VOV4.Jarai-Phrâo anai, ƀơi Hà Nội, anom bruă hlăk ai tơdăm dra mut phung rơnuk Hồ Chí Minh ngă hrom Anom pơtô bruă ping gah dêh čar, Jơnum min gru grua hiam, Pơtô pơjuăt mơ̆ng Anom bruă khua pơ ala mơnuih ƀôn sang dêh čar, Ding jum gru grua Pơrơguăt drơi jăn hăng Tuai čuă ngui, Gong phun pơdah tup Việt Nam hăng Khul pơlir hơbit čih tơlơi hơk hơr mơak pran Việt Nam jơnum bơkơtuai “Anih anom internet hăng bruă ngă pơgang guai gru grua hiam tơlơi pơmin mơ̆nh ƀing muai”.

Đĭ pơhiăp ƀơi mông jơnum bơkơtuai, Khua anom pơtô bruă ping gah dêh čar, ơi Nguyễn Trọng Nghiã rơkâo djop gưl anom bruă tơdăm dra mut phung mơneč mă anŏ gêh găl mơ̆ng anih yua internet, bruă pơblih mă yua mrô kiăng pơtrut tơlơi thâo hluh kơ ƀing muai rơnuk tơdơi thâo tong ten gru grua phun dêh čar, hơdôm rơnoh yôm gru grua hiam phara, hơmâo mơ̆ng đưm jă ten mơ̆ng djuai ania.

Ƀơi mông jơnum bơkơtuai, ƀing khua mua pơtum lăng tong ten kơ anŏ bơbeč djơ̆ mơ̆ng tơlơi pơhing plang internet, bruă sĭ mơdrô bơwih bơwăng hluh gah guai hăng bruă pơgang amăng atur gru grua hiam tơlơi pơmin ană mơnuih rơnuk anai. Lăi nao kơ gơnam yua gru grua hiam amăng plang internet, lu tơlơi pơgôp hiăp lăi, kiăng hơmâo tơlơi phiăn pel ĕp gơnam yua amăng plang internet, kiăng pơhlôm djơ̆ ba tơlơi pơhing djơ̆ tong ten, tơpă, rơđah rơđong, hiam klă, anăp nao ngă tui gru grua hiam brơi mơnuih ƀôn sang, biă mă ñu ƀing muai rơnuk anai; akŏ pơjing bruă mă bơkơnar, hiam mơak pioh kơ atur, mă yua gơnam gru grua amăng plang internet lơ̆m dêh čar ta pơđĭ kyar.

Mông jơnum abih bang

Kiăng kơ ƀing muai hlăk ai ngă hrom pơgang atur gru grua tơlơi pơmin mă yua plang internet, Kơ-iăng nai tha prin, nai prin tha Nguyễn Thị Thu Phương, Anom kơsem min gru grua Hơk hơk mơak pran jua dêh čar Việt Nam gah Ding jum gru grua boh thâo Pơrơguăt drơi jăn hăng Tuai čuă ngui lăi lĕ, kiăng akŏ pơjing anih anom kơ čơđai thâo pơčeh phrâo.

“Anŏ ngă kơ gơñu đăo biă mă, gơñu thâo hluh laih, kiăng hơmâo mông bơkơtuai ƀudah lu hơdră pơčrông dơlăm sa hnong, ƀudah pơphun lu mông ngui ngor mơak…hơdôm hơdră anun pơjing rai anih ngui ngor, anih pioh kơ ƀing muai, hlăk ai dưi pơtruh nao rai ĕp glăi tơlơi ră ruai mơ̆ng phun đưm dêh čar. Ƀu hơmâo hơdră pơpă ôh yôm hloh, ba tơlơi bơngač lơ̆m ƀing muai hlăk ai pơjing rơnoh yôm anŏ gơñu kiăng, aliăng kơ tơlơi hơmâo kơnang kơ hơdôm tơlơi pơƀuh phrâo hơdră gơñu tŭ mă mưn amăng pran jua”.

Pơhiăp ƀơi mông jơnum, Khua anom pơtô bruă ping gah, ơi Nguyễn Trọng Nghĩa lăng yôm anom bruă tơdăm dra mut phung hăng ƀing hlăk ai Việt Nam hlăk pơphun lu bruă mă, pơtrut bruă mă rơđah rơđong kiăng djă pioh, wai pơgang, pơđĭ tui gru grua hiam djuai ania, pơgang guai amăng tơlơi pơmin gru grua thâo thăi lơ̆m pơblih mă yua mrô. Anun lĕ hơdôm rơbâo mông jơnum kơđi čar, bruă ngă pơwơ̆t glăi pơ rơngôl hơđăp, anih hơkrŭ kơ lŏn ia, hyu čuă lăng sang djă pioh gơnam gru, anih nam gru dêh čar, rŭi hyu ĕp lăng. Hơdôm wơ̆t pơphun pơplông hơduah ĕp kơ gru grua, phun gru dêh čar djuai ania ƀuh jai hrơi lu arăng mut ĕp, biă mă ñu mă yua boh thâo ia rơgơi tơlơi pơhing hơmâo pok pơhai lu laih.

