hăng ngui ngor hrom lu tơring čar pơkŏn, djop djuai ania lĕ pioh hrăm nao rai tơdruă”.

Amăng mlam pok jơnum ngui ngor gru grua djop djuai ania kual Trường Sơn-Tây Nguyên pok pơhư prong tal III thun 2022, mơnuih ƀôn sang hăng tuai rơnguai amra ĕp lăng hăng ngui ngor amăng mông mơak, hmư̆ adoh suang, atông čing ring hơgor tơ-ua amăng čư̆ siăng, glai klô, hrom hăng suang arăp ik ăk mơ̆ng kual lŏn Dap Kơdư ta pơdah thâo; Ĕp lăng lu tơlơi adoh suang, atông čing hơgor kah hăng klah čun ngă yang iâu bơngăt yă Mẫu Tam Phủ mơ̆ng grup adoh suang tơring čar Vĩnh Phúc; atông čing hơgor mơ̆ng tơring čar Quảng Ngãi; črăn adoh suang: Nguyên Tiêu Thịnh Hội-Ngũ Phú Lâm Môn mơ̆ng ƀôn prong Hồ Chí Minh; pơdah eng ao gru grua….Ơi Nguyễn Công Trung, Kơ-iăng Khua anom bruă wai lăng gru grua hiam kual plơi pla, Ding jum gru grua boh thâo Pơrơguăt drơi jăn hăng Tuai čuă ngui, brơi thâo:

“Găn rơgao dua wơ̆t laih pơphun  truh ră anai, jơnum ngui gru grua anai pơhưč lu mơnuih ngă hrom. Hơmâo sa tơlơi phara biă mă ñu lĕ pơ ala kơ abih bang djop kual, tơring tơrang amăng dêh čar hơmâo ƀuh ƀô̆ mơta ƀơi Măng Đen. Pă hrơi jơnum ngui pơplông adoh suang anai pơdah thâo anih gru grua hiam mơak biă mă. Abih bang djop bruă mă kah hăng adoh pơtưh đưm, suang đưm, pơdah gơnam mơnong huă, gru eng ao đưm djop djuai ania, wơ̆t hăng bruă mă pơrơguăt drơi jăn dơ̆ng. Pă hrơi dŏ amăng anih pơdah gru grua hiam ƀu sui ôh samơ̆ pioh glăi lu tơlơi mơak amăng pran jua mơnuih ƀôn sang djop djuai ania”.

Pơphun pơplông ngui ngor gru grua amăng pă hrơi, mơ̆ng lơ 16 truh lơ 19/3 anai pơplông adoh suang gru grua đưm kual Trường Sơn-Tây Nguyên pok pơhư prong tal III thun 2022, pơphun lu bruă mă, kah hăng: Pơdah tơlơi ngui ngor, pơplông pran kơtang, pơplông tơlơi ngă sen ngui ngor gru đưm amăng plơi pla, tơlơi ngă yang rơbang tơlơi đăo, tơlơi ngui ngor adoh suang, pơtưh nao rai, suang arap, pơdah eng ao, pơdah gong brô̆, čing hơgor kual Dap Kơdư laih anun bruă mă ngui ngor pơrơguăt drơi jăn, tơlơi dŏ dong ƀong huă, hơtŭk riă tơnă hơbai.

Pơphun pơplông adoh suang gru grua hiam djop djuai ania kual Trường Sơn-Tây Nguyên tal III thun 2022 kiăng pơtô lăi thâo djă pioh, pơtô glăi hăng pơđĭ tui gru ama grua amĭ, rơnoh yôm gru grua hiam, tơlơi phiăn klă, tơlơi ngă yang ngui ngor, tơlơi adoh pơtưh, tơlơi suang arap, suang čĭm grư̆, eng ao, mơnong ƀong huă mơ̆ng djop djuai ania kual čư̆ siăng Trường Sơn-Dap Kơdư laih anun pơ ala kơ hơdôm djuai ania adơi ayong amăng dêh čar. Laih dơ̆ng lăi pơtong, tơlơi đăo kơnang nao kơ ping gah, kơnuk kơna, rŭ pơdong glăi tơlơi kiăng djru pơđĭ kyar lŏn ia, pơtrut tơlơi pơmin ia rơgơi thâo gum pơgôp pran jua djop djuai ania.

Kơ-iăng Khua Jơnum min mơnuih ƀôn sang tơring čar Kon Tum ơi Nguyễn Ngọc Sâm brơi thâo: Ƀrô hơdor glăi tal 47 thun hrơi pơklaih rơngai tơring čar Kon Tum, tơring čar hok mơak biă mă dưi hơmâo Ding jum gru grua Pơrơguăt drơi jăn hăng Tuai čuă ngui ruah ngă anih pơphun tơlơi pơplông tal anai. Pơ anăp adih, tơring čar Kon Tum ăt pơtum nao amăng bruă mă phun kah hăng djă pioh, pơđĭ tui rơnoh gru grua hiam mơ̆ng djop djuai ania ƀiă, lir hơbit pơđĭ kyar bruă tuai čuă ngui; pok pơhai tŭ yua hơdôm kơčăo bruă, akŏ bruă pơtrun brơi djă pioh gru grua čing hơgor, sang rung, eng ao đưm, tơlơi adoh, tơlơi suang, gông kơni; đing nao lu hloh kơ ƀing kơhnâo kơhnăk gru grua đưm, mơnuih rơgơi amăng bruă mă tơlơi phiăn plơi pla kiăng djru djă pioh gru grua amĭ hiam klă mơ̆ng djop djuai ania.

Khoa Điềm pô čih-Nay Jek: Pơblang