VOV4.Jarai - Gơnong bruă bôh thâo, bơkơjăp drơi jăn hăng tuai čuă ngui tơring čar gum hrom hăng Grŭp djuai ania tơring čar Daklak pơphun Jơnum ngui bơkơjăp drơi jăn djop djuai ania ƀiă tơring čar Daklak thun 2022. Bruă jơnum ngui pơplông hmâo pơphun dik dăk hăng 7 mơta tơlơi pơplông mơng ƀing đah kơmơi hăng đah rơkơi anun lĕ: pơplông pah bôh lông, đă bôh lông ƀơi tơdron đă anet, pơplông đuăi, đĭ gai sưng, pơnah hrăo, tŭn gai hăng dui hrĕ; ngă pơhư̆č rơbêh kơ 600 čô mơnuih nao pơplông.

Ƀơk pri kơ hơdôm grŭp hmâo mă pri prong hloh

Anai lĕ pri bơkơjăp drơi jăn tui phiăn juăt dưi pơphun rim thun, kiăng pơlar prong bruă pơhrăm drơi jăn pran jua hăng pơplông bơkơjăp drơi jăn, pơđĭ tui tơlơi suaih pral. Mơng anun ruah mă hơdôm mơnuih thâo pơplông hloh, hmâo bôh than prong kiăng pơhrua nao amăng hơdôm grŭp mơng tơring čar gum nao pơplông bơkơjăp drơi jăn djop djuai ania ƀiă đơ đam dêh čar amra pơphun ƀơi tơring čar Lai Châu amăng thun anai. Pơđut bruă pơplông, Grŭp pơphun bruă pơplông hmâo ƀơk laih 149 pri mrô sa, mrô dua, mrô tlâo ƀơi hơdôm mơta tơlơi pơplông kơ rim  mơnuih, anom bruă hmâo mă pri. Tơring glông Krông Ƀuk hmâo mă pri mrô sa grŭp./.

Siu H’ Prăk: Pơblang