VOV4.Jarai - Tom brơi lơ 19/5, ƀơi Đồng Tháp sit nik pơphun Jơnum ngui Sen Đồng Tháp tal 1, thun 2022, tơlơi jơnum anai hơmâo pơphun djơ̆ hrơi hơdor tal 132 thun hrơi tơkeng Khua mir sir Hồ Chí Minh (19/5). Hăng anăn “Sen hrơi phrâo”, Jơnum ngui Sen Đồng Tháp ba glăi tơlơi čang rơmang, kơtưn ataih hloh mơng Ping gah, gong gai hăng mơnuih ƀon sang Đồng Tháp, čih tui hrơi blan akŏ pơdong hăng ba pơƀuh anăn Đất Sen Hồng. Jơnum ngui Sen hơmâo pơphun lơ̆m djŏp bruă sĭ mơdrô, bơwih brơi, tuai hyu ngui hơmâo rŭ glăi tơlơi kơ sui hrơi pơdơi hĭ yua hơmâo klin Covid-19.

Ơi Phạm Thiện Nghĩa, Khua Jơnum min mơnuih ƀon sang tơring čar Đồng Tháp brơi thâo, Jơnum ngui Sen tal anai ƀu kơnong ngă tui djơ̆ tơlơi kiăng nao lăng, pơbưp, pơčeh phrâo gru grua hiam đôč ôh mơ̆, anai jing hrơi kiăng pơtruh, pơbưp nao rai ƀing bơwih ƀong gah phun bơnga Sen, mơng ƀing mơnuih kiăng ba phun Sen pơƀuh kơ gơyut gơyâo jar kmar.

Siu H’Mai: Pơblang