Tơlơi lăp đing nao mơ̆ng Festival tal anai lĕ jơlan hơdră tơlơi adoh suang hơmâo dăp hlâo, pơphun lu črăn hiam mơak biă mă, hơmâo lu mơnuih rơgơi kơhnâo adoh suang amăng dêh čar hăng grup adoh suang mơ̆ng jar kmar; tơlơi ngui ngor Carnival, rơbat pơtrui, rŭi rơdêh pơhrôp bơnga hrŏm hăng adoh suang pơhrôp tom ƀing đĭ rơdêh thut pơprong, môtô hăng rơdêh ôtô đưm, ngă pơhưč pran jua amăng mông ngui ngor mơak phara tal anai; hơdôm hơpluh bruă ngă gru grua hiam, pơrơguăt drơi jăn, tuai čuă ngui, pơdah gơnam ƀong huă ngui ngor dưi pơphun ƀơi lu anih anom, mơ̆ng plơi prong truh pơ plơi pla, pơhưč khul tuai hyu ngui hăng mơnuih ƀôn sang nao ĕp lăng ngui hrŏm.

Đĭ pơhiăp pơđut mông jơnum ơi Nguyễn Long Biên, Kơ-iăng khua Jơnum min mơnuih ƀôn sang tơring čar Khánh Hòa, Khua khul pơphun bruă mă ngui ngor Fesrival Ia rơsĭ Khánh Hòa 2026 lăi pơtong, tal jơnum ngui anai hơmâo ba brơi kơ abih bang ƀuh anih anom ngui ngor, gru grua, adoh suang, pơrơguăt drơi jăn hăng tuai čuă ngui mơak biă mă; adoh bơni kơ gru hiam ană mơnuih, plơi pla ƀơi Khánh Hòa; râo pơdưh pran jua tơlơi khăp hăng tơlơi lăp pơ-ư ang kơ ia rơsĭ, plơi pla amăng bul pơtâo plao amăng ia rơsĭ prong dêh čar ta:

“Kâo đăo sit lĕ hơdôm tơlơi găn rơgao hiam klă amăng tal Festival Ia rơsĭ Khánh Hòa 2026 amra ba gơyut gơyâo amăng dêh čar hăng jar kmar jĕ giăm hloh, thâo hluh nao rai tơdruă rai pơ Khánh Hòa; kiăng rim wơ̆t pơwơ̆t glăi pơ Khánh Hòa lĕ amra mưn amăng pran jua tong ten hloh kơ kual lŏn hiam ană mơnuih tơpă, gru grua mơak hăng čang rơmang prong pơđĭ kyar plơi pla bul pơtâo ia rơsĭ. Khánh Hòa ăt pok pơhư prong na nao, guang tơngan čơkă gơyut gơyâo djop anih hăng kiăng bưp glăi ƀing gơyut amăng bơyan Festival Ia rơsĭ pơ anăp adih dơ̆ng-anih hơmâo ia rơsĭ jơngeh hiam, tơlơi khăp ană mơnuih tơpă sit thâo luă gŭ laih anun tơpưn nao pơ ia rơsĭ prong, amra čih pioh lu bơnah ră ruai gru haim phrâo dơ̆ng”.

Dơ̆ng mơ̆ng rơnoh yom hơmâo pơjing rai, Festival jing anŏ pơtruh brơi, pok jơlan lu anŏ gêh găl ngă hrŏm tuh pơ alin, sĭ mơdrô, gru grua hăng tuai čuă ngui Khánh Hòa hăng lu tơring čar, bơnah ngă hrŏm hăng tač rơngiao laih anun jar kmar. Khul khua mua pơphun bruă mă čang rơmang rim wơ̆t tuai rai ngui amra jing kah hăng sa čô ling jang hiam pôr pơthâo brơi kual lŏn ia, ană mơnuih Khánh Hòa hăng gơyut gơyâo djop anih. Djă pioh boh tơhnal tŭ yua Festival Ia rơsĭ, pơ anăp adih Khánh Hòa amra pơphun lu tơlơi ngui ngor pơkŏn jar kmar, amăng anun, pơplông dra jŭ yuan hiam hloh rŏng lŏn tơnah tal 73 ( Miss World) hăng dra jŭ yuan hiam hloh anăn Miss Cosmo.

Tơring čar Khánh Hoà ăt pơkă tơhnal či ngă tŏ tui pơblih phrâo hơdră pơphun kiăng Festival Ia rơsĭ jing anăn păn gru grua hiam ia rơsĭ gưl jar kmar, jing pran kơtang pơtrut pơđĭ kyar bơwih ƀong huă, čơkă tuai hyu ngui, pơhưč tuh pơ alin hăng ngă tui anŏ kiăng pơđĭ kyar tañ, hmar hloh hăng hơđong kơjăp amăng rơnuk rơbâo thun phrâo.