Hơdôm hrơi rơgao, plơi prong Plei Ku, tơring čar Gia Lai dik dak, hur har hăng tơlơi tum pơƀut mơ̆ng giăm truh 500 čô mơnuih pơplông bơkơjăp drơi jăn amăng Tal jơnum ngui pơplông bơkơjăp drơi jăn djop djuai ania ƀiă đơ đam dêh čar tal 13, kual II thun 2023. Hơdôm anih anom pơplông amăng plơi prong ngă pơhưč tơlơi đing nao hăng pah tơngan mơ̆ng mơnuih ƀôn sang. Hơdôm mơnuih pơplông pơdah pran jua pơplông prong. Ayong Quách Ngọc Hoan, Grŭp bơkơjăp drơi jăn tơring čar Dak Lak, phing kơ pran jua lăi:

 “Pơplông thun 2022, Grŭp tơring čar Dak Lak hmâo mă pri mrô sa abih bang grŭp pơplông pơnah hrăo. Grŭp Dak Lak nao pơplông bơkơjăp drơi jăn djuai ania ƀiă thun anai lĕ grŭp ƀing gơmơi gir run abih pran jua. Khă hmâo lu grŭp thâo pơnah hrăo kah hăng Bình Định, Gia Lai, Kon Tum, Quảng Ngãi, samơ̆ lơm pơhrăm grŭp ƀing gơmơi ăt gir run abih pran jua mơn pioh pơhrăm, gir run abih pran jua pô pioh pơgang bôh tơhnal klă kah hăng thun hlâo”.

Ƀơi tal pơplông anai, Gia Lai, Dak Lak hăng Kon Tum lĕ hơdôm anih anom gum hrom djop 7 mơta tơlơi pơplông. Ơi Nguyễn Văn Ý – Kơ-iăng Khua Gơnong bruă bôh thâo – bơkơjăp drơi jăn hăng tuai čuă ngui tơring čar – brơi thâo: Hmâo 10 thun laih Gia Lai mơ̆ng pơphun bruă pơplông gưl đơ đam dêh čar. Anai lĕ tơlơi jơnum ngui prong, ƀu djơ̆ kơnong kơ hơdôm tơlơi bơkơtưn bôh thâo bơkơjăp drơi jăn ôh mơ̆ ñu dô̆ jing anih anom bơkơtuai nao rai, tum pơƀut mơng djop djuai ania adơi ayong. Grŭp tơring čar Gia Lai hmâo tơlơi pơhrua nao mơnuih hăng khul pơplông hlăk ai čang rơmang. Biă ñu, tơlơi pơplông pơnah hrăo hmâo lu mơnuih hmâo bôh than lăp djă pioh. Ƀing čơđai dưi pơhrăm găn rơgao hơdôm tal pơplông amăng tal Pơplông bơkơjăp drơi jăn đơ đam tơring čar amăng thun 2022. Ayong Rčom Dác – Grŭp bơkơjăp drơi jăn tơring čar Gia Lai lăi pơthâo:

 “Anai lĕ tal 4 kâo gum hrŏm pơplông đơ đam dêh čar, amăng 3 tal pơplông hlâo kâo hmâo mă 6 bôh miđai ia mah. Thun anai kâo hmâo mă sa bôh miđai ia mah gah pơplông đuăi 100m, kâo gir run hmâo mă dong miđai pơplông đuăi 300 m. Kâo kiăng mă brơi hơdôm miđai anai kơ gơyut gơyâo, hăng mơnuih jê̆ giăm, kiăng amĭ ama kâo pơ-ư pơ-ang”.

