Hrơi mơak anun hơmâo akŏ ñu “Bạc Liêu pơtruh nao rai hăng anŏ haim gru grua đưm hăng kiăng pơđĭ kyar” hơmâo 14 bruă mă, amăng anun hơmâo tơlơi ƀuh ƀô̆ mơta hrom mơ̆ng 25 boh tơring čar, ƀôn prong amăng dêh čar. Sa tơlơi phrâo amăng mông mơak anai thun anai, hơmâo ngă hrom gru grua hiam lir hơbit bruă tuai čuă ngui; kiăng pơpŭ đĭ gru grua hiam đưm Dạ cổ hoài lang mơ̆ng pô pơčeh tơlơi adoh rơgom ơi Cao Văn Lầu, pơčeh tơlơi adoh anun rơbêh 100 thun rơgao hăng anai, kiăng djă pioh hăng pơđĭ tui anŏ hiam tơlơi adoh Đờn ca tài tử kual Dơnung dêh čar ta, UNESCO tŭ yap jing gru grua hiam mơak pran mơnuih mơnam lŏn tơnah.

Pơhiăp ƀơi mông jơnum, ơi Vũ Đức Đam, Kơ-iăng Khua dêh čar lăi lĕ: Hrơi mơak gru grua-tuai čuă ngui Bạc Liêu hăng mông jơnum mơak Dạ cổ hoài lang thun 2022 lĕ bruă mă ngă tui tơlơi clah čun mơ̆ng Khua git gai ping gah, ơi Nguyễn Phú Trọng ƀơi mông jơnum Gru grua hiam dêh čar pơphun rơgao hăng anai sa thun, anăp nao bruă mă djă pioh hăng pơđĭ tui hloh rơnoh yôm gru grua hiam đưm, akŏ pơjing atur gru grua hiam rơnuk phrâo, djă pioh gru grua hiam đưm djuai ania.