Ơi Nguyễn Trọng Nghĩa Khua anom pơtô bruă ping gah dêh čar

Anom bruă tơdăm dra hlăk ai, djop anom bruă mơnuih tơpuôl hơmâo pơčeh phrâo bruă mă, pơjing anih pơtruh tơlơi pơhing laih djru prăk kăk, pơtô brơi jơlan hơdră, pơpha mơnuih mă bruă djru kơ hlăk ai pơphun bruă mă pơblih phrâo thâo pơčeh amăng lu bruă pơkra ming, lu bruă bơwih ƀong huă sĭ mơdrô, amăng anun lu mơnuih hlăk ai ngă bruă sĭ mơdrô tŭ yua amăng bruă tuh tia pơkra ming bơwih brơi bruă gru grua hiam, lu gơnam pơkra ming djă pioh gru phun mơ̆ng kual plơi pla, lir hơbit hăng gơnam gru grua hiam tuai hyu ngui blơi pioh, pơthâo hăng ia rơgơi tơlơi kơhnâo pơhing phrâo soh.

Khă tui anun, amăng rơnuk ba yua ia rơgơi măi mok tal 4, juăt 4.0, anun lĕ ia rơgơi tơlơi kơhnâo ană mơnuih pơđĭ kyar kơtang, pơblih yua mrô, Khua anom pơtô bruă ping gah dêh čar ơi Nguyễn Trọng Nghĩa rơkâo djop gưl anom bruă tơdăm dra mut phung mơneč mă abih tơlơi gêh găl pơđĭ tui tơlơi thâo hluh kơ ƀing muai hur har kơ bruă hơduah ĕp gru phun dêh čar, djă pioh rơnoh yôm gru grua hiam klă, anŏ phara hơjăn mơ̆ng djuai ania kah hăng thâo krăn anih dŏ, bruă yôm mơ̆ng gru grua amăng bruă pơđĭ kyar lŏn ia.

“Djop gưl anom bruă tơdăm dra mut phung mơneč mă yơh anih gêh găl, tơlơi pơhing internet, lơ̆m pơblih mrô kiăng pơđĭ tui tơlơi thâo hluh kơ ƀing muai thâo kơ gru phun dêh čar, rơnoh yôm gru grua hiam phara mơ̆ng djuai ania, ăt kah hăng anih dŏ, tơlơi gơgrong mơ̆ng gru grua amăng bruă pơđĭ kyar lŏn ia. Amăng rơnuk măi mok pơđĭ kyar 4.0 djop anom bruă tơdăm dra mut phung kơsem min, akŏ pơjing ĕp jơlan hơdră djru kơ ƀing hlăk ai tơdăm dra pơphun bruă mă pơčeh phrâo gah gru grua hiam klă; pơphun, tuh pơ alin, djru pơplông, kơčăo bruă gru grua, hơdôm tơlơi pơmin pơƀuh brơi gơnam yua gah gru grua hiam, rơnoh yôm, hơmâo anŏ kơtang bang hyu, ngă pơčrang bơngač amăng hlăk ai čơđai muai".

Ƀơi mông jơnum, ƀing khua mua pơtum lăi nao kơ boh yôm phun kiăng thâo krăn anŏ bơbeč nao, pơdjơ̆ hrom mơ̆ng anih pơtruh tơlơi pơhing plang internet, djop bruă mă sĭ mơdrô bơwih brơi kơ tơlơi pơhing hluh gah guai hăng bruă mă pơgang guai gru grua tơlơi pơmin amăng rơnuk phrâo ră anai; anŏ hlăk ƀuh hăng hơdră hlăk ngă pơđĭ tui gru grua hiam djuai ania hơmâo boh yôm phara, pơtrut anom bruă tuh tia pơkra pơjing gơnam gru grua ƀơi Việt Nam pơđĭ kyar, hrưn đĭ hmao hăng rŏng lŏn tơnah.…Hơmâo hơdôm čô khua mua ăt rơkâo brơi pel ĕp tong ten gơnam pơčeh amăng plang internet, gru grua mơ-it amăng plang internet; pơthâo brơi, anăp ngă bruă djru kơ khul hlăk ai tơdăm dra mut phung rơnuk Hồ Chí Minh, djop gưl, anom bruă hăng thun muai Việt Nam ngă hrom tŭ yua, ba glăi boh tơhnal lu amăng bruă pơgang guai amăng gru grua tơlơi pơmin ană mơnuih khăp kơ lŏn ia gru grua hiam klă pô.

Nay Jek: Pơblang