Bruă jơnum ngui pơplông bơkơjăp drơi jăn djop djuai ania ƀiă đơ đam dêh čar tal 13, kual II ƀu djơ̆ kơnong kơ sa tơlơi jơnum ngui tŭ yua kơ hơdôm mơnuih pơplông ôh mơ̆, ñu dô̆ jing sa tơhnal pioh ngă tui bôh thâo đưm hăng pran jua gum hrŏm hơbit mơ̆ng djop djuai ania adơi ayong. Bruă pơplông ăt djru mơn kơ tơlơi pơđĭ kyar mơng bơkơjăp drơi jăn hăng tuai čuă ngui mơng kual II lăi ha jăn hăng đơ đam dêh čar lăi hrŏm. Ơi Nguyễn Liên Phương - Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Quảng Ngãi, lăi:

 “Tơlơi jơnum ngui pơplông lĕ abih bang hơdôm grŭp mơng 13 grŭp rai pơ̆ anai hăng tơlơi mơ-ak klă. Bôh than phun lĕ pioh bơkơtuai gah bôh thâo hăng bơkơjăp drơi jăn kiăng neh wa djuai ania ƀiă pơbưp nao rai hăng jai hrơi jai gum hrŏm hơbit hloh”.

Jơnum ngui thun anai tum pơƀut giăm truh 500 čô mơnuih pơplông mơng 13 bôh anih anom hmâo neh wa djuai ania ƀiă dô̆ hơdip mơda ƀơi kual gah Dơnung mơ̆ng ƀôn prong Đà Nẵng anun lĕ: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Dak Nông, Bà Rịa-Vũng Tàu, Bình Định, Dak Lak hăng Quảng Ngãi. Bơhmu hăng jơnum ngui pơplông tal 12 dưi pơphun ƀơi tơring čar Quảng Ngãi amăng thun 2022, pri tal anai hmâo dong grŭp Bà Rịa – Vũng Tàu. Amăng tal jơnum ngui thun anai, ƀing nao pơplông, pơplông 7 mơta tơlơi pơplông anun lĕ: Pơplông đuăi, đă bôh lông, pah bôh lông gah đah kơmơi – rơkơi, pơnah hrăo, đĭ gai sưng, hơtŭn gai hăng dui hrĕ. Gum hrŏm hrơi jơnum ngui, Y Thơ Hwing gah grŭp tơring čar Dak Lak, lăi:

 “Pran jua kâo hăng ƀing adơi ayong amăng grŭp tơring čar Dak Lak hok hor biă yua kơ hrơi jơnum ngui anai jing sa hrơi jơnum ngui gum hrŏm hơbit djop djuai ania ƀiă anun kâo hăng ƀing adơi ayong amăng grŭp mơ-ak biă. Anai lĕ tal klă hloh pioh abih bang hơdôm mơta tơlơi pơplông lăi hrŏn hmâo tal bơkơtưn hăng ƀing adơi ayong djuai ania pơkŏn. Rơgao hơdôm tal pơplông tui anai ăt pơtrut mơn pran jua hor kơ bơkơjăp drơi jăn hăng pơhrăm pran jua tui gru Wa Hồ ngă tui amăng khul djop adơi ayong djuai ania. Mơ̆ng anai ăt jing tal ƀing gơmơi pơđĭ tui bôh thâo bơkơjăp drơi jăn hăng hmâo mă bôh than kơ plơi pla pô”.

Jơnum ngui pơplông bơkơjăp drơi jăn djop djuai ania kual II dưi pơphun rim tal 2 thun sa wot, anun lĕ bruă mă kiăng ngă tui hơdră pơtrun mơ̆ng Ping gah hăng Kơnuk kơna gah pơđĭ kyar bơwih ƀong, bôh thâo, mơnuih mơnam, bơkơjăp drơi jăn kơ neh wa djop djuai ania ƀiă; Pơđĭ kyar prong bruă pơhrăm hăng pơplông bơkơjăp drơi jăn pơđĭ tui tơlơi suaih pral, pơđĭ tui tơlơi hơdip bôh thâo pran jua kơ mơnuih ƀôn sang; pơtrut kơtang bruă lăi pơhing, pơsur neh wa djop djuai ania ƀiă gum hrŏm klă Bruă pơsur “Abih bang mơnuih ƀôn sang pơhrăm drơi jăn tui gru Wa Hồ krên dên”, hăng pran jua “Suaih pral pioh pơdŏng hăng pơgang lŏn ia” nao hrŏm hăng Bruă “Abih bang mơnuih ƀôn sang gum hrŏm hơbit pơdŏng tơlơi hơdip tâ̆o yâo” ƀơi plơi pla./.