Thun 2022, Jơnum min mơnuih ƀon sang tơring čar Kon Tum hơmâo pơphun mông pơpŭ ƀing kơhnâo kơhnăk lĕ “Nghệ nhân ưu tú” gưl Kơnuk kơna amăng bruă djă pioh gru grua gah bơngăt hăng 15 čô mơnuih. Anai lĕ sa amăng 15 čô mơnuih kơhnâo kơhnăk dưi tŭ mă tơlơi pơpŭ gưl Kơnuk kơna lĕ “Nghệ nhân ưu tú” tal anai, hlâo kơ yak nao thun phrâo 2023, tha plơi A Blung, 73 thun, plơi Kon Pao Kla, să Đăk Pxi, tơring glông Đăk Hà brơi thâo:

“Kâo pơ-ư ang hăng bơni biă mă lơ̆m hơmâo Khua mir sir pơsit jao hră pơpŭ brơi mơnuih kơhnâo kơhnăk. Tơdơi anai tơdah dŏ hơmâo pran, thun 2023 kâo amra tŏ tui pơtô brơi neh met wa hăng ƀing čơđai amăng plơi pla hrăm atông čing hơgor, adôh suang. Ƀing gơmơi kiăng lăng yôm, djă pioh gru grua hiam klă mơng ơi yă pioh glăi, kiăng kơ huăi rơngiă hĭ. Amăng hơdôm hrơi ngui ngor ngă yang rơbang ƀing gơmơi kiăng pơphun atông čing, adôh suang kah dưi djă pioh gru grua djuai ania pô, neh met wa kah pơdah pran jua hok mơ-ak”.

Amăng mông jao hră pơpŭ anăn “Mơnuih kơhnăk gru đưm” gah gru grua hiam tal III thun 2022, tơring čar Lâm Đồng hơmâo 6 čô mơnuih kơhnăk gru đưm dưi pơpŭ. Ƀing kơhnăk anai hơmâo lu bruă mă djru hrom djă pioh, pơđĭ tui rơnoh yôm gru grua đưm hơdôm djuai ania ƀiă K’Ho, Mạ, Chru. Mơnuih kơhnăk ơi Điểu K’Bôi, să Đồng Nai Thượng, tơring glông Cát Tiên, sa amăng 6 čô mơnuih arăng jao hră pơ anăn mơnuih kơhnăk gru đưm tal anai lăi:

“Kâo pô dưi hơmâo Ping gah, Kơnuk kơna jao hră pơpŭ anai kâo pơ-ư angbiă mă. Ƀuăn amra gir run abih pran jua pioh pơgang tui, djă pioh rơnoh yôm gru grua hiam đưm mơ̆ng djuai ania Mạ gơmơi. Amăng tơlơi hơdip mơda rĭm hrơi, kâo pơtô lăi mơnuih ƀôn sang thâo hơdră bơwih ƀong huă hrưn đĭ kiăng trơi pơđao. Mah tơlơi hơdip mơda ƀu pơdơi ôh pơđĭ kyar samơ̆ gru grua đưm djuai ania Mạ gơmơi ăt khom djă pioh na nao hăng gir run pơtô glăi kơ ană tơčô tơdơi”.

Amăng thun 2022, tơring čar Gia Lai hơmâo pơphun tal hơdor glăi 90 thun akŏ pơjing tơring čar. Amăng hơdôm tơlơi ngui ngor phun hơmâo atông čing, mơñam abăn ao, rêu rô…anai lăng kar hăng bơyan hmâo hmăi hăng lu tơlơi ngui adôh suang yôm phara pơpŭ brơi kơ tuai nao čuă ngui pơ Gia Lai. Amai Gơnh, dŏ ƀơi plơi Ktu, să Kon Chiêng, tơring glông Mang Yang brơi thâo:

“Thun 2022, tơring čar hơmâo pơphun hơdor glăi 90 thun akŏ pơjing tơring čar Gia Lai, hăng lu tơlơi ngui ngor tui gru grua yôm phara, anun lĕ atông čing hring hơgor, mơñam abăn ao, rêu rô…kâo hor biă mă hơdôm tơlơi anai. Anai ăt lĕ hrơi mông kiăng neh met wa amăng djop plơi pla pơbưp, hrăm nao rai hơdôm tơlơi hiam klă amăng tơlơi hơdip mơda. Tơlơi anai amra djru brơi rơnuk tơdơi dong lăng yôm, djă pioh gru grua mơng djuai ania pơgi kơdih anai.

Amai Bloi, sa čô mơnuih thâo mơñam mrai đưm plơi Chuet 2, Phường Thắng Lợi, plơi prong Plei Ku, Gia Lai gir run na nao djă pioh bruă rơngaih mrai mơñam abăn ao djuai ania Jarai. Amai Bloi hok mơak hăng pơ-ư ang biă mă yua ñu jing sa amăng hơdôm čô mơnuih hlăk ai thâo mơñam mrai đưm djuai ania pô:

“Kiăng dưi mơñam mrai đưm khom hrăm tui mơ̆ng ơi yă amĭ ama pơtô glăi. Lăng tui amĭ ama, ơi yă mơñam djă pioh gru grua mơñam mrai đưm Jrai hơbai ta pioh glăi. Čang rơmang ƀing ană tơčô tơčĕ tơdơi anai, gơñu ƀu lui raih ôh hăng djă pioh gru grua đưm djuai ania ta pô. Tơdah lăi kơ prăk jên, sĭ ƀu hơmâo prăk lu ôh, yôm hloh lĕ pran jua ta amuaih, ta khăp kơ gru grua djuai ania ta pô, kiăng djă pioh pơtô glăi kơ rơnuk tơdơi”.