![Giàng Seo Pùa/VOV4/Nay Jek pơblang](/themes/custom/vov_4/images/avatar.png)
Thâo hluh tong ten tơlơi pơmin mơ̆ng Hồ Chí Minh, tơlơi thâo dơlăm anih dŏ, bruă mă, tơlơi gơgrong yôm mơ̆ng gru grua hiam: “jing bơngăt jua kơ djuai ania”, “gru grua hiam dŏ Djuai ania ăt dŏ”, Khua git gai ping gah ơi Nguyễn Phú Trọng hơmâo pioh lu tơlơi pơmin, pran jua, mă bruă kiăng akŏ pơdong atur gru grua hiam phrâo, djă jă gru grua along mơ̆ng djuai ania, jing atur kơ pran jua mơnuih mơnam, tơlơi kơtang amăng lăm adih, anŏ ngă pơtrut yôm pioh kơ dêh čar pơđĭ kyar. Lơ̆m git gai mông jơnum đơ đam dêh čar pơtô ngă tui, pok pơhai ngă tui hră pơtrun mrô 23 mơ̆ng Ding jum kơđi čar kơ Anăp či ngă bruă pơđĭ kyar bơwih ƀong huă mơnuih mơnam dêh čar, pơhlôm pơgang lŏn ia, rơnuk rơnua ƀơi kual Dap Kơdư truh thun 2030, lăng nao pơ anăp adih truh thun 2045, Khua git gai ping gah ơi Nguyễn Phú Trọng tom lăi pơtong tui anai:
“Akŏ pơdong atur Gru grua hiam kual Dap Kơdư phrâo djă jă gru grua phun djuai ania ƀiă, djă pioh djơ̆ hnơ̆ng amăng lu mơta ia iom gru grua anun. Khom pơpŭ rơnoh yôm gru grua hiam anŏ phara hơjăn plah wah djop djuai ania ƀiă, lăng anai kah hăng pran kơtang brơi bruă pơđĭ kyar hăng mut phung jar kmar. Đing nao hlâo djă pioh, wai pơgang, rŭ glăi hăng pơđĭ tui rơnoh yôm gru grua hiam, rơnoh yôm gru phun mơ̆ng đưm, anih anom pioh atông čing ring hơgor kual Dap Kơdư. Kâo kiăng lăi nao kơ anŏ gru grua hiam. Lăng nao pơ kual Dap Kơdư ƀing ta ƀuh hơmâo gru grua hiam phara biă mă, ƀing gih khua mua apăn bruă khom gir hơduah ĕp ba yua dưi mơ̆n? Anai ƀu djơ̆ kơnong kơ gru grua hiam mơak pran jua đôč ôh, anai lĕ djă pioh gru grua hiam mơ̆ng đưm djop djuai ania, laih anun anai lĕ ăt jing plang pioh kơ ƀing ta ngă bruă bơwih ƀong huă amăng rơnuk anai sa tơlơi hiam pơhưč pran jua biă mă”.
![Khua git gai ping gah ơi Nguyễn Phú Trọng](https://vov4-media.solidtech.vn/sites/default/files/styles/large/public/2024-07/anh_tong_bi_thu_nguyen_phu_trong_25-7.jpg)
Čăng glăi 13 thun pơ klôn adih, lơ̆m Khua git gai ping gah ơi Nguyễn Phú Trọng nao čuă tơring glông Mường Lát, tơring čar Thanh Hóa, ơi Lầu Minh Pó, Kơ-iăng khua hơđăp git gai ping gah tơring glông Mường Lát ăt hmư̆ hiăp pơtă pơtăn mơ̆ng Wa anun lui hĭ tơlơi phiăn hơđăp ƀu gêh găl, ƀu klă laih anun brơi djă pioh gru grua hiam along mơ̆ng djuai ania đôč. Ră anai, mơnuih ƀôn sang djuai ania Hmông ƀơi Mường Lát lui hĭ laih hơdôm tơlơi phiăn juăt ƀu klă đưm, kah hăng hơmâo mơnuih djai ƀu dưm amăng bông ba dor laih anun brơi pơlar tui gru grua hiam pơkŏn hơđăp dŏ djă pioh:
“Gru grua hiam djuai ania lơ̆m rai čuă jơmư Wa lăi, mah hiư̆m pă, djuai ania pơpă hai ăt khom djă pioh gru grua hiam mơ̆ng djuai ania ta, yua kơ anun djuai ania Hmông ră anai ăt dŏ djă pioh gru grua hiam mơ̆ng đưm, kah hăng tơlơi phiăn pơdŏ rơkơi bơnai. Ană dra sit truh dra laih khom triăng mă bruă laih anun dŏ rơkơi, anun lĕ tơlơi phiăn gru grua djuai ania Hmông. Đơ đa gru grua ngui ngor mơak ayup đing khèn, ayup đing diap, laih anun ayup hla pơtlep ƀơi ƀuai gah djuai ania Hmông ăt gir djă pioh pơtô glăi mơ̆n”.
