Mông jơnum pơčrong sai bơkơtuai anai hơmâo lu mơnuih rơgơi kơhnâo kač rup, čơphil rup mơ̆ng 36 boh tơring čar, ƀôn prong gah kual Dơnung. Ƀơi mông jơnum, lu tơlơi čih pơhiăp lăi pơthâo, pơblang tong ten hăng anăp ngă bruă pơđĭ kyar gah bruă čơphil rup Việt Nam; anăp nao pơđĭ kyar bruă mă rơnuk ba yua ia rơgơi mrô; ba yua boh tơhnal pơjing rai mơ̆ng ia rơgơi ană mơnuih juăt lăi AI amăng bruă pơtong glăi, čom puang, ruah mă rup hiam ba pơplông; brơi gum hrŏm bruă kơnuk kơna hăng mơnuih ƀôn sang djru amăng bruă khul grup čơphil rup; kiăng pơlar tui lu tơlơi pơčeh phrâo kač rup, čơphil rup; tuh pơ alin kơ bruă mă čơphil rup.

Lu khua mua lăi lĕ, bruă mă boh thâo ia rơgơi phrâo mă rup djru kơ bruă čơphil rup hăng kač rup pơjing rai gơnam rup hiam hăng jai hrơi klă hloh, prong tui, lu mơta hăng lu hơdră mơ̆n. Mah hnun, bruă mă čơphil rup ăt kiăng djă pioh hăng pơđĭ tui anŏ hiam boh tŭ yua tơpă mơ̆ng rup pơjing rai.