Khua dêh čar ơi Phạm Minh Chính hok mơak čơkă jum Kơ-iăng Khua dêh čar, Khua ding jum ling tơhan dêh čar Australia, rai čuă jơmư Việt Nam. Khua kơnuk kơna Việt Nam lăng yôm boh tơhnal ngă hrom gah ling tơhan dua bơnah thun blan rơgao, jing anŏ bơngač amăng bruă ngă giăng mah dua bơnah, boh nik ñu pơtô hrăm, pơgang tơlơi rơnuk rơnua Sang gum hơbit djop dêh čar, bruă ia jrao tơhan, boh nik ñu Jơnum khua mua ding jum ling tơhan djop dêh čar ASEAN pok pơhư prong (ADMM+).

Khua dêh čar ơi Phạm Minh Chính rơkâo dua bơnah ăt pok pơhai hơdôm bruă ngă hrom hlăk hơmâo, đing nao pơtrut ngă hrom pơgang tơlơi rơnuk rơnua kơ Sang gum hơbit djop dêh čar; rơkâo dêh čar Australia ăt djru kơ bruă pơdŭ pơgiăng gơnam sang ia jrao tơhan jăng jai hnong mrô 2 mơ̆ng Việt Nam nao pơ dêh čar Dơnung Sudan amăng thun 2023, ăt kah hăng hơdôm thun tŏ tui, mơ̆ng anun, kiăng pơdah rai bruă ngă glăm ba mơ̆ng dua bơnah hăng bruă hrom amăng jar kmar.