Kiăng hmao lăi pơthâo amăng tal jơnum prong ngui ngor Festival Ia Rơsĭ, Gơnong bruă Gru grua, Pơrơguăt drơi jăn hăng Tuai čuă ngui tơring čar Khánh Hòa ngă hrŏm anom bruă Hră pơhing hăng Pơtui jua pơhiăp, Pơdah rup Khánh Hòa hrŏm hăng lu mơnuih rơgơi kơhnâo, mă bruă khom kơtưn pran jua soh, pơmut djop čih hăng mrô rơbêh 20 bit anih hiam pơhưč tuai hyu ngui, nao ĕp lăng hăng dŏ glăi, jing anih gru grua hăng anih tuai sem lăng hiam kah hăng Pra yang yă Pô Nagar, pra djă pioh Trầm Hương, bul pơtâo anih ngui Hòn Chồng, Sang bruă kơsem min ia rơsĭ, Sang Nhà hát Đó, mơnai ia rơsĭ Nha Trang…..Djop mrô rơnoh čih pioh pơčrang hăng anŏ bơngač 3D, mă rup video hăng flycam, mă rup jum dar djop akiăng 360 đô̆ mơtam hăng pơsir hiam, lăng rơđah rơđong tum teč ƀơi anih mă rup djơ̆ tong hloh hlâo kơ pơmut hrŏm lăi pơthâo abih bang amăng atur mrô.

Ơi Nguyễn Xuân Duy, Kơ-iăng khua sang bruă Hră pơhing hăng Jua pơhiăp, Pơdah rup Khánh Hòa brơi thâo, bruă ngă hrŏm plah wah sang bruă hră pơhing phrâo hăng ba yua boh thâo ia rơgơi amra pơjing rai hơdră mă bruă pôr pơhưč phrâo rơnuk anai, djru kơ ƀing tuai rơnguai ĕp lăng tañ, hmar ƀuh hăng či nao găn rơgao, hyu ngui gêh găl amuñ hloh amăng hơdôm hrơi či hyu ngui mơ̆ng gơñu:

“Anŏ gêh găl mơ̆ng tơlơi pơhing phrâo lĕ, ngă tui lu jơlan hơdră pôr pơthâo tơlơi pơhing, gơmơi ngă tui bruă jao pơtô pơblang ngă hrŏm, hơmâo khul thâo ba yua ia rơgơi mrô, hơdai gum hrŏm mă rup, video pôr tơlơi pơhing, hơduah ĕp hăng lăi pơthâo anih či nao ngui dŏ glăi djă pioh mrô rơnoh. Amăng tơlơi ră ruai anun, ƀing gơmơi djru kơ ƀing tuai rơnguai amuñ hloh tŭ mă tơlơi pơhing, anih či nao ngui. Boh thâo ia rơgơi mrô lĕ anŏ ba yua găl biă, bơ bruă tơlơi pơhing phrâo lĕ mơnuih ră ruai brơi, lăi pơthâo, ba pơhưč ba tơlơi mơak, bang bơngač tơlơi hiam klă kơtang hloh”.