![Khua git gai ping gah ơi Nguyễn Phú Trọng hăng mơnuih ƀôn sang djuai ania Mường ƀơi Hòa Bình ( Rup mă mơ̆ng TTXVN)](https://vov4-media.solidtech.vn/sites/default/files/styles/large/public/2024-07/anh_bac_trong_voi_nguoi_muong__2.jpg)
Ayong Đinh Ply, djuai ania Bahnar mơ̆ng tơring čar Gia Lai hlăk dŏ ƀơi sang amăng plơi djop djuai ania 54 djuai ania Việt Nam iâu lĕ plơi gru grua tuai čuă ngui djop djuai ania Việt Nam, či Đồng Mô, Sơn Tây-Hà Nội, dŏ hơdor pioh tơlơi pơtă pơtăn mơ̆ng Khua git gai ping gah brơi djă pioh gru grua hiam djuai ania:
“Wa tom lăi brơi djă pioh hăng pơđĭ tui gru grua hiam djuai ania Việt Nam lăi hrŏm, ăt kah hăng gru grua djop djuai ania ƀiă ngă hiư̆m pă, kiăng lir hơbit, thâo gum pơgôp nao rai, akŏ pơdong plơi pla lŏn ia đi nao pơ anăp, ngă gêh găl brơi tơdruă pơđĭ kyar bơwih ƀong huă, ătw kah hăng djru nao rai tơdruă hrăm nao rai tơlơi thâo thăi, lăng gru grua hiam hla tui. Djă pioh anŏ gơgrong anun kâo gir run djă pioh hăng pơđĭ tui gru grua hiam djuai ania ta pô tui hăng Wa pơtô, laih anun tơlơi pơtă pơtăn hlăk nao tŭ mă hơdrôm hră wa brơi, mơ-it kơ mơnuih ƀôn sang djop djuai ania. Hơdrôm hră anun pơđok dlưh pran jua biă mă, tơlơi wa čih brơi djă pioh, pơlar tui gru grua hiam, djă pioh tơlơi phiăn klă, djơ̆ lăp amăng gru grua hiam djop djuai ania Việt Nam ăt kah hăng djuai ania Bahnar ăt hlăk djă pioh pơđĭ tui gru grua amăng plơi Gru grua hiam djop djuai ania dêh čar, kâo ƀuh djơ̆ biă mă hăng ba glăi boh tơhnal yôm kơ tơlơi hơdip mơda djop djuai ania Việt Nam ƀing ta”.
![Khua git gai ping gah ơi Nguyễn Phú Trọng hăng mơnuih ƀôn sang djop djuai ania ƀơi kual Dap Kơdư ( Rup mă mơ̆ng TTXVN)](https://vov4-media.solidtech.vn/sites/default/files/styles/large/public/2024-07/anh_tong_bi_thu_voi_ba_con_tay_nguyen_25-7.jpg)
Ƀơi mông jơnum Gru grua hiam đơ đam dêh čar thun 2021, Khua git gai ping gah ơi Nguyễn Phú Trọng lăi pơtong: “Gru grua lĕ anŏ hiam tơlơi thâo mơ̆ng djuai ania, gru grua dŏ lĕ djuai ania ăt dŏ, gru grua rơngiă lĕ djuai ania rơngiă”. Tơlơi pơhiăp anai yôm pơphăn biă mă, jing hrup ia along mơ̆ng phun hiam klă hloh, ba glăi tơlơi hơdip, suă pran phrâo, hơbô̆ ƀô̆ mơta plơ̆ng ƀơi djop tơring tơrang plơi pla ataih hloh amăng dêh čar. Hloh kơ anun dơ̆ng, gru grua hiam đưm djop djuai ania dưi djă pioh, pơđĭ tui pơlar lu jing “pran kơtang khŏp” kiăng ta lŏm lui hĭ tơlơi phiăn, juăt ƀu klă, pơluk mơgu đưm, ngă kơ ta ư̆ rơya rơpa mơhao, ta râo pơdưh anŏ gêh găl mơ̆ng lŏn mơnai glai klô, anăp nao pơ dĭ da gla kơñ mơak bơngač hloh ƀơi anăp ƀing ta.
Viết bình luận