Atur ia rơgơi mrô lăi pơthâo anih tuai čuă ngui Khánh Hòa ƀu kơnong lăi pơthâo rup rap hơdôm plơi pla, anih anom tuai či čuă ngui đôč ôh, hlong pơdah thâo hăng rup 3D, hră lơkak pơčrâo jơlan, anih či nao, anih pơblih prăk kăk, anih čih anăn apah tuôr hyu ngui lăi pơthâo amăng online soh, lăi pơthâo brơi sang jưh tuai, anih hơduah ĕp sang sĭ mơdrô huă ƀong, mơnong ƀong huă, rơdêh apah đĭ hyu, djop bruă mă amăng Festival Ia rơsĭ hrŏm hăng anŏ kiăng gêh găl amuñ nao rai, anih jưh rơdêh, đĭ trun rơdêh, tơdrun kompan ƀudah sang juă glai…hơmâo soh. Mơ̆ng anun, khul tuai hyu ngui sem lui hlâo thâo tañ djop tơlơi pơhing anŏ či kiăng, hơduah anih či hyu. Dăp hơdră, hrơi mông, jơlan nao hruaih hơmâo lăi pơthâo brơi, pơƀuh amăng online soh, kơnong lăng amăng măi telephôn rơgơi amra thâo abih tơlơi pơhing či kiăng. Dưi lăng bruă ngă pơblih mơ̆ng pôr pơhưč kah hăng hlâo, jing pơdah thâo djop tơlơi pơhing anih hơdip jum dar djop mơta, lăi pơthâo jơlan tuai hyu ngui hăng anŏ ia rơgơi pơčrâo ba, lăng kơ anŏ hyu ngui dŏ glăi ngă mơak kơ tuai rơnguai jing phun. Amai Bùi Thị Ngọc Trâm, să Khánh Vĩnh, tơring čar Khánh Hòa čang rơmang:

“Hlâo adih kâo ăt sem laih amăng atur ia rơgơi mrô tơlơi pơhing gah gru grua djuai ania Čăm hăng ƀuh hiam biă mă yua rup hiam, tơlơi pơhing pơdah brơi kơ ta lăng hăng amuñ či thâo krăn. Atur ia rơgơi mrô phrâo rơnuk anai tui anun yơh ñu, kơnong kiăng mut ĕp lăng amăng jơlan mut, juăt lăi link amra pok brơi kơ ta bơnah ĕp lăng djop mơta amăng tơring čar Khánh Hòa ngă hơbôt anet samơ̆ tum teč, gêh găl brơi kơ bruă lăi pơthâo gơyut gơyâo ataih jĕ thâo amuñ hloh”.

Tui hăng yă Hoàng Thị Bích Hạnh, Sang bruă djru ba yua boh thâo ia rơgơi phrâo hră pơhing phrâo, gah anom bruă hră pơhing phrâo, Ding jum Gru grua, Pơrơguăt drơi jăn hăng Tuai čuă ngui dêh čar lăi, ƀing mơnuih rơgơi kơhnâo pơtum pơkra ming, sem lăng tong ten mrô rơnoh čih pioh kiăng pơhlombrơi ba yua atur tơlơi pơhing mrô lăi pơthâo anih tuai hyu ngui Khành Hòa hăng ba yua djơ̆ hơdră.

“Ră anai, hơmâo 20 bit anih hiam hloh mơ̆ Khánh Hòa ruah mă pioh lăi pơthâo amăng plang atur tơlơi pơhing mrô. Abih bang amăng khul pơtum tong ten kơ bruă sem lăng pơblang glăi rơđah, pơsir djơ̆ dăp mrô čih pioh, jŭ yap glăi, pơsit hĭ djop boh yom phun či pơdah thâo plang tơlơi pơhing atur mrô kơ tuai hyu ngui ĕp lăng”.

Lăi pơthâo plang tơlơi pơhing atur mrô djơ̆ tal jơnum prong mơak Festival Ia rơsĭ Khánh Hòa thun 2026, atur ia rơgơi mrô tơlơi pơhing kơ tuai hyu ngui-kah hăng sa pok hră, bơnah plăng čih tơlơi pơhing djop pơčrâo brơi tuai hyu ngui thâo hăng mrô hmar hloh kwo Khánh Hòa, ƀu kơnong bơwih brơi tuai hyu ngui amăng bơyan ngui ngor đôč ôh, dŏ jing atur pioh ĕp lăng mrô rơnoh, lăi pơthâo djop kơ anom bruă čơkă tuai hyu ngui, djru hrŏm bruă man pơdong tơring čar Khánh Hòa amra jing anih nao ngui hăng tơlơi pơhing hmar ia rơgơi phrâo, kiăo tui hmao hăng rơnuk anai, lăp hăng anŏ pơhno kơtang lăp djơ